¹ Yehova yamba kuli Mose ngwenyi , " tota mawe aali akulifwa nyi atangu . Nyiyami mungusonekaha maliji waze apwile ha mawe atatu , aze apalwile . ² Ulilulyeke hakucha chimene nyi kukanduka mulundun Shinai , nyi kulisololako kuze yenamwene kuli yami helu lya mulundu . ³ Kwakuhi mutu yoze makakanduka hamwe nyi yenu , kanda akasoloka nyiumwe sali lyeswalyo lya mulundu . Chipwe mapanga chipwe ngombe kanda akalila kulutwe lya mulundu . ⁴ Iye Mose ya tota mawe aali akulifwa nyi atangu , nawa yahinduka muze hikwacha chimenemene nyi kukanduka mulundu wa Shinai , chizechene Yehova wamwambile . Mose yambata mawe mu mokwo jienyi . ⁵ Yehova yeza hashi mulelwa nawa yamana nyi Mose , nyi kwambulula jina " Yehova ." ⁶ Yehova yapalika halutwe lyenyi nyi kwambulula ngwenyi " yehova , Yehova , Zambi mukwa keke nawa mukwa vumbi , keshi kupihilila washi , wakulumbama nyi atu wa zango nyi umwenemwene , ⁷ kakufunga atu a zango hali tununu , kukonekena uhenge , uvulumunyi , nyi shili . Alyoze keshi kuwahisa nyiumwe yoze wa uhenge .Kumakafwetesa uhenge wa akwa kutota hali ana jo nyi hali ajikulu jo , hachisemuko chamuchitatu nyi chamuchiwana . " ⁸ Mose kawashi washi yehetama hashi nyikuwayila . ⁹ Mba yamba ngwenyi , "halyapwila hinawana vumbi kumeso jienu , Mwene wami , ngunanulembe yenu hakachi ketu , mumu wano atu kapwa akwa pami . Nutukonekene uhenge nyi shili jietu , hanga tukapwe chihinga chenu ." ¹⁰ Yehova yamba ngwenyi , " tala , nguna kolesa usendo . Kumeso ja atu je eswe, mungulinga yikomweso yize kanda achiyilingaho kama hashi , chipwe hakachi ka vungu nyilimwe . Atu eswe hakachi kenu kumakamona chitanga chami , mumu chize mungu kalinga nyi yena muchikapwa chakuvwisa woma . ¹¹ Ononoka kuchize kunakwambe musono . Himunguhuma mu chifuchi kumeso ja A - Amote , A - Knana , A - Hete , A - Peteze , A - Hevwe , nyi akwa Yepushe . ¹² Ukanyama kanda ukakwata usendo nyi akwa chifuchi kuze mukaya , kuchina mukapwa kambwila hakachi kenu . ¹³ Alyoze , ukapuzole yilumbilo yo ukapalwole yipiji ya mawe ja tuponya two , nyi kuteta Ashela yo . ¹⁴ Kanda ukawayila tuzambi tweka , mumu Yehova , iye jina lyenyi ukwa , iye Zambi mukwa ukwa . ¹⁵ Chenacho kanyama kuchina mukwata usendo nyi akwa chifuchi chize , mumu kakulinga utaji nyi tuzambi two , nyi kuhana milambu ku tuzambi two yitapo . Mba umwe hali aayo makanutambika nyi kulya kuchitapo chenyi , ¹⁶ nawa kuchina mukambachisa amwe ana jenyi amapwo kuli ana jenyi amalunga , nyi ana jenyi amapwo mukalinga utaji nyi tuzambi two , mba ana jenyi analunga kuya alinge utaji nyi tuzambi two . ¹⁷ Kanda ukalingila yena mwene tuzambi nyitumwe twakuzuzuluka . ¹⁸ Unatela kufunga chiwanyi cha mbolo kuyishi futumwiso . Ngwe chize nakwambile , unatela kulya mbolo kwakuhona futumwiso ha matangwa shimbiali hawola yacho ha kakweji ka Ambimbi , wakatukile ku Engitu . ¹⁹ Ana atangu eswe hanyima , yimuna yeswe yitangu kusemuka ngombe , chipwe mapanga . ²⁰ Unatela ku kula mwana mutangu wa chimbulu nyi panga , alyoze nyi kuwamulajile , unatela kumumakuna kota . Unatela kukula ana je amalunga atangu kusemuka . Nyiumwe kanda akasoloka kunyi meso jami mokwa . ²¹ Unahase kuzata hamatangwa asambano , alyoze hatangwa lya muchishimbiali unatela kuhwima . chipwe ha mwaka waku chipanyi hamwaka wa kucha , unatela kuhwima . ²² Unatela kufunga chiwanyino cha masemana nyi kulyanga kulya cha tiliku yitangu kucha , nawa unatela kufunga chiwanyino cha kukungila mbuto ha kuhwa cha mwaka . ²³ Mwaka ha mwaka katatu malunga eswe akasoloke kumeso ja Mwene Yehova , Zambi ya A- yizalele . ²⁴ Mumu mungukahuma mu chifuchi mavungu ku meso jie nyi kutohwesa njiza jie . Nyiumwe mutu kechi kazanga chipatwilo che wakunyi muze makanduka ukasoloke kumeso jia Yehova Zambi ye mwaka ha mwaka yisuho yitatu . ²⁵ Kanda ukalambula manyinga a chitapo chami hamwe nyi mbolo yafutunwiso , chipwe kuhichika cha kuchiwanyino chachi zamboka kanda uka chihichika ndo hakucha chimene . ²⁶ Unatela kuneha mbuto yitangu yakulyanga kuhya ya muminda ye ukayitwale mu zuwo lye . Kanda ukateleka mwana pembe mukepe mu yamwa ya naye ." ²⁷ Yehova yamba kuli Mose ngwenyi , " soneka hashi wano maliji , mumu nyikulita nyi maliji wano hingunakolesa usendo nyi yena nyi A - Yizalele ." ²⁸ Mose wapwile kuze hamwe nyi Yehova ha matangwa makumi awana amwalwa nyi ufuku ; kakalile ya kulya yeswayo chipwe kunwa meya . Yasoneka hamwe maliji a usendo , lye kumi lya shimbi . ²⁹ Muze Mose hapalumuka ku mulundu wa Shinai nyi mawe aali a usendo mukwokwo lyenyi , kanyingikine chikwowa cha ku meso jienyi chinatumuka mumu hakuhajika nyi Zambi . ³⁰ Muze Alone nyi A- Yizalele eswe amwene Mose , chikowa chaku meso jienyi chinatemuka , nawa yevwa woma wakumukundama . ³¹ Alyoze Mose yatambika eswe , nyi Alone nyi myiata eswe akuchikungulwila yeza kuli iye . Mose yahajika nwo . ³² Kulutwe lya chino , atu eswe jia A - Yizalele yeza kuli Mose , nawa ya lweza shimbi jieswe Yehova wamuhele ha mulundu wa Shinai . ³³ Muze Mose hahwisa kuhajika nwo , yalifuka nyi wanda kumeso jienyi . ³⁴ Alyoze muze Mose ajilile kumeso jia Yehova mukuhajika nenyi , yachiza wanda , ndo iye hatuhuka . Muze hatuhuka , yahajika nyi A - Yizalele yeswe yize hamwamba . ³⁵ Muze A- Yizalele amwene ha meso jia Mose hanatemuka , iye yalifuka nyi wanda hameso nawa ndo muze wahilukile nyi kujila nyiku hajika nyi Yehova .