¹ Halyapwila kwapwile mu fwaliseu wa jina lya Nikondemu , mukwa lutwe wa A-Yunda . ² Yiye wejile kuli Yesu ha ufuku wambile kuli yiye ngwenyi , '' Longeshi , tunanyingika yena uli Longeshi yoze wejile kukatuka kuli Zambi , mumu nyi umwe mahasa kulinga yilayi yize yena wakulinga shina Zambi mapwa hamwe nenyi.'' ³ Yesu wamukumbulwile ngwenyi , '' chamwenemwene , chamwenemwene , Mutu kahashile kumona wanangana wa Zambi shina masemuka kamuchali.'' ⁴ Nikondemu yamba kuli yiye ngwenyi , '' kuchite mutu mahasa kusemuka muze hapwa mukulwana? kahashile kunjila chisuho chamuchali mu jimo lya naye akasemuke , mahasa nyi?'' ⁵ Yesu wakumbulwile ngwenyi , '' chamwenemwene , chamwenemwene, mutu kahashile kunjila mu wanangana wa Zambi , shina masemuka ku meya nyi ku shipilitu . ⁶ Chize chinasemuka ku musunya musunya , nyi chize chinasemuka ku Shipilitu Shipilitu ⁷ Kanda kukomoka chize hinamba kuli yena , 'chakutamba kusemuka kwilu; ⁸ Fuji yakupalika kwesweko muyipala ; nyi yena muwivwa liji lyayo , alyoze ushi ,kunyingika kuze muyikatukila nyi kuze yinayi . Chocho apwa mweswe wa kusemuka ku Shipilitu.'' ⁹ Nikondemu wakumbulwile nyi kwamba kuli yiye ngwenyi, '' kuchi muyihasa kupwa yino yuma ?'' ¹⁰ Yesu wakumbulwile nyi kwamba kuli yiye ngwenyi,'' Yena uli mwe longeshi wa A- yizalele , nyi hindu kwanyingikine yino yuma nyi? ¹¹ Chamwenemwene , chamwenwmwene , ngunambe kuli yena ngwami , twakuhanjika yize tunanyingika , twakushindakenya yize hitunamono . Halyapwila kunushi kutambula shindakenyo yetu. ¹² Ngwe kuchi nyi nanwambulwilile yuma ya hashi kunushi kufulyela , kuchi munufulyela nyi mungunwambulwila yuma ya mwilu? ¹³ Mba nyiumwe wazezukile mwilu shina yoze wahulumukine mwilu - mwe Mwata Mutu. ¹⁴ Ngwe chizechene Mose wazundwile kapela mu puya , chocho chatamba kuzundula mwe Mwana Mutu , ¹⁵ Hanga eswewo mafulyela kuli yiye akapwe nyi mwono wa mutolo. ¹⁶ Mumu chocho Zambi wazangile akwa hashi wechele Mwanenyi wawika , hanga mweswawo mafulyela kuli yiye kechi katoka alyoze akapwe nyi mwono wa mutolo. ¹⁷ Mumu Zambi katumine Mwanenyi hano hashi hanga akapatwile akwa hashi , alyoze hanga akalamwine akwa hashi kuli yiye . ¹⁸ Yoze mafulyela muli yiye keshi kamupatwila , alyoze yoze keshi kufulyela hanamupatwila kulu mumu kafulyelele mu jina lya mwe Mwana wa wika wa Zambi . ¹⁹ Chino chechikuma chaupatwilo : Pangu hilineza hano hashi , nyi atu azangile milima hi pangu ko mumuyitanga yon yapwile ya ungulungulu . ²⁰ Mumu mweswawo wakulinga yipi keshi kuzanga pangu , keshika kwiza kuli pangu , kuchina mamukumuka ha yitanga yenyi. ²¹ Alyoze , yoze wakulinga umwenemwene kakwiza ku pangu hanga yikasoloke yitanga yenyi chize hanayilingi muli Zambi.'' ²² Kulutwe lya achi , Yesu nyi tumbaji jenyi ahetele ku chifuchi cha Yundeya . Kuze washimbwileko hamwe no nyi kupapachisa. ²³ Halyapwila Yoano wapwile neye nyikupapachisa mu Enone hakamwihi Salimu mumu kwapwile meya anji kuze . Nyi atu kapwile nyikwiza kuli yiye nyi kwa papachisa, ²⁴ mumu Yowano kanda amumbila muzuwo lya ususu. ²⁵ Keshika kwapwile mbandanga hakachi ka tumbaji ja Yowano nyi A-Yunda ha kutwala ku kupemesa . ²⁶ O ayile kuli Yowano ambile kuli yiye ngwo, '' Longeshi , yoze wapwile hamwe nyi yena ku kanda lya lwiji wa Yondawu , yoze wunashindakenya , tala , yiye kanapapachisa , newo kanayi kuli yiye.'' ²⁷ Yowano wakumbulwile ngwenyi , '' Mutu kahashile kutambula nyichimwe shina mamwahacho kwilu . ²⁸ Yenwene munuhasa kushindakenya yize nambile ngwami, 'hi yamiko Kilishitu , Mba alyoze ; hingunatumiwa kulutwe lyenyi.' ²⁹ Yoze uli nyi ndungi mwe sandungi , yoze wakumana nyi nyikumwivwa , kakuwahilila chikolo mumu ha liji lya sandungi. Achi , mba , wevwahililo wami keshika unazala to. ³⁰ Yiye chamutamba kuya nyikutoha , alyoze yami changutamba kuya nyikukehuluka. ³¹ Yoze unakatuka mwilu yiye helu lya eswe. Nyi yoze unakatuka hashi yiye mukwa hashi nyi yiye kakuhanjika ya hashi . Yoze unakatuka mwilu yiye kapwa helu lya eswe . ³² Kakushindakanya chize hanamono nyi chize hanevu , alyoze nyiumwe hanatambula shindakenyo yenyi . ³³ Yoze hanatambula shindakenyo yenyi hanase chinyngi ngwenyi Zambi yiye wumwenemwene. ³⁴ Mumu yoze Zambi hanatumu kakuhanjika maliji a Zambi . Mumu keshi kuhana Shipilitu ku njongo. ³⁵ Mwe Tata kakuzanga mwe Mwana hanakunjika yuma yeswe mu kwoko lyenyi . ³⁶ Yoze mafulyela kuli Mwe Mwana kali nawo mwono wa mutolo, alyoze yoze keshi kwononoka kuli mwe Mwata kechi kamona mwono , alyoze utenu wa Zambi kuwakutwama hali yiye.''