¹ Muze ino yuma hiya palika yesu wendanganyine mu Ngalileya , mumu kaka zangile kuya mu Yundeya mumu a yunda a zangile kumushiha . ² Mba chiwanyino cha a Yundu cha Isakila te hi cha kundama. ³ Keshika anakwo ambile kuli iye , '' Katuka muchihela chino yako ku Yundeya , hanga tumbaji twe newo amone milimo ize wa kulinga . ⁴ Nyi umwe wakulinga imwe mu uswamina nyi aye mwene kana zange ku munyingika ha toma . Nyi mulinga ino yuma , lisolole ku chifuchi.'' ⁵ Mumu chipwe anakwo kafulyela muli iye . ⁶ Keshika Yesu yamba kuli ayo , '' Shimbu yami kanda yichihetela , mba shimbu ya yenu kuili shimbu yeswe . ⁷ Akwa hashi kahashile kunuvwila kole , alyoze ami ka kunguvwila kole mumu na kushindakenya hali ayo ngwami utanga yo yashili. ⁸ Kandukenu nuye ku chiwanyino ; ami chichi kuya ku chiwanyino mumu shimbu yami kanda ichitela.'' ⁹ Muze hamba ino yuma kuli ayo , ya twama mu Ngalileya . ¹⁰ Mba muze anakwo haya ku chiwanyino , neye ya kaula , hi hatomako alyoze mu uswamina . ¹¹ Ayunda amufupile ha chiwanyino nyi kwamba ngwo , ''Kuli ali?'' ¹² Kwapwile kulihanjekela mu mbunga hali iye. Amwe yamba ngwo , '' Mutu mupema .'' Akwo yamba ngwo , '' Ka , kakutokesa mbunga .'' ¹³ Mba nyi umwe wa hanjikile hatoma hali iye mumu wa woma wa A - yunda . ¹⁴ Muze chiwanyino hi chapwa ha kachi nyi kuhwa , Yesu ya nyina kunjila mu tembele ya putuka ku longesa . ¹⁵ Mba A -Yunda yakomoka , ngwo '' Kuchi yono lunga unanyingika yuma ipwa haha? Kalilongesele.'' ¹⁶ Yesu ya kumbulula ngwenyi , '' Longeso lyami hi lya yamiko , alyoze lya yoze wangutumine . ¹⁷ Nyi umwe mazanga kulinga upale wenyi makanyingika lino longeso , nyi lina katuka kuli Zambi , nyi ngunahanjika hali yami mwene. ¹⁸ Yoze wakuhanjika yuma yenyi mwene kakufupa lufuma wa yoze wa mutumine , mwenawo wa mwene mwene , nyi uhenya ku ushimo muli iye. ¹⁹ Mose wanuhele shimbi nyi ? Hindu mumwe wa kuli yenu wakulinga shimbi. Ika nuna zangila kungu shiha?'' ²⁰ Mbunga akumbulwile ngwo , '' Yena ndemonyu ukwete . Iya una zange ku kushaha?'' ²¹ Yesu ya kumbulula kuli ayo ngwenyi , '' Nalingile chitanga chimuwika mba enu eswe nuna chikomoka. ²² Mose hananwehe ungalami (kuchapwile ngwe wa kuli Mose , alyoze wa kutulamba ),nyi ha sambata nwakupwisa mutu ngalami. ²³ Nyi mutu matambula ungalami ha sambata hanga shimbu ya Mose kanda aitangula , mumu waka nu nanguvila uli mumu hinapwisa mutu mungunu ha sambata ? ²⁴ Kanda nukapatwila milonga nyi kulita nyi meso jenu , alyoze patwilenu upatwilo mu ululi.'' ²⁵ Amwe awaze akatukile ku Yelusaleme ambile ngwo , '' Au hi mwana uko anafupu ku shina ? ²⁶ Talenu , kanahanjika hatoma , mba nyi imwe ana mwambe . Kuma akwa kuyula chamwenemwene kananyingika ngwo iye mwe Kilishitu , nyi? ²⁷ Alyoze tunanyingika kuze yono ana katuka . Alyoze muze Kilishitu makeza nyi umwe maka nyingika kuze ana katuka .'' ²⁸ Mba Yesu wakololokele mutembele , nyi kulongesa ngwenyi , '' Yenu eswe nuna ngunyingika nuna nyingika kuze nguna katuka nawa . Chalijililile yami mwene , alyoze yoze wangutumine wa mwene mwene , nawa kunwa munyingikine. ²⁹ Nguna munyingika mumu kuli iye nguna katuka nawa Iye wangutumine .'' ³⁰ Keshika yafupa ku mukwata , mba nyi umwe wasele kwoko lyenyi hali iye mumu shimbu yenyi te kanda yiheta . ³¹ Alyoze anji mu mbunga amufulyelele, nawa ambile ngwo , '' Muze Kilishitu makeza , makalinga yilai yinji kuhyana ino yono halinga''? ³² Afwaliseu evwile mbunga mulinyenyeta yino yuma ha kutwala kuli Yesu , Asasendote akwa lutwe nyi Afwaliseu yatuma tupita , hanga aka mukwate . ³³ Keshika Yesu yamba ngwenyi , '' Ngu chili nyi yenu ha shimbu ikehe , mba munguya kuli yoze wangutumine . ³⁴ Ku munu kangufupa , kunuchi kanguwana ; kuze ngunayi , kunuchi kuhasa kwiza .'' ³⁵ A yunda keshika yamba ha kachi ko ngwo , '' kuli kuze yono lunga maya kuze tuchi kuhasa ku muwana ? Maya kuli waze ana limwangashana hakachi ka Angelesiya hanga akalongese ayo nyi? ³⁶ Liji lino anambne ngwenyi , kumunu kangufupa kunuchi ka ngu wana ; kuze munguya , kunuchi kuhasa kwiza ?'' ³⁷ Ha tangwa lya kusula lye tangwalinene lya chiwanyino , Yesu yamana nyi ku kololoka , ngwenyi ,''Nyi kachi umwe mevwa pwila , eze kuli yami hanga anwe. ³⁸ Yoze mafulyela muli yami , chize chene isoneko yinambe , tulwiji a meya a mwono matuhuka mu jimo lyenyi.'' ³⁹ Alyoze wambile ino ha kutwala ku Shipilitu , yoze waze mafulyela muli iye makatambula ; mumu Shipilitu te kanda achi muhana mumu Yesu kanda achinjila mu uhenya . ⁴⁰ Amwe ha kachi ka mbunga , muze hevwa maliji ano, yamba ngwo , '' Yono chamwene mwene mwe pulofeta .'' ⁴¹ Akwo yamba ngwo , '' Yono mwe Kilishitu .'' Alyoze akwo yamba ngwo te Kilishitu makatuka ku Ngalileya nyi ? ⁴² Yisoneko ya Zambi ku ya mbile ngwo , Kilishitu meza ku munyachi wa Ndawichi nawa ku mbeteleme, ku chihunda chize apwile Ndawichi nyi? ⁴³ Keshika kwapwile kulihandununa ha kachi ka mbunga mumu hali iye . ⁴⁴ Amwe ya zanga ku mukwata , alyoze nyi umwe wasele kwoko lyenyi hali iye. ⁴⁵ Keshika tupitao ya hiluka kuli asasendote akwa lutwe nyi Afwaliseu , yamba kuli ayo , '' Kuchi kunwa munehene ?'' ⁴⁶ Tupitao yakumbulula ngwo, nyi umwe mutu hanahanjika ngwe chi chize.'' ⁴⁷ Keshika Afwaliseu akumbulwile ngwo , ''Nyi yenu nawa hanu pyangula nyi? ⁴⁸ Umwe wa kuli akwa ku yula ha mufulyela muli iye , chipwe umwe wa Afwaliseu ? ⁴⁹ Alyoze mbunga yino kuya nyingikine shimbi ,ka shingiwa .'' ⁵⁰ Nikondemu (umwe wa Afwaliseu , yoze wejile kuli iye hatangu ) yamba kuli ayo , ⁵¹ ''Shimbi jetu ja kupatwila mutu shimbu kanda achiva kuli iye nyi ku nyingika ize akulinga ?'' ⁵² Akumbulwile nyi kwamba kuli iye ngwo , '' Nyi yena nawa uli wa ku Ngalileya nyi? hengula utale ngwo nyiumwe pulofeta wakatuka ku Ngalileya .'' ⁵³ Mba mweswe waile ku zuwo lyenyi.