¹ Mandumbu , chekuzanga cha mbunge yami nyi kulyumba chami kuli Zambi cha kuli ayo , ha ulamwino wo . ² Mumu nakushindakenya hali ayo ngwami mbunge ali nayo kufupa Zambi , alyoze nyikulita nyi chinyingi ko . ³ Mumu kanyingikine ululi wa kukatuka kuli Zambi , nyi kufupa kulikolela ha ululu wo ene , kalizeyesele ku ululi wa Zambi . ⁴ Mumu Kilishitu iye we umanunwino wa shimbi ha ululi kuli mweswe mafulyela . ⁵ Mumu Mose hanasoneka ha ululi uze wakatuka ha shimbi : '' Mutu yoze walinga ululi wa shimbi kuma katwama nyi ululi wuno . ⁶ Alyoze ululi uze waku katuka ku ufulyelo unambe chino : '' Kanda wamba mu mbunge ye ngwe , ' iya mazeuka mwilu ? ' ( achi che , kuneha Kilishitu hashi) ; ⁷ nawa kanda wamba ngwe , '' Iya mahulumuka ku jondo? ''' ( achi che , kuneha Kilishitu helu hakachi ka afu ) . ⁸ Alyoze kuchi chinambe ? '' Liji lili mukamwihi nyi yena , mukanwa lye nyi mumbunge ye . '' Lye liji lya ufulyelo , lize twakwambujola . ⁹ Mumu nyi ngwo mutayiza nyi kanwa lye ngwe Yesu iye mwe Mwene , mba mumbunge ye mufulyela ngwe Zambi wamuhindwishile hakachi ka afu , kumakulamwina . ¹⁰ Mumu mutu mafulyela mu mbunge nyi ululi , mba nyi kanwa matayiza akatambule ulamwino . ¹¹ Mumu chisoneko chinambe ngwo , '' Mweswawo mamufulyela kechi kevwa sonyi . '' ¹² Mumu uhandununo hakachi ka A-Yunda nyi akwa Mavungu wakuhi . Mumu Mwene umuwika mwe Mwene wa eswe , kakuyukisa waze eswe akutambika kuli iye . ¹³ Mumu mweswawo matambika ha jina lya Mwene kumakamulamwina . ¹⁴ Alyoze kuchi mahasa kutambika kuli yoze kamufulyelele ? Kuchi mahasa kufulyela yoze kevwile ? Kuchi mahasa kwivwa nyi mukwa kwambujola wakuhi ? ¹⁵ Kuchi mahasa kwambujola , shina matumiwa ? Nyikulita ngwe chinasonewa ngwo , '' Cho kuwaha cha molu ja akwa kwambujola sango lipema ! '' ¹⁶ Alyoze kononokene eswe ku sango lipema . Mumu Izaya kanambe ngwenyi , '' Mwene , iya hanafulyela sango lyetu ? '' ¹⁷ Chocho ufulyelo kuuneza ha kwivwa , nyi sango linakatuka kuliji lya Kilishitu . ¹⁸ Alyoze ngunambe ngwami , '' Te kevwile ko nyi ? '' Ewa , chamwenemwene . '' Liji lyo hilinatuhukila hashi heswe , nyi maliji jo kumasongo ja chifuchi . '' ¹⁹ Alyoze ngunambe ngwami , ''A-Izalele te kanyingikine nyi ? '' Hatangu Mose kanambe ngwenyi , '' kumungukanwihya ku ukwa nyi waze nyi vungu ko . Nyi vungu kulishi mlinjekela , mungukanutenwisa . '' ²⁰ Mba Izaya kanahamuka chikolo kanambe ngwenyi , '' Anguwanyine kuli waze kangufupile . Angusolwele kuli waze kahulile kuli yami . '' ²¹ Alyoze hali A-Izalele kanambe ngwenyi , '' Tangwa lyeswe nolwele moko jami kuli atu ja uhulya a kuhamika . ''