¹ Mba Yehova yamba kuli Mose ngwenyi , " Hindu kuli chilungo chimuwika chize mukaneha hali Falau nyi Engitu . Mba halutwe , yiye kumanwecha nuka katuke ku chifuchi . Muze yiye makanwecha kuya pundu , kumanuhumamo lyakulu . ² Hanjika nyi atu ngwo mweswe lunga nyi pwo akete mwenyembo wenyi yoze walihata nenyi yikwata ya palata nyi oru . ³ Mba Yehova yalinga atu A - Engitu kupema nyi vumbi kumeso ja A - Yizalele . Chikwo nawa , mwe lunga Mose yapwa mutu munene chikolo ku meso ja ngamba ja Falau nyi atu a mu Engitu . ⁴ Mose yamba , " Yehova kamba chino : ' Ha muchima ufuku mungukapalika mukachi ka chifuchi cha Engitu . ⁵ Eswe tupula majimo mu chifuchi cha a Engitu kumakafwa , chize kapula majimo wa Falau , yoze watwama ha chitwamo cha wanangana wenyi , ndo kuli kapula majimo wa ndungo wa pwo wa kutwa wunga , nyi kuli eswe tupula majimo twa yimuna . ⁶ Kumukukapwa muteto unene ndusu muchifuchi cheswe cha Engitu , chize kanda chilingiwaho chipwe kuchichikalingiwaho . ⁷ Alyoze chipwe kawa kechi kakenanyina nyi umwe mutu wa kuli A - Yizalele , kechikakenanyina mutu chipwe kashitu . Mujila yino hanga nukanyingike ngwenu hingunahandununa A - Engitu nyi A - Yizalele .' ⁸ Eswe wano ngamba je , Falau , kumaka palumuka kuli yami nyi ku fukama kuli yami . Makamba ngwo , 'Katukenu , yenu eswe nyi atu waze akukuwahila ! ' mba kulutwe lya yino kumungukakatuka ." Mba yiye yakatuka kuli Falau nyi wutenu wunji . ⁹ Yehova yamba kuli Mose , " Falau kechi kevwa kuli yena . Ha chino chocho mukalinga yuma yakumwesa muchifuchi cha Engitu . " ¹⁰ Mose nyi Alone alingile yeswe yino yikomokeso kumeso ja Falau . Alyoze Yehova yakalisa mbunge ya Falau ,' nyi Falau kakechele A - Yizalele akatuke ku chifuchi chenyi .