¹ Mba mutu umwe jina lyenyi Lazalu waijile . Wapwile mukwa Mbetanyi , chihunda cha Maliya nyi yayo Malita. ² Iye maliya wa wayishile Mwene nyi yitumbo ya vumba lipema wakusumwine yilyato yenyi nyi kambu jenyi , mwenawo ndumbwenyi Lazalu wayijile . ³ Mandumbu jenyi atumine kuli Yesu , ngwo ''Mwene , tala , yoze wa zanga kanaiji .'' ⁴ Muze Yesu achivwile , wambile ngwo , ''ino ikola hi ya kufa ko , mba alyoze ya kuneha uhenya kuli Zambi hanga aka chichimyeke nacho mwe mwana Zambi.'' ⁵ Mba Yesu wa zangile Malita nyi mwanakwo nyi Lazalu . ⁶ Keshika muze evwile ngwo Lazalu kanaiji , Yesu watwamine matangwa akwo ali mu chihela chimuwika. ⁷ Mba ha lutwe lya chino , wambile kutumbaji, ''Tuyenu ku Yundeya nawa.'' ⁸ Tumbaji ambile kuli iye , '' Longeshi , hapwila lume A-Yunda kaneseka ku kwasa mawe , una hilukila ko nawa?'' ⁹ Yesu ya kumbulula , '' Kukushi ma ola kumi nyi ali a pangu mu tangwa ? nyi umwe menda mushimbu ya mwalwa , kechi ku hukuna , mumu kana mono mu pangu lya chifuchi chino. ¹⁰ Alyoze , nyi menda mu ufuku , mahukana mumu pangu kuli shimo muli iye .'' ¹¹ Wambile ino yuma , nyi lutwe lya ino yuma , wambile kuli ayo , '' Sepa lyetu Lazalu ha pomba mutulo , alyoze ngunayi hanga muhindwise mutulo.'' ¹² Tumbaji keshi ambile kuli iye ngwo , '' Mwene , nyi kanapombo , ku mahinduka .'' ¹³ Mba Yesu te kanahanjika ha kufa chenyi , mba a nyongene ngwo kana hanjika ha kupomba tulo a ku hwima . ¹⁴ Mba Yesu yamba kuli ayo ha toma , ''Lazalu ha fa. ¹⁵ Nguna wahilila , mumu wa yenu , chize chapwileko hanga nu taize . Tuyenu kuli iye.'' ¹⁶ Tomase , yoze apwile nyi ku sanyika ngwo Ndilimu , wambile kutumbaji nyi akwo , '' Tuyenu nyi yetu hanga tukafwe nyi Yesu.'' ¹⁷ Muze Yesu heza , ya wana Lazalu hapwa kulu mu fuka ha matangwa awana . ¹⁸ Mba Mbetanyi ya pwile ha kamwihi nyi Yelusaleme , ngwe Kilometulo jitatu kusuha. ¹⁹ Anji amuli A-Yunda te haneza kuli Malita nyi Maliya , nyi kwa lembejeka ha mulonga wa ndumbwo. ²⁰ Mba Malita , muze hevwa ngwo Yesu kaneza , waile nyi ku mutakana , alyoze Maliya wa twamine mu zuwo . ²¹ Malita mba yamba kuli Yesu , '' Mwene , nyi kachi wa pwanga kuno , ndumbwami kachi kafile. ²² Chipwe hapwila , nguna nyingika ngwami cheswacho mwita kuli Zambi , ma kwaha cho ,'' ²³ Yesu wambile kuli iye , '' Ndumbwe mahinduka nawa.'' ²⁴ Malita yamba kuli iye , '' Nguna nyingika ngwami makahinduka kamuchali ha kufufuka ha tangwa lya kusula .'' ²⁵ Yesu yamba kuli iye , '' Yami kufufuka nyi mwono ; Yoze mweswe mafulyela muli yami , chipwe mafa , makapwa nyi mwono; ²⁶ nyi mweswe uli nyi mwono nawa mafulyela muli yami kechi kafa . Unataiza ino nyi ?'' ²⁷ Wambile kuli iye , '' Ewa , Mwene , ngunataiza ngwami yena Kilishitu , Mwana wa Zambi , yoze uneza muchifuchi.'' ²⁸ Muze te hamba chocho , yaya nyi ku sanyika mwako Maliya ku sesa . Yamba ngwo , ''Longeshi hano hwali kana kusanyika nawa.'' ²⁹ Muze evwile chocho , wa katukile nyi kawashi nyi kuya kuli iye. ³⁰ Mba Yesu te kanda achinjila mu limbo te uchili mu chihela chize chene Malita amu takanyiho. ³¹ Mba muze A-Yunda , waze apwile nyi ku mulembejeka , muze amwene Maliya akatukile nyi kawashi atuhukile , amukawile , nyi ku shinginyeka ngwo kanayi kufuka nyi kulililako. ³² Muze