¹ Yehova yamba kuli Mose nyi Alone mu chifuchi cha Engitu. Yiye yamba ngwenyi, ² " Kuli yena , kakweji yono mapwa kakweji wa kuputuka , kakweji mutangu wa mwaka kuli yenu. ³ Hanjika nyi mbunga ya A-Yizalele ngwe , ' Ha tangwa lyamuchikumi lya yono kakweji lunga mweswe akalyanjile mwana- panga chipwe mwana- pembe ene, chisemuka cheswe akulinga chino , mwana- panga ha jiko nyi jiko. ⁴ Nyi akwa jiko mapwa akehe naye ha mwana- panga, mba linga nyi mwenyembo wenyi yoze walihata nyi zuwo lyenyi akatambule mwana - panga chipwe yifo ya pembe mukehe nikulita nyi kwalula cha atu. Nukeseke nikulita chize mutu ha mutu malya, chocho chatamba ayo kutambula yifo ya kulita kulisa eswe. ⁵ Mwana - panga wenu chipwe pembe - mukehe akapwe keshi chipa, musamba wa pembe wa mwaka umuwika . Nukamuchize ku mapanga chipwe ku pembe . ⁶ Nukamukuchike ndo tangwa kumi nyi lyamuchiwana lya kakweji yoze mwene . Mba chikungulwila cheswe cha A- Yizalele akamushihe ha chingoloshi. ⁷ Nukachize amwe manyinga nyi kusa ha yipamba yali ya yikolo nyi ha chikuli cha helu ku mazuwo muze makayilila yifwo. ⁸ Nukalye yifwo uze ufuku, muze hinwa yocha ha kahya. Nukalye hamwe nyi mbolo kuyishi futunwiso, hamwe nyi yilima -lima yisasu. ⁹ Kanda nukayilya ya wisu chipwe ya kuteleka mu meya. Shina, kwocha ha kahya hamwe nyi mutwe wenyi nyi yilyato yenyi nyi yingambyangambya yenyi ya muchima . ¹⁰ Kanda nukahichikako yifwo nyiyimwe ndo kuchimenemene. Nukwoche yize muyikasalaho mu chimene. ¹¹ Achino chechize nunatela kuyilya : nyi miya yenu ya kulijichika, nikuzala haku jenu kuyilyato, nyi milumbu yenu mu moko jenu. Nukamulye hi kapupushi. Che chizomboka cha Yehova. ¹² Yehova kanambe chino: mungupalika ndusu chifuchi cha Engitu mu ufuku mukulamba eswe tupulamajimo kuliatu nyi tushitu muchifuchi cha Engitu . Mungu patwila tuzambi tweswe twa Engitu . Yami Yehova. ¹³ Manyinga kumakapwa chilayi ha mazuwo jenu ha kwiza chami kuli yenu. Muze mungukamona manyinga , mungunuzomboka muze mungukalamba chifuchi cha Engitu. Chilungo chino kuchichi keza hali yenu nyi kunwenyeka. ¹⁴ Lino tangwa mu likapwa chiwulwiso kuli yenu, lyakufunga chiwanyino cha Yehova ; ndusu yisemuko yenu - nukafunge chiwanyino chikapwe shimbi ya mutolo. ¹⁵ Munukalya mbolo kuyishi futunwiso ha matangwa shimbyali . Ha tangwa litangwa munukachiza futunwiso kuma zuwo jenu. Mweswawo malya mbolo ya futunwiso chize ku tangwa litangu ndo ku tangwa lya muchishimbyali, yoze mutu akamutete hakachi ka Izalele. ¹⁶ Ha tangwa litangwa kumukapwa kulikungulula chisandu, nyi ha tangwa lyamuchishimbyali mukukapwa kukunguluka chisandu. Nawa kushi milimo muyikalingiwa ha matangwa wano, shina kuteleka cha kulya cha eswe. Chize wika nukalinge. ¹⁷ Nukafunge chiwanyino cha mbolo kuyishi futunwiso mumu ku chapwile ha tangwa lino lize nachijile yizavu yenu ku chifuchi cha Engitu. Keshika nukafunge lino tangwa ni shimbi ya mutolo ndusu yisemuko yenu. ¹⁸ Nukalye mbolo kuyishi futunwiso ku chingoloshi ha tangwa kumi nyi lyamuchiwana mu kakweji mutangu wa mwaka ndo ku chingoloshi cha tangwa makumi aali nyi tangwa litangu lya mwe kakweji. ¹⁹ Ha matangwa wano shimbyali , kanda mu kapwa futunwiso nyiimwe mu mazuwo jenu. Mweswawo makalya mbolo ya futunwiso akamutete hakachi ka chikungulwila cha Yizalele, apwe njize, apwe mukwa chifuchi. ²⁰ Kanda nukalya nyichimwe chafutunwiso. Kweswako ku mazuwo jenu, nukalya mbolo kuyishi futunwiso. "' ²¹ Mba Mose yasanyika makulwana eswe a kuli A-Yizalele yamba kuli ayo ngwenyi, " Yenu nukasakule misamba chipwe twana nikulita nyi majiko jenu nukashihe chitapo cha chizomboka. ²² Mba nukande chisapo cha hisope nukachichupike mu manyinga waze makapwa mu sahani. Nukasapwile manyinga ali mu sahani ha chikuli cha helu nyi ha yipamba yali ya ku yikolo. Nyiumwe mutu wa kuli yenu makatuhuka haze ku chikolo cha zuwo lyenyi ndo chimene. ²³ Mumu Yehova makapalika ndusu mukulamba A-Engitu. Muze makamona manyinga helu lya chikuli nyi ha yipamba yali ya kuchikolo , yiye kumakazomboka chikolo chenu kechi katayiza chononyi kunjila mu mazuwo jenu akanulambe. ²⁴ Nukafunge chino chuma . Chikapwe shimbi kuli yenu nyi kuli ana jenu ndo ku