¹ Keshika , se hananu jingilika nyi lelwa linene lya yela , tweyenu tumbile hasesa umilali nyi shili yeswe yize yalikasa. Tulikolwezenu kuzomboka nyi kuhumikiza uzomboko uze hanase halutwe lyetu . ² Tweyenu tuse mana kuli Yesu . Iye kaputukilo nawa mukwa kumanununa wa ufulyelo . Mumu uwahililo uze asela halutwe lyenyi , wanyongonwene kulusu , nyi kulelesa sonyi , mumu kutwama ku kwoko lya chindume kuchi twamo chamwanangana cha Zambi . ³ Mumu nyongenu hali iye , yoze wanyongonwene ha kuhamika chakwashili cha kulimika nenyi , hanga nuhone kupwa akwa kuzeya nyi kulezumyoka mumbunge. ⁴ Yenu kanda nulitachika nyi shili ndo kumanyinga ; ⁵ mba ninunavulama kuli jikijisa nyi kufumba ana ngwo : ''Mwanami , kanda ulelesa kufumba cha mwene , chipwe ulezumuke muze makolola kuli yiye . ⁶ Mumu Zambi kakufumba waze anazange , nawa malamba mashikote mwana mweswe matambula .'' ⁷ Nyongonona lamba ngwe kafumba . Zambi kakulinga kuliyena ngwe kuli anenyi. Mumu mwana muka uliko yoze tato keshi kufumba? ⁸ Mba nyi lamba lya kufumba kunushi nalyo , lize atu eswe akulipangila , achonunapu ana ja utanji nawa hi ana jenyiko. ⁹ Chikwo nawa , twapwile nyi atata akumujimba atulambile haku tufumba nawa twalemesene . Chinaho chikolo kutuchi kuzeyela kuli Tato yama shipilitu tukapwe nyi mono! ¹⁰ Atata atufumbile ha ka ola kakehe kwesekesa ngwe nyi mbunge jo ene . Mba Zambi ka kutufumba kwesekesa nyi upeme wetu , hanga tukalipanjile ha usandu wenyi . ¹¹ Kufumba kushi kuhana uwahililo hali yize wola, alyoze chinyengo wika . Hindu kulutwe mu ima mihuko ya ululi wa sambukila kuli waze akulifumba nalyo. ¹² Keshika alolenu moko apekepeke nyi makungunwa a kukokoloka . ¹³ Ololenu majila ja ilyato yenu , hanga chilema kechi kakundoloka alyoze akahinduke. ¹⁴ Kaulenu sambukila nawa nyi atueswe , nyiusandu , mumu kwakuhona yino kukushi yoze makamona mwene. ¹⁵ Kanyamenu hanga kanda kupwa umwe yoze mahona vumbi lya Zambi , nawa kuchina muji umwe usasu muze hiwasoka mu unupinjisa, mba anji maichisa nawa, ¹⁶ kuchina chitanji umwe hanji chijilike, ngwe Esau , yoze walanjishile chiyulo chenyi cha kupwa mutangu wa kusemuka . ¹⁷ Mumu nunanyingika ngwe kulutwe , muze azangile kuhinga uwape , alitunyineye mumu kawanyine muhela akalikongeke , chipwe wafupile chikolo nyi masoji. ¹⁸ Mumu yenu kunwejile ku mulundu uze mahasa kuukwata , mulundu wakukwata kahya , milima, kutoka mumilima nyi chizimbi. ¹⁹ Kunwejile kukuhanjika cha chitavwi chipwe kuhanjika chamaliji chize waze eswe evwile alembele nyilimwe liji likwo kanda akahanjike kuli ayo. ²⁰ Mumu kahashile kunyongonona ha chize ayulile :''Nyi kachi kashitu maheta kumulundu , kate kumwasa mawe.'' ²¹ Nyi usolwelo uze wahyana woma Mose wambile ngwenyi , '' Ngunevu woma nawa ngunachikima.'' ²² Alyoze , yenu hinuneza kumulundu wa Zayone nyi kuchi hunda cha Zambi wamono , Yelusaleme wa mwilu , nyi ku yizavu yinji ya angelo mukuwahilila . ²³ Nweza ku kukunguluka cha atangukusemuka, waze anasonekewa mwilu . Nweza kuli Zambi , ngaji ja wa eswe , nyi kuli mashipilitu ja akwa ululi waze hiunapwisa angunu. ²⁴ Nweza kuli Yesu , mwe chitakanyishi cha usendo, nyi kumanyinga a kusapwila waze aku hanjika yuma yipema yahyana manyinga ja Apele. ²⁵ Talenu kanda nulita yoze unahanjika . Mumu kachi kapulukile muze alitunyine yoze wa afumbile hano hashi , kuhyana chikolo yenu kupuluka kachi mutumba manyinga kuli yoze unafumbu mwilu. ²⁶ Yoze liji lyenyi ha wola yize , lyanyikishile hashi , alyoze halyapwila hananushiki ngwenyi , '' Hindu chisuho chimuwika nawa mungukatukungisa hashi , alyoze nyi lilu nawa.'' ²⁷ Ma liji wano ngwo , '' Hindu chisuho chimuwika nawa , '' lina lumbunuka kunungunuka cha yuma yize ya kunyika , chechi chize , ngwe ku yuma yize atengele , hanga yuma yize kuyishi kunyika yikasele . ²⁸ Keshika , kutambula wanangana wuze keshi kuhasa kunyika , tu sakwilenu nawa tukavumbikenu Zambi nyi ulemeso nyi woma . ²⁹ Mumu Zambi yetu iye kahya kakocha.