¹ Yesu wayile ku mulundu wa olivwe ² .Ha kucha cha tangwa wahilukile nawa ku tembele , nyi atu eswe ejile ; yiye watwamine hashi nyi kwalongesa. ³ Nyi akwa kusonyeka nyi A- Fwaliseu yaneha pwo amukwachile mu utanji. Yamusa mukachi . ⁴ Yamba kuli iye ngwo , '' Longeshi , yono pwo hanamukwate mu utanji . ⁵ Achi mushimbi , Mose watwambile kwasa mawe atu ngwe yono; kuchi kevwe unambe hali iye ? '' ⁶ Ambile yino nyikumuzeza nacho hanga akapwe nyi chuma cha kumusuma nacho , alyoze Yesu wahetamine nyi kusoneka hashi nyi munwe. ⁷ Muze atwalilile nyi kumuhula , wahet;ukile nyi kwamba ngwenyi , '' Yoze keshi nyi shili hakachi kenu , alyange kwasa liwe hali iye .'' ⁸ Cheka wahetamine , nyi kusoneka hashi nyi munwe. ⁹ Muze achivwile , atuhukile umwe nyi umwe , kuputuka nyi mukulwana .Ahichikile Yesu ukawenyi , nyi mwe pwo wapwile mukachi . ¹⁰ Yesu yamana nyi kwamba kuli iye ngwenyi , '' Pwo , alihi waze akusumanga ? kwakwihi nyi umwe wakuhisa nawa?'' ¹¹ Wambile ngwenyi ,'' wakwihi , Mwene.'' Yesu wambile ngwenyi , '' Nyiyami nawa chishi kukuhisa . Yako kanda nawa ukavulumuna'' ¹² Yesu wahanjikile kuli ayo , ngwenyi '' Yami panga ya hashi : yoze mangukaula keshi kenda nawa mu milima , alyoze mapwa nyi pangu lya mwono .'' ¹³ A-Fwaliseu ambile kuli iye ngwo , '' Yena wakushindakenya hali yena mwene ; shindakenyo ye hi yawumwenemwene .'' ¹⁴ Yesu wakumbulwile ngwenyi , '' chipwe kachi ngunashindakenya hali yami mwene , shindakenyo lyami yawumwenemwene . Ngunanyingika kuze ngunakatuka nyi kuze ngunayi , kumwanyingikine kuze ngunakatuka chipwe kuze ngunayi . ¹⁵ Nwakupatula kulita nyi musunya ; yami chishi kupatwila nyiumwe. ¹⁶ Nyingwe mungupatwila , upatwilo wami wa umwenemwene mumu yami chishi ukawami, alyoze nguli nyi Tata yoze wangutumine . ¹⁷ Ewa , nyi mu shimbi jenu chinasonewa ngwo shindakenyo ya atu ali yinapu ya umwenemwene . ¹⁸ Yami nguli yoze wakushindakenya hali yami mwene , nyi Tata .yoze wangutumine kakushindakenya hali yami.'' ¹⁹ Ambili kuli iye ngwo , '' Tatenu kulihi ali?'' Yesu wakumbulwile ngwenyi , '' Yenu kunwanyingikine chipwe yami chipwe Tata ; kachi nwangunyingikine kachi mununyingika nyi Tata nawa.'' ²⁰ Wahanikile wano maliji mu zuwo lya milambu shimbu alongesele mu tembele, nyiumwe wamukwachile wakwihi mumu shimbu yenyi kanda achiheta. ²¹ Nawa wambile kuli ayo cheka nawa ngwenyi , '' Munguya kwami; munukangufupa nyi kufwa mu shili yenu. Kuze ngunayi kunwahashile kuhetako.'' ²² A-Yunda ambile ngwo , '' Malishaha mwene nyi ? Te anambe ngwenyi , ' Kuze ngunayi kumushi kahasa kuhetako nyi ? '' ²³ Yesu wambile kuli ayo ngwenyi , '' Yenu muli a mwishi ;yami nguli wa mwilu . Yenu muli akwa hashi ; yami hinguli wa hashiko . ²⁴ Keshika , ngunambe ngwami munukafupa mu shili jenu. Shina munufulyela yoze nguli , munukafwa mu shili.'' ²⁵ Ambile kuli iye keshika ngwo ,'' Yena iya ?'' Yesu wambile kuli ayo ngwenyi,'' Yoze nanwambulwilile chize ku uputuko ²⁶ '.Nguli nyi yuma yinji ya kwamba nyi ya kupatwila hali yenu. Alyoze , yoze wangutumine iye waumwenemwene ; nyi yuma yize nevwile kuli iye , yino yuma nakuhanjika kuli akwa hashi.'' ²⁷ Ayo kakanyingikine ngwe muze apwile nyi kuhanjika hali Tata. ²⁸ Yesu wambile ngwenyi , '' Muze hinwazundula mwana mutu , hohene munukanyingika yoze nguli , nyi chishi kulinga nyi chimwe cha kuli yami mwene. Ngwe muze Tata angulongesele , nakuhanjika yino yuma . ²⁹ Yoze wangutumine kali nyi yami , nawa kanguhichikile ukawami, mumu nakulinga yuma yakusuwilisa kuli iye .'' ³⁰ Muze ahanjikile yino yuma anji amufulyelele. ³¹ Yesu wambile kuli waze A-Yunda amufulyelele ngwenyi , '' kachi munutwama mu maliji jami, Keshika munupwa chamwenemwene tumbaji twami; ³² nyi kunyingika umwenemwene , nyi umwenemwene ku umukatusula.'' ³³ Amukumbulwile ngwo, '' Tuli muyachi wa Apalahama nyi kanda tupweho ndungo kuli nyiumwe; kuchi unambe ngwe, ' kumunukatusuka,?'' ³⁴ Yesu wakumbulwile ngwenyi , '' Pundu , pundu, ngunambe kuli yenu ngwami , mweswawo kakuvulumuna hi ndungo wa shili. ³⁵ Ndungo kashi kutwama muzuwo ndo myaka ya mutolo ; mwe mwana mutu kakutwama ndo myaka ya mutolo . ³⁶ Keshika , nyingwe mwana makutusula , chaumwenemwene mutusuka. ³⁷ Ngunanyingika nuli muyachi wa Apalahama ; mwakufupa kungushaha mumu maliji jami keshi nyi fwashi muli yenu . ³⁸ Nakunuhanjikila yize ngunamono nyi Tata , nyi yenu nwakulinga yize hinunevu kuli Tatenu.'' ³⁹ Amukumbulwile nyi kuhanjika kuli iye ngwo ,'' Tatenu iye Apalahama .'' Yesu wambile kuli ayo ngwo , '' nyingwe nwapwile ana ja Apalahama , kachi nwakulinga itanga ya Apalahama . ⁴⁰ Alyoze , halyapwila nwakufupa kungushiha , mutu yoze wanulwekele umwenmwene uze ngwevwile kuli Zambi . Apalahama kakalingile yino. ⁴¹ Nwakulinga yuma ya tatenu. '' Ambile kuli iye , '' Yetu kutwasemukile ku utanji ; Tata umuwika tukwete : Zambi '' ⁴² Yesu wambile kuli ayo ngwenyi , '' Nyingwe Zambi kapwile kachi nwanguzanga , mumu nakatukile kuli Zaambi, nyi hano nguli ; mumu chipwe chalijilile yami mwene , alyoze kangutumine. ⁴³ Kuchi te kunwanyingikine maliji jami? mumu te kunwahashile kwivwa maliji jami. ⁴⁴ Yenu nuli a kuli tatenu , ndyapu , nyi kuzanga kulinga yuma ya tatenu . Iye wapwilemukwa kushahana chize ku uputuko nyi kashi kwivwa umwenemwene mumu kumushi umwenemwene muli iye . Muze mahanjika mahuza , kanahanjika nyi chenyi mwene mumu iye mukwa mahuza nyi mwe tato wa mahuza. ⁴⁵ Alyoze , mumu nakuhanjika umwenemwene , kumushi kungufulyela . ⁴⁶ Iya wa muli yenu unangukumika ngwe shili nguli nayo? kachi ngunambe umwenemwene , kuchi te kunushi kungufulyela ? ⁴⁷ Yoze wa kuli Zambi kakwivwa maliji ja Zambi kumushi kuwevwa mumu hi muli a Zambi ko.'' ⁴⁸ A-Yunda amukumbulwile ngwo , '' kutwambile kanawa ngwetu yena uli ka Samaliya nyi ndemoni ukwete? '' ⁴⁹ Yesu wakumbulwile ngwenyi , '' Kungushi nyi ndemonyu , alyozenakulemesa mwe Tata , nyi yenu nwakungusaula. ⁵⁰ Chishi kufupa uhenya wa yami mwene ; '' kuli yoze wakufupa nyi kupatwila. ⁵¹ Pundu, pundu, ngunanulweke , kachi umwe mafunga maliji jami , iye keshi kamona kufwa.'' ⁵² A-Yunda ambile kuli iye , '' Halyapwila tunanyingika ngwo ndemonyu ukwete. Apalahama nyi a atupulofweto kafwile: alyoze unambe unambe ngwo , kachi umwe mafunga maliji je , kechi kamona kufwa. ⁵³ Yena hi ,uli muneneko kuhyana tatetu Apalahama yoze wafwile , yena? Apulofweto newo kafwile . Yena iya unalipwisa kupwa?'' ⁵⁴ Yesu wakumbulwile , '' Nyingwe ngunalichichimyeka kachi yami mwene , uhenya wami wa umokomoko; Tata ye wa kunguchichimyeka yami - yoze nwakwamba ngwe ye Zambi yetu . ⁵⁵ Kunwamunyingikine , alyoze namunyingika . Nyingwe mungwamba ngwami, chamunyingikine , ' mungupwa ngwe yenu, wamahuza. Chochene namunyingika nyi kufunga liji lyenyi. ⁵⁶ Tatenu Apalahama walikwijile hakumona tangwa lyami; iye walimwene nyi kuwahilila.'' ⁵⁷ A-Yunda ambille kuli iye ngwo , '' Yena kanda upwa nyi myaka makumi atano, hiwunamono Apalahama ? '' ⁵⁸ Yesu wambile kuli ayo ngwenyi, '' Pundu , pundu, ngunanulweke ngwami , muze te Apalahama kanda apwa , yami nguli.'' ⁵⁹ Anjile mawe hanga amwase , alyoze Yesu waswamine nyi kutuhuka mu tembele.