¹ Alyoze Yehova ymaba kuli Mose, ngwenyi " Yako kukatuka kuno, yena nyi atu waze wachijile kuchifuchi cha Engitu. Yako ku chifuchi chize nali shingile nyi shingo kuli Apalahama, nyi Yisaka, nyi Yakomba, muze nambile ngwami, ' ² Mungukachihna kuli munyachi we.' Mungukatuma mungelo kumeso je, nyi kuhuma mu chifuchi A-Kanana, A-Amole, A-Hete, A-Pelize, A-Hevwe, nyi A-Yepushe. ³ Yako ku chifuchi chize, kuze ku nokela yamwa nyi uchi, mumu yami mwene chichi kakanduka hamwe nyi yenu, mumu yenu nuli akwa- pami. Kuchina yami mungukanwonwona mujila. " ⁴ Mba muze atu evwile wano lusango yono mupi, yalishimwoka, nawa nyiumwe yoze wazalille yuma yenyi ya uhengi. ⁵ Yehova wambile kuli Mose , " Ambulwila A- Yizalele ngwe, 'Nuli akwa- pami. Nyi nakandukile nenu hashimbu likepe, kachi mungukanwonwona lume. Keshika, chizenu yuma yenu ya uhenge hanga ngunyingike chize mungu linga nyi yenu. "' ⁶ Halyapwila A-Yizalele ka azalile yuma yo ya uhengi kukatuka kumulundu wa Holepu nyi ku lutwe. ⁷ Mose watwalile mbalaka nyi kuijika haze lya chilombo, kusuku nyi chilombo. Yailuka ngwenyi mbalaka ya chikungulwila. Mweswawo wafupile Yehova yatuhuka nyi kuya ku mbalaka ya chikungulwila, haze lya chilombo. ⁸ Muze Mose atuhukile nyi kuya ku ye mbalaka, atu eswe yakatuka nyi kumana kuchikolo cha mbalaka nyi kutala Mose ndo manjila mukachi. ⁹ Shimbu lyeswe muze hanjila mu mbalaka, nguji lya lelwa lyahulumukine hashi nyi kumana kuchikolo cha mbalaka, nyi Yehova wahanjikile nyi Mose. ¹⁰ Halyapwila muze atu eswe amwene lye nguji lya lelwa linamane kuchikolo cha mbalaka, atu eswe yakatuka nyi kuwayila, mutu mweswe kuchikolo cha mbalaka yenyi. ¹¹ Yehova wahanjikile nyi Mose nyi meso ngwe mutu mahanjika nyi kasendo kenyi mba yahiluka ku chilombo, alyoze kavumbi kenyi Yoshua mwna wa Nune, aye te mukweze, watwamine mu mbalaka. ¹² Mose yamba kuli Yehova, " Tala, wakwamba kuli yami ngwe, 'Twala wano atu muwenyi wo, ' alyoze kuwangu lwezele yoze mutu maya nyi yami. Wamba ngwe, ' Wangunyingika ha jina, nawa hiunawane vumbi kumeso jami.' ¹³ Halyapwila keshika nawana vumbi kumeso je, ngulweze jila je hanga ngukakunyingike nyi kunyongonona hakuwana vumbi kumeso je. Nyonga ngwe vungu lino atu je. " ¹⁴ Yehova yakumbulula ngwenyi , " Yami Mwene munguya hamwe nyi yena, mba mungu ka kwaha uhwimino. " ¹⁵ Mose yamba kuli Iye, " Nyi yena kuuchi kuya hamwe nyi yetu, kanda utuchiza kuno tutwale kulutwe. ¹⁶ Hachuma chikwo, kuchi machinyingika ngwo hinawana vumbi ku meso jenu, yami nyi atu jenu? Te kuchapwile hachuma chino nyi muya nyi yetu hamwe mba yami nyi atu je akuhandunuka ku fuma ku atu eswe ali hali ha chifuchi? " ¹⁷ Yehova yamba kuli Mose, " Mungu linga nawa chino chize wangwamba, mumu hiwawana vumbi kumeso jami, nawa ngunakunyingika ha jina lye. " ¹⁸ Mose yamba, " Ngunakulembe kama ngusolwele uhenya we. " ¹⁹ Yehova yamba , "Mungupalikisa upeme wami weswe kumeso je, nawa mungu ngwambulula jina lyami ' Yehova ' kumeso je. Mungukapwa mukwa vumbi kuli mweswawo, mungukavwila keke kuli mweswawo mungukamulweza iye keke. " ²⁰ Mba Yehova, " Kuchi kahasa kumona ha meso jami, mumu nyi wangumona ku uchi kutwama nyi mwono. " ²¹ Yehova yamba, " Tala, kuno kuli yami chihela chiliko; ukamaneho haliwe. ²² Mba shimbu uhenya wami unachipalika, mungu kukusa mu pako ya liwe nyi kukujingilika nyi kwoko lyami ndo hinapalika. ²³ Mba munguchiza kwoko lyami, nawa ukatale nyima yami alyozemeso jami kechi kasoloka. "