¹ Yehova yamba kuli Mose ngwenyi , " Yako kuli Falau , mumu hina kalisa mbunge yenyi nyi mbunge ja ngamba jenyi . Hinalinga chino mukusolola yini yilayi ya tachi hakachi ko . ² Nalinga chino hanga nukalweze ana nyi a jikulu jenu yuma yize nalinga , chize nalinga A-Engitu nyi wutenu , ngwe chize nahele yilayi yalihichika ya tachi jami hakachi ko . Muchino nukanyingike ngwenu yami Yehova . " ³ Chocho Mose nyi Alone ayile kuli Falau nyi kwamba kuli yiye , " Yehova , Zambi ya A-Hepeleu , kanambe chino : ' Ndo kangahi kuusolo kulilelesa ku meso jami ? Echa atu jami aye hanga aka nguwayile . ⁴ Alyoze nyi kusolo kwecha atu jami aye, panjikenu , hamene mungukaneha makumbi mu chifuchi che . ⁵ Kumakafuka helu lyahashi heswe hanga nyiumwe makahasa kumona hashi . Yize yasalileko ku chiwe kumakailya nyi mitondo yenu yeswe yakusoka mu yambu . ⁶ Mazuwo jenu kumakazala too , waze a ngamba jenu eswe , nyi waze eswe akwa Engitu - yuma yimwe yize atatenu hanji akakenu kanda achimona , nichimwe amwehe kutangwa lize apwile hashi ndo tangwa lya musono . "' Mba Mose yatewuluka nyi kukatuka kuli Falau . ⁷ Ngamba ja Falau ambile kuli yiye ngwo , " Ndo kangahi yono lunga mapwa kambwila kuli yetu ? Echa A-Yizalele aye hanga aka wayilile Yehova Zambi yo . Kanda uchiwuluka ngwo Engitu ha nayenyeka nyi ? " ⁸ Mose nyi Alone ahetesele cheka ngwenyi , " Yenu nukamu wayile Yehova Zambi yenu . Mba atu aka maya ? " ⁹ Mose yamba ngwenyi , " Etu kumutuya nyi twanuke jetu nyi makulwana jetu , nyi ana jetu a malunga nyi ana jetu a mapwo . Mutuya no , mumu chatutamba kulingila Yehova chiwanyino . " ¹⁰ Falau yamba kuli ayo ngwenyi , " Yehova apwe nyi yenu, nyi mungwiza kanwecha kuya hamwe nyi twanuke jenu kuya . Tala , munuli nyi shinginyeka yimwe yipi . ¹¹ Hi chocho ko ! yenu amalunga lume hakachi kenu , nukamuwayile Yehova , mumu chocho nunafupu . " Mba Mose nyi Alone yahuma kumeso ja Falau . ' ¹² Yehova yamba kuli Mose ngwenyi , " Olola kwoko lye ha chifuchi cha Engitu ukanehe makumbi , akakanduke ha chifuchi cha Engitu akalye yeswe yakusoka mu chifuchi , yeswe yize yasalileko ku chiwe . " ¹³ Mose yazundula mulumbu wenyi ha chifuchi cha Engitu , nyi Yehova yatuma fuji yimwe yaku chivumbiko ha chifuchi tanga lize lyweswe nyi ufuku uze weswe . Mba muze kwapwile chimene , ye fuji ya ku chivumbiko yanehene makumbi . ¹⁴ E makumbi akandukile ha chifuchi cheswe yapwile ha njiza jeswe ja Engitu . Chipwe kunyima kukwapwile mazaji anene chikolo ngwe waze mu chifuchi , chipwe kulutwe kuchi keza kapwa ngwe waze . ¹⁵ Mumu afukile hashi heswe chocho chifuchi yichilaa pwi . O alile yeswe ya kusoka mu yambu nyi mihuko ya mitondo yize yalisalileho ku chiwe . Ndusu muchifuchi cha Engitu nyichimwe chuma chawisu cha chasalile chipwe mutondo chipwe cha kusoka mu yambu . ¹⁶ Mba Falau yasanyika nyi kapupushi Mose nyi Alone yamba ngwenyi , " Hinavulumuna Yehova Zambi yenu hawa hinavulumuna nyi yenu . ¹⁷ Halyapwila keshika, nukonekene mulonga wami shimbu yino , liumbenu kuli Yehova Zambi yenu akanguchize kufwa chino . " ¹⁸ Mose yakatukakuli Falauyaliwumba kuli Yehova . ¹⁹ Yehova yatuma fuji yimwe ya tachi jinene ya ku chitokelo yanda makumbi ya ambila mu kalunga - lwiji muchila ; kukwasalile chipwe kumbi umuwika mu njiza jeswe ja Engitu . ²⁰ Alyoze Yehova wakalishile mbunge ya Falau , nyi Falau kechele A-Yizalele kuya . ²¹ Yehova yamba kuli Mose ngwenyi , " Olola kwoko lye kwilu , hanga kukapwe milima kweswe ku chifuchi cha Engitu , akapapate mu milima . " ²² Mose yolola kwoko lyenyi kwilu , mba mwapwile milima pwi lume ha matangwa atatu mu chifuchi cha Engitu cheswe . ²³ Nyiumwe wahashile kulimona nyi mukwo ; nyiumwe wakatukile haze ha matangwa atatu . Keshika , A-Yizalele eswe apwile nyi pangu mu yihela yo . ²⁴ Falau yasanyika Mose ngwenyi , " Yenu nuwayile Yehova . Chipwe yisemuka yenu mahasa kuya nyi yenu , alyoze matanga jenu nyi yimuna jenu akasale . " ²⁵ Alyoze Mose yamba ngwenyi , " chanutamba kutwaha milambu ya kulumba hanaga tukahane kuli Yehova Zambi yetu . ²⁶ Ngombe jetu kumaya hamuwika nyi yetu : nyiumwe lusende wo makasala , mumu chatutamba kwatwala tuka muwayile no Yehova Zambi yetu . Mumu kutwanyingikine chize mutuka muwayila nacho Yehova ndo hitwaheta . " ²⁷ Alyoze Yehova wakalishile mbunge ya Falau , ka echele kuya . ²⁸ Falau yamba kuli Mose ngwenyi , " Katuka kuli yami ! ukanyame ha chuma chimuwika , kanda umona yami cheka , mumu tangwa lize mumona meso jami , kumukafwa . " ²⁹ Mose yamba ngwenyi , " Hiwahanjika yena mwene , chichi kamona meso je nawa . "