¹ Ukakundame kuli yena yayenu Alone nyi ana jenyi a malunga hamwe nenyi - kwachiza kuli A- yizalele hanga ayo akangulingile usasendote - nyi Nandambe , nyi Ambihu , nyi Elieza , nyi Itama . ² Ukatongele yayenu Alone , mazalo asandu . Akapwe a ulemu nyi upeme kuli yiye . ³ Ukahanjike nyi atu eswe akwete mana , waze hinazalisa nyui spilitu ya mana mumbunge , akatonge mazalo a Alone akamusele ku usandu hanga iye akangulingile milimo ya usasendote . ⁴ Mazalo matonga wano nyi chipwiko , nyi efode , nyi hina lya ngugu , nyi chikuto cha milimo ya kwola ya uhennya , nyi chitambala nyi muya wa ponda . Akatongele yayenu Alone nyi ana jenyi amalunga mazalo asandu hanga iye akangulingile usasendote . ⁵ A chilangaji akazachisa hina litoma lya Oru , lilauluka , a ufungo , nyi a ngengu . ⁶ A kalinge ye efode ya Oru , ya hina lilauluka , nyi lya ufungo , nyi lya ngengu , nyi lipema litoma . Chikapwe chitanga cha chilangaji . ⁷ Yikapwe ya yipaya yali ya kutokekenya ku masongo jo aali . ⁸ Muya wa ponda wa ulanji ukapwe ngwe efonde ; ukapwe wa chihanda chimwiwuka nyi efonde , ikalitunge nyi hina lipema itoma lya Oru , lilauluka , nyi lya ufungo , nyi lya ngengu . ⁹ Ukande nawa mawe aali a sardonica nawa ukoleho majina ja ana A - Yizalele . ¹⁰ Majina ja asambano akapwe ha liwe limuwika , mba majina ja asambano alisalako akapwe ha liwe likwo , nikulita nyi kusemuka cho . ¹¹ Ukole e mawe aali nyi kulita nyi milimo ya mukwa kwola muliwe ngwe mola ha kazeya , nyi majina ja ana A - Yizalele . Ukajise mu maselo ja oru . ¹² Ukunangike e mawe aali ha yipaya ya ye efode , akapwe mawe a kwiulula Yehova ha ana ja A - Yizalele . Alone akambate majina jo kumeso ja Yehova ha yipaya yenyi yiali akapwe chiulwiso kuli yiye . ¹³ Ukafule maselo ja oru . ¹⁴ Ukafule nawa malenge aali a oru ya kusayisa nyikwafula ngwe moihipu , ukanunge e malenge a kuhosa ha maselo . ¹⁵ Ukalinge chipwiko cha upatwilo , chitanga cha chilangaji , ukachilinge chakulifwa nyi ku efode . Cha oru , nyi cha hina lilauluka , nyi lya ufungo , nyi lya ngengu nyi lipema litoma . ¹⁶ Chikapwe nyi ukundwilo uwana weswe wa usuhe umuwika ndwa . Cha kupama kaali utohe wacho wa chikambakamba chimuhika . ¹⁷ Ukajise mawe mu hituwa yacho mikala yiwana ya mawe . Mukala utangu wa mawe a sartiu , topasiu , nyi carbunkulu . ¹⁸ Mukala wachali wa esneralda , nyi safwira , nyi diamante . ¹⁹ Mukala wa muchitatu wa jasendu , nyi agata , nyi ametita . ²⁰ Mukala wa muchiwana wa turkeza , nyi sardonica , nyi jasepe . Ukaasele mu maselo jo ya oru . ²¹ E mawe akalite nyi majina ja ana a Yizalele . Kumi lya mawe nyi mawe aali nyikulita nyi majina jo , ngwe kwola cha ha kazeya , vungu nyi vungu nyikulita nyi jina lialio akapwe a mavungu kumi nyi aali . ²² Ukafulile ha chipwiko malenge aali a oru ya kusayisa , ngwe mihipu ya kuhosa . ²³ Ukafulile chipwiko ngo jiali ja oru nyikujisela ku masongo aali a chipwiko . ²⁴ Ukajise malenge aali a oru a kuhosa mu ngo jiali jize jatwama ku masongo aali a chipwiko . ²⁵ Masongo aali akwo amalenge aali a kuhosa ukanji mu maselo aali . Mba hikwasa kuse kulutwe ha yipaya yiali ya ye efode . ²⁶ Ukafule ngo jiali ja oru , ukajisele ku masongo aali a chipwiko , ha ukundwilo wacho wa muchima . ²⁷ Ukafule nawa ngo jiali ja oru , mba hikujisa kulutwe ha chihanda chezi cha kushi cha yipaya yali ya ya efode , kusulangana nyi unungino wayo helu lia we muya wa ponda wa ulangaji wa efode . ²⁸ Akakashile che chipwiko ku ngo jacho nyi ku ngo ja efode nyi wanda ulauluka , hanga chikapwe ha muya ponda wa ulangaji wa ku efode . Hanga chikapwe kuchichi kukasuluka ku ye efode . ²⁹ Muze Alone manjila muma musandu , akambate majina ja aan amalunga A - Yizalele ha chipwiko cha ha mbunge yenyi ya upatwilo , yikapwe chiulwiso cha matangwa eswe kuli Yehova . ³⁰ Ukase nawa mu chipwiko cha upatwilo Urimi nyi Tumimi , yikapwe hambunge ya Alone muze manjila kumeso ja Yehova . Alone akambate ha mbunge yenyi upatwilo wa A -Yizalele kumeso ja Yehova matangwa eswe . ³¹ Ukatonge hina lya ngu ngu lya efode lieswe lukombo lilauluka . ³² Likapwe nyi chituwa cha mutwe mukachi . Likapwe nyi lupula wa kuseleka wa kujinguluka che chituwa chalio ngwe chituwa cha kuchikuto cha utale hanga kulichi katanuka . Ukapwe mulimo wa mukwa kunuka . ³³ Ha lupula uli ku songo lialio , ukatongeleho romana jilauluka nyi ja ufungo , nyi ja ngengu kujinguluka . Ja kusowela nyi yiwolowolo ya oru ha kujimgilika lupula mweswe . ³⁴ Kukapwe chiwolowolocha oru nyi romana , chiwolowolo cha oru nyi romana - ha lupula wa hina lia ngungu - ha kujingilika kweswe . ³⁵ Mba Alone akalizale ha kuvumbika , hanga liji lyacho mulikahiohia muze manjila muma musandu kumeso ja Yehova nyi muze matuhuka . kuchina iye mafwa . ³⁶ Ukafule chepenya cha oru ya kusuyisa , ukoleho ngwe kwole cha ha kazeya ngwo , " musandu kuli Yehova ." ³⁷ Ukachilamike ha kapwa nyi wanda ulauluka chipwe kulutwe lya mwe kapusa . ³⁸ Chikapwe ha huma lia Alone ; shimbu yeswe akambate uhenya wuze muwupwa kumulambu wa yawana yisandu yize A - Yizalele makaisela ku usandu kuli Yehova yisandu . Chakapwe ha huma lienyi matangwa eswe hanga Yehova akatambule yawana yo . ³⁹ Ukatonge chikuto cha hina lipema litoma , ukatonge nawa kapusa nyi hina lipema litoma . Ukatonge muya wa ponda , milimo ya mukwa kwola . ⁴⁰ Ukatongele ana a malunga a Alone yikuto , ukatongele nawa miya ya ponda , nyi tupusa a ulemu nyi upeme . ⁴¹ Ukajikeho yayenu Alone yayenu nyi ana jenyi a malunga . Ukawaahise nyi maji , ukaasele ku uvumbiko , ukaasele usandu kuli yami hanga ukangulingile usasendote . ⁴² Ukatongele kaputula wa hina lipema litoma akafuke nenyi uselesele wa mijimba yo , yize muyikafuka chize ku mitanda akahete ndo ku shina lya kulu . ⁴³ Alone nyi ana jenyi a malunga akamuzale muze majila mu mbalaka ya chikungulwila hanji muze makungama ku chilumbilo muma musandu . Akalinge chino hanga kanda apwa akwa milonga neka makafwa . Chino chiyulo chikapwe cha myaka ya mutolo kuli Alone nyi ana yenyi .