¹ Keshika ,mandumbu asandu , nuli nyi chihanda cha kutambika chamuma lilu . Nyongenu hali Yesu , kambaji nyi mwe sasendote mukwa lutwe wa kutayiza chetu . ² Kanakapwa wa umwenemwene kuli Zambi, iye wamusakwile , chizechene ngwe Mose nawa wapwile nyi umwenemwene mu zuwo lya Zambi . ³ Mumu Yesu hanamunyongo kupwa mukwa kutela uhenya wunji wahyana Mose , nyi kulita ngwe yoze watungile zuwo uhenya wenyi wahyana we uhenya wa lye zuwo . ⁴ Mumu zuwo lyeswe kuli yoze wakulitunga , alyoze watungile yeswe hi Zambi. ⁵ Mumu Mose wapwile ndungo wa umwenemwene mu zuwo lya Zambi lyeswe, kupwa uchela ha yuma yize makahanjika kulutwe. ⁶ Alyoze Kilishitu waumwenemwene ngwe mwana una tetekela mu zuwo lya Zambi . Yetu tuli zuwo lyenyi nyi chamwenemwene mutulalaminya ku hamu lyetu nyi kulisamba cha kutalatala chetu. ⁷ Keshika , chizechene ngwe Shipilitu Musandu kanambe ngwenyi: ''Musono , nyi munwivwa liji lyenyi ⁸ kanda nukalisa mbunge jenu ngwe kushimbu yakutanguka , ha tangwa lya kweseka mu puya. ⁹ Achi chapwile muze ashakulu jenu angwihile kungweseka , nyi muze , ha makumi awana a myaka , amwene itanga yami. ¹⁰ Keshika napihilile ha chisemuko chize . Nambile ngwami , ' Kakupyanguka matangwa eswe mu mbunge jo . Kanyingikine majila jami.' ¹¹ Ngwe chizechene nalishingile mu ufwatulo wami : 'Keshi kanjila mu uhwimino wami.''' ¹² Kanyamenu , mandumbu , kuchina hanji muyipwa muli umwe nyi mbunge yipi ya kuhona ufulyelo , mbunge yize ya kukatuka kuli Zambi wa mwono . ¹³ Alyoze , lijikijizenu umwe nyi mukwo tangwa ha tangwa , shimbu lyeswe analivuluka ngwo ''Musono, '' hanga nyiumwe wa kuli yenu makalisa ha kwonga cha shili. ¹⁴ Mumu hi twapwile tusendo twa Kilishitu nyi mu tukwachilila ku ujikijilo wetu muli iye kuputuka ku uputukilo ndo kusongo . ¹⁵ Hali chichi hanachambe , '' Musono, nukalisa mbunge jenu , ngwe kushingu yakutanguka.'' ¹⁶ Aya waze evwile Zambi nyi kumutangukila ? Hi wazeko akatukile ku Engitu ku palikila muli Mose ko ? ¹⁷ Mba hali aya wapihililile makumi awana a myaka ? Hi hali waze avulumwine ko , nyi waze mijimba yo ya kufwa yalimbukile mu puya nyi ? ¹⁸ Kuli aya washingile ngwe kechi kanjila mu uhwimino wenyi , nyi hi hamulonga ko wa waze amuhukililile iye ? ¹⁹ Mba tunamono kahashile kunjilamo mu uhwimino wenyi mumu kafulyelele.