¹ Mose yakungulula mbunga ya A-Yizalele yamba kuli ayo ngwenyi , " Yino ye yuma ize Yehova hamba hanga nukailinge . ² Hamatangwa asambano nuka linge milimo , alyoze kuli yenu , tangwa lyamuchishimbyali mulikapwa lisandu , sambata tangwa lya kuhwima , lisandu kuli Yehova . Mweswawo makalinga mulimo hatangwa lize nuka mushihe . ³ Kanda nukawika kahya nyikamwe muma zuwo jenu hatangwa lya sambata . " ⁴ Mose yahanjika ku mbunga jeswe ya A-Yizalele , ngwenyi , " Che chuma chino Yehova hamba . ⁵ Hana mulambu kuli Yehova , mweswawo uli nyi mbunge ya yakuta . A kanehe we mulambu kuli Yehova wa olu , palata , unengu , ⁶ nyi mahina alauluka , ufungo , nyi angengu , nyi linyu lipema ; nyi uzangi wa pembe ; ⁷ nyi malambu a kuji a mapanga a kulomba achila nyi malambu a yipanyundu ; nyi mitondo ya mukesha ; ⁸ maji a ndeya , tumbuto twa lupembo mupema twa maji a kuwahisa no twa isensu , ⁹ mawe a sandunyika nyi mawe akwo akalamike efonde nyi ha chipwiko . ¹⁰ Chilangaji mweswe mukwa mbunge ya mana eze akalinge yeswe ize Yehova hamba - ¹¹ Ye tambanakulu nyi mbalaka yayo , chifuko chayo , nyi sepe jayo , manguji jayo , nyi yimanyino yayo ; ¹² nyi mushete nyi mikambo yawo , nyi chifukilo cha ukukilo , nyi hina lyachikalakala . ¹³ Yaneha mesa nyi mikambo yayo , hamuwika nyi yikishi yayo yeswe , nyi mbolo ja kutumbyeka ; ¹⁴ nyi chikwachilo cha ndeya yakuhana pangu , nyi yikashi yacho , nyi ndeya jacho , nyi maji a ndeya . ¹⁵ Chilumbilo cha insensu nyi mikambo yacho nyi maji a kuwayisa no nyi insensu ; ya lupembo mupema nyi hina lya kufuka ku chikolo cha tambanakulu ; ¹⁶ nyi chilumbilo cha milambu yakulumba hamuwika nyi sambu jacho ja unengu ; nyi mikambo yacho , nyi yikishi yeswe yacho nyi lumbashiya lwakusanyina nyi nganda yalwo . ¹⁷ Yaneha mahina ku chikolo cha mbalaka nyi manguji nyi yimanyino , nyi mahina a kufuka ku chikolo ; ¹⁸ nyi mbambo ja ku tambanakulu nyi chipango hamuwika nyi mihipu ya jo . ¹⁹ Yaneha nyi yizalo yakutonga nyi langaji wa ku zachila no mu fwashi yisandu , yizalo yisandu ya Alone sasendote nyi ana jenyi a malunga , nyi ayo akazate ngwe asasendote ." ²⁰ Minyachi yeswe ya Izalele yakatuka kumeso ja Mose . ²¹ Mba mutu mweswe yoze mbunge yenyi yazangile Shipilitu yenyi yatayijile yaya nawa yatwala mulambu kuli Yehova yikapwe ya milimo ya ku mbalaka , yeswe yivumbiko yayo yeswe , nyi yizalilo yayo yisandu . ²² Yeza eswe ali lunga nyi pwo , eswe apwile nyi mbunge ja kutaa. Yaneha mikosa , yingelengele , tuzeya , nyi yijingo , nyi upite weswe wa olu . Ayo eswe yaneha milambu ya olu kuli Yehova . ²³ Mutu mweswe wapwile nyi mahina alauluka , a ufungo , chipwe ngengu , lingu lipepema , uzangi wa pembe , malambu a pangungu wa kuji a kulomba achila , chipwe malambu a yipanyundu yatwala . ²⁴ Mutu mweswe yoze walambwile mulambuwa palata chipwewa unengu watwalile mulambu wa Yehova , nawa mutu mweswe wapwile nyi mitondo ya mukesha wayitwalile yikapwe yamilimo yeswayo . ²⁵ Mapwo eswe a mbunge ja mana ya tunga nyi mokwo jo nyi ku twala yize atunga te mahina alauluka , a ufungo , chipwe angengu , chipwe a linyu lipema . ²⁶ Mapwo eswe waze mbunge jo jazangile nyi japwile nyi mana a tungile uzangi wa pembe . ²⁷ Makulwana yatwala mawe a sandonyika nyi mawe akwo aka lamike ha efonde nyi ha chipwiko ; ²⁸ yaneha mbuto ya lupembo mupema nyi maji a ndeya , nyi maji akuliwayisa nwo , nyi a insensu ya lupembo mupema . ²⁹ A-Yizalele yatwala mulambu , kuli Yehova ; lunga mweswe nyi pwo mweswe mbunge jo jatayile mukutwala milimo yeswe yize ambile Yehova akayilinge kupalikila muli Mose . ³⁰ Mose wambile kuli A-Yizalele ngwenyi , " Talenu Yehova hanatambika ha jina lyenyi Mbezalele mwana wa Uli mwana wa Hule , kumunyachi wa Yunda . ³¹ Aye hazalisa Mbezalele nyi Shipilitu wakumwaha mana , malinjekela , nyi yinyingi , wa ulangaji weka nyi weka . ³² Mukutomba milimo ya ulangaji nyi milimo ya olu , nyi palata , nyi ya unengu ; ³³ nyi kuteta nyi mawe akunjisa mu yituwa yamitondo - mukulunga milimo yeswe yaulangaji walihichika . ³⁴ Aye hayisa mumbunge yenyi akalongese , eswe ali Aholyambe mwana wa Ahisamake wa ku vungu lya Ndane . ³⁵ Hanazalisa wano nyi mana eswe akulinga milimo yeswe , ku zata nyi ulangaji , ngwe mukwakola hamawe , nyi wachilangaji wakwola hamawe alauluka , nyi aufungo , nyi angengu nyi a linyu lipema , nyi mukwa kuseleka . Apwile akwa ulangaji mwishinganyeka yamilimo , nyi akwa kutomba milimo .