¹ Hatangwa lya muchitachu , mwapwile umbachiso mu Kena chihunda cha mu Ngalileya , nyi naye ya Yesu wapwileko. ² Alakenyene Yesu nawa nyi tumbaji twenyi ku umbachiso . ³ Muze ahonene vinyu , naye ya Yesu yamba kuli yiye ngwenyi , ''Vinyu keshi nayo .'' ⁴ Yesu yamba kuli yiye ngwenyi , '' Pwo , kuchi uneza kuli yami? Ola yami kanda yiza.'' ⁵ Naye yamba kuli tuvumbi ngwenyi , '' cheswacho mamba kuli yenu chilingenu.'' ⁶ Achi kwapwile sapa ja mawe jisambano ja meya ajiseleko nyi kulita nyi ndako ja A-Yunda ja kulipemesa , jeswe yimwe nyi yimwe jalita nyi njongo jali hanji jitatu. ⁷ Yesu yamba ayo ngwenyi , '' Zalisenu sapa nyi meya .'' O ajizalishile ndo ku mukomo. ⁸ Mba yamba kuli tuvumbi ngwenyi , '' Switenu halyapwila nutwale kuli mukwa kuyula ulungi'', o ajitwalile. ⁹ Alyoze muze te mukwa kuyula ulungi apanjikile meya aze aalumwine vinyu , kanyingikine kuze yakatuka {alyoze tuvumbi waze aswichile meya anyingikine.} Mukwa kuyula ulungi yatambika sandungi. ¹⁰ Yamba kuli yiye ngwenyi , '' Atu eswe masa hatangu vinyu yipema nyi muze atu hanwa chikolo mba masa yize hi yipema ko. Yena hiwafunga vinyu yipema ndo halyapwila .'' ¹¹ Chino chitangu cha ku yilayi yenyi Yesu wachilingile mu Kena chihunda cha mu Ngalileya , nyi kusolola uhenya wenyi , nyi tumbaji twenyi amufulyelele. ¹² Kulutwe lya chino Yesu , nyi naye , nyi ana-akwo , nyi tumbaji jenyi wapalumukine ku Kafwanaume atwamineko matangwa akehe. ¹³ Chizomboka cha A-Yunda muchi kundama , mba Yesu wakandukile ku Yelusaleme . ¹⁴ Yiye wawanyine mu tembele waze alanjishile ngombe nyi mapanga nyi tutele , nyi akwa kusumbakenya mbongo kanatwama. ¹⁵ Yiye wahosele shikote ya mihipu watuhwishile eswe mu tembele , nyi mapanga nyi ngombe . Wamwangine mbongo ja akwa kusumbakenya nyi kulimbula yitamba yo. ¹⁶ Wambile kuli waze alanjishile tutele ngwenyi, '' Twalenu yino yuma haze . Kanda nukapwisa zuwo lya Tata zuwo lya chitanda .'' ¹⁷ Tumabaji jenyi ewulukile ngwe chinasinewa ngwo, ''Kulinga nyi mbunge yeswe ha Zuwo lye hichinanguli.'' ¹⁸ A-Yunda keshika amukumbulwile ngo, '' Chilayi chika mulweza kuli yetu se wakulinga yino yuma?'' ¹⁹ Yesu wakumbulwile ngwenyi , '' Onwonenu tembele yino , mba ha matangwa atatu mungukayihindwisa .'' ²⁰ A-Yunda keshika ambile ngwo , '' Makumi awana a myaka nyi myaka yisambano, apwile nyi kutunga tembele yino nyi yena mukayihindwisa ha matangwa atatu nyi?'' ²¹ Alyoze , yiye wahanjikile ha kutwala ku tembele ya mujimba wenyi. ²² Muze te keshika hamuhindwisa hakachi ka afu , tumbaji jenyi ewulukile ngwe wambile chino , o afulyele che chisoneko nyi liji lize ambile Yesu . ²³ Muze apwile mu Yelusaleme ku chizomboka kuchiwanyino , anji afulyelele jina lyenyi hakumona yilayi yenyi yize apwile nyikulinga . ²⁴ Alyoze Yesu mwene kakolelele kuli ayo mumu wanyingikine atu eswe , ²⁵ Kafupile umwe ashindakenye hali , mumu yiye mwene wanyingikine chize chili muli atu.