Maliya heza ha chihela haze Yesu apwile nyi ku mu mona , wa lyumbile kumolu jenyi nyi kwamba kuli iye ngwenyi , '' Mwene , nyi kachi wa pwanga kuno , ndumbwami kachi kafile.'' ³³ Muze Yesu amu mwene kana lili , nyi a Yunda waze ejile nenyi newo kanalili , wevwile chinyengo mu mbunge yenyi nyi ku lipikala; ³⁴ yamba ngwo , '' Kuli nuna kamusa ?'' Yamba kuli iye ngwo , '' Mwene , tweya utale .'' ³⁵ Yesu walilile. ³⁶ Mba A-Yunda ambile ngwo , '' Talenu chize amuzangile Lazalu ! '' ³⁷ Mba amwe ambile ngwo , '' Shina Yono mutu , walawishile meso ja tu puputa , halinga yono lunga kuhona kufa?'' ³⁸ Mba Yesu nawa nyi chinyengo chinji muli iye waile kufuka . Mba ya pwile pako , nyi liwe ali shachikileko. ³⁹ Yesu yamba ngwenyi , '' Chizenuko liwe .'' Malita , ndumbu ya Lazalu , yoze mwene wafwile , wambile kuli Yesu , '' Mwene , shimbu ino mujimba unapolo , mumu hi hapalika matangwa awana haze ana kafila.'' ⁴⁰ Yesu yamba kuli iye , '' Cha ka hanjikile kuli yenu ngwami , nyi munu fulyela , munu kamona uhenya wa Zambi? '' ⁴¹ Keshika ya chizako liwe . Yesu wahetwile meso jenyi kwilu ngwenyi , '' Tata , nguna kusakwila mumu waku ngwivwa . ⁴² Nguna nyingika ngwami wa kungwivwa shimbu yeswe , alyoze ha mulonga wa mbunga ize ina mana kungunjinguluka keshika namba chino , hanga aka tayize ngwo yena wa ngutumine.'' ⁴³ Muze hamba chino , ya kololoka nyi liji linene , ''Lazalu , tuhukamo! '' ⁴⁴ Mufu watuhukilemo ; wa kukasa molu nyi moko nyi u zalo , nyi ku meso jenyi kwa kujinga nyi chitambala . Yesu yamba kuli ayo ngwenyi , mujitulenu numweche aye.'' ⁴⁵ Mba anji A-Yunda waze ejile kuli Maliya hakumona chize alingile Yesu , amufulyele. ⁴⁶ Mba amwe aile kuli Afwaliseu nyi kwambulwila yuma yize Yesu halinga . ⁴⁷ Mba asasendote akwa lutwe nyi Afwaliseu akungulukile nyi kwamba ngwo , '' Kuchi mutulinga ? Au lunga yilayi yinji analingi. ⁴⁸ Nyi mutu mwecha chizechene , eswe ma mufulyela ; akwa Loma meza nyi ku tambula che chihela chetu nyi we munyachi wetu.'' ⁴⁹ Chipwe chocho , umwe lunga ha kachiko , Kayafa , yoze wa pwile sasendote mukwa lutwe uze mwaka , wambile kuli ayo , '' Yakuhi nunanyingika. ⁵⁰ Yenu kunusolo ku shinganyeka ngwo chinalite kuli yenu ngwo mutu umuwika afile atu kuhyana vungu lyeswe ku kuwa.'' ⁵¹ Mba achi kachambile halwenyi wika ko . Alyoze , se wa pwile sasendote mukwa lutwe ha mwaka uze , wa pulofetezele ngwenyi Yesu mafwila lye vungu lyeswe; ⁵² nyi hi vungu wikako, alyoze hanga aka kungulule nawa kuli umuwika ana a Zambi waze ana mwangana. ⁵³ Keshika chize kutangwa lize atwamine pangu hanga aka mushihe. ⁵⁴ Yesu keshika kendeleko nawa kumeso ja atu eswe hakachi ka A-Yunda , alyoze wakatukile kuze mukuya ku chifuchi cha kusulangana nyi puya ku limbo , jina lyalyo , Efulame. Watwamineko hamwe nyi tumbaji twenyi. ⁵⁵ Mba chizomboka cha A-Yunda cha kundamine , nyi anji a kuchifuchi chize akandukile ku Yelusaleme muze te chizomboka kanda chipwa hanga aka lipemese. ⁵⁶ Apwile nyi kufupa Yesu , o alyambile ha kachi ko nyi ku mana mutembele , '' Ngwo kuchi nuna shinganyeka ? Kechi kwiza kuchi wanyino nyi? ⁵⁷ Mba asasendote akwa lutwe nyi Afwaliseu te ha hana shimbi kachi umwe manyingika kuze ali , akambulule hanga aka mukwate.