¹ Achi shimbu kanda chiwanyino cha chizomboka kanda chiheta . Yesu nyikunyingika ola yenyi hiyeza akatuka hano hashi akaye kuli mwe Tata . Se hanazange nyienyi mwene wze apwile hano hashi wa azangile ndo ku songo . ² Hachi ndiyapu te hanachisa kulu mu mbunge ya Yundaze Ka Kelyote mwana Semone , kumusolola Yesu . ³ Wanyingikine ngwe mwe Tata hanamwehe yuma yeswe mu moko jenyi ngwe kuli Zambi wakatukile nyi kuli Zambi maya . ⁴ Yakatuka ku kulya kwachingoloshi yatumbika yikolo yenyi . Iye yanda hina nyikulikasa mumbunda yenyi . ⁵ Yatehuna meya mu mbashila ya putuka kusanyisa molu ja tumbaji nyi kwakusumuna nyi hina lize alikashile nalyo . ⁶ Yaheta kuli Semone Petulu , Petulu yamba kuli iye ngwenyi , '' Mwene , musanyisa molu jami ? '' ⁷ Yesu wakumbulwile ngwenyi , '' Chizee ngunalingi wuchikuchihasa kuchinyingika hali yino shimbu , alyoze kumu kanyingika kulutwe . '' ⁸ Petulu yamba kuli iye , '' Ku uchi kasanyisa molu jami nyilimwe tangwa , '' Yesu wamukumbulwile , '' Nyi chakusanyishine , kachi yena ku ushi nyi chihandanyi yami . '' ⁹ Semone Petulu yamba kuli iye , '' Mwene , hi molu jami wika ko , alyoze moko jami nawa nyi mutwe wami . '' ¹⁰ Yesu yamba kuli iye ngwenyi , '' Yoze hasana mweswe keshi kufupa , kusana molu shina , alyoze kanapeme mweswe lukombo ; nyi yenu nunapeme , alyoze hi eswe ko . '' ¹¹ ( Mumu Yesu kanyingikine yoze mamusolola iye ; keshika wambile , ''Kunwapemene eswe .'' ) ¹² Keshika muze te hasanyisa molu jo nyi kwanda mukanjo wenyi ha kutwama hashi nawa , wambile kuli ayo , '' Nunanyingika chize hinalinga kuli yenu ? ¹³ Nwakungusanyika ' Longeshi ' nyi ' Mwene ' nyi kuhanjika kanawa , mumu chocho nguli . ¹⁴ Kachi yami , mwe Mwene nyi longeshi , hinasanyisa molu jenu , kachi nyi yenu nawa chanutamba kulisanyisa molu ja umwe nyi mukwo nyi mukwo . ¹⁵ Mumu nanwaha chilweza hanga nyi yenu nawa chanutamba kulinga chizechene ngwe yami nalinga kuli yenu . ¹⁶ Pundu , pundu , ngunambe kuli yenu ngwami , ndungo keshi kuhyana mwene wenyi ; chipwe yoze watumiwa keshi kuhyana yoze wamutumine ka . ¹⁷ Kachi nunanyingika yino yuma , kachi nunawaha nyi munuyilinga . ¹⁸ Chishi kuhanjika hali yenu eswe ; nguna nyingika waze hingunatongola - alyoze hanga chisoneko chikamanunuke : ' Yoze wakulya mbolo hamwe nyi yami hananguzundwila kashijino kenyi . ' ¹⁹ Chize ku halyapwila ngunanwambulwila shimbu kanda chipwa hanga muze muchipwa , nukafulyele ngwe yami nguli . ²⁰ Pundu , pundu ngunambe kuli yenu ngwami , yoze matambula mweswe mungutuma mangutambula yami , nyi yoze mangutambula matambula yoze wangutumine . ²¹ Muze te Yesu hamba yino , kalipikile mu shipilitu . Neye washindakenye ngwenyi , '' Pundu , pundu , ngunambe kuli yenu ngwami umwe wa kuli yenu maka ngukunjika yai . '' ²² Tumbaji keshika alitalile umwe kuli mukwo nyi mukwo , nyi kukakashana hali yoze anambe . ²³ Achi kwapwile umwe wa kuli tumbaji kanajamina mu kondo ya Yesu , yoze amuzangile Yesu . ²⁴ Semone Petulu keshika yahula kuli tumbaji nyi kwamba , '' Twambulwile yoze anambe . '' ²⁵ Iye nyikuzeukila chizechene wapwile mu kondo ya Yesu nyi kwamba kuli iye , Mwene ngwetu iya ? '' ²⁶ Yesu yakumbulula , '' Yoze mungutachila lupapa nyi kumweha . '' Mba muze yamuhana kuli Yundase mwana Semone Ka -Kalyote . ²⁷ Kulutwe lya lupapa , hohene Satana wanjilile muli iye , Yesu yamba kuli iye , '' Chize mulinga , linga kawashi . '' ²⁸ Alyoze nyiumwe wa kuli waze anatwama kumesa wanyingikine ha chikuma chize wahanjikile chino kuli iye . ²⁹ Amwe kashinganyekele ngwo , mumu Yundase kapwile nyifunda lya mbongo , Yesu wambile kuli iye , '' Landa yuma yize tunafupu ha chiwanyino , '' hanji ahane chimwe kuli yiswale . ³⁰ Muze Yundase hatambula lupapa , watuhukile haze . Kwapwile ufuku . ³¹ Muze Yundase haya , Yesu yamba , '' Halyapwila hanachichimyeka mwe Mwana Zambi , mba hanachichimyeka Zambi muli iye . ³² Nyi Zambi kumaka muchichimyeka muli iye mwene , nyi halyapwila kumamu chichimyeka . ³³ Ana akepe , shimbu likepe wika yami nguli hamwe nyi yenu . Kumunukangufupa , chizechene ngwe nambile kuli A-Ayunda ngwami , ' Kuze munguya yenu kunwahashile kuyako . ' Chocho ngunambe kuli yenu . ³⁴ Ngunanweheyo shimbi yaha , nukalizange umwe nyi mukwo ; chizechene ngwe yami hingunanuzange, nyi yenu nawa nukalizange umwe nyi mukwo nyi mukwo . ³⁵ Ku chino eswe makanyingika yenu nuli tumbaji jami , kachi munupwa nyi zango umwe kuli mukwo nyi mukwo . '' ³⁶ Semone Petulu yamba kuli iye ngwenyi , '' Mwene , kulihi muuya ? '' Yesu wakumbulwile , '' Kuze munguya , yena kwahashile kungukaula , alyoze mukangukaula kulutwe . '' ³⁷ Petulu yamba kuli iye , '' Mwene , kachi te chahashile kukukaula chipwe halyapwila ? mungutumbika mwono wami hali yena . '' ³⁸ Yesu yakumbulula ngwenyi , '' Mutumbika mwono we hali yami nyi ? Pundu , pundu , ngunambe kuli yena , ndemba kechi katambika ndo yena hiwalikala yami katatu . ''