¹ Achi che chuma tunambe : Tuli nyi sasendote mukwa lutwe yoze hanatwama ku kwoko lya chindume kuchitwamo cha wanangana mwilu. ² Kuli kavumbi muchihela chisandu , yamwenemwene mbalaka yize mwene , hi atu ko , watungile. ³ Mumu mweswe asasendote mukwa lutwe mamusakula nyi kuhana yawana nyi yitapo . Keshika chatamba kupwa nyi chimwe cha kuhana. ⁴ Nyi Kilishitu kapwile hano hashi , kachi keshi kupwa sasendote nyi chimwe , mumu kwali waze a kuhana yawana nyikulita nyi shimbi . ⁵ Waze a kulinga chilweza nyi chizulye cha yuma ya mwilu. Ngwe chize , masa amukanyamishile kuli Zambi nyi muze te hamaputuka kutunga mbalaka: Zambi kanambe ngwenyi , '' Tala ukatunge yuma yeswe nyi kulita nyi cheseko chize akusolwesela ha mulundu.'' ⁶ Alyoze Kilishitu katambula uvumbiko wahyana , ngwe chize chitakanyishi nawa cha chilakenyo yipema yahyana, ayo ya manyina ha yilakenyo yipema yahyana. ⁷ Mumu kachi ulakenyo utangu kuwapwile nyi chitela, kachi kafupile haze manjishila chilakenyo wamuchali wunakalanjisa . ⁸ Mumu muze Zambi wawanyine wupi nyi atu , wambile , '''tale , matangwa kaneza - chocho anambe mwene - muze mungukakwata chilakenyo chaha nyi akwa zuwo lya Izalele nyi akwa zuwo lya yunda . ⁹ Kuushi kulita nyi usendo uze nakwachile nyi ashskulu jo ha tangwa lize na akwachile ku kwoko nyi kwatwala haze lya chifuchi cha Engitu . Mumu kaka kawile usendo wami, keshika naahumbwile - chocho anambe mwene. ¹⁰ Mumu uno we usendo mungukakwata nyi akwa zuwo lya Izalele kulutwe lya matangwa aze - chocho anamba Mwene. Mungukasa shimbi jami mumaanajo , nawa mungukajisoneka ha mbunge jo. Mungukapwa Zambi yo, nawa makapwa athu jami. ¹¹ Kechi kalilongesa umwe nyi mukwo mwenyembo wenyi mukwalifuchi nyi mukwo nyi ndumbwenyi , kuhanjika ngwenyi , ' Nyingika mwene.' mumu eswe kumakangunyingika yami , katuka kuli mukehe ndo kuli munene. ¹² Mumu mungu kawavwila keke ha yilyinga yo yipi , nyi shili jo kuchi kayiwuluka chipwe hamwe.'' ¹³ Ha kuvuluka uno usendo ''Waha'' iye hanapwisa asendo utangu kupwa wamwaka , nawa uze hawapwa hukulu nyi kukwoka unambe kuhwa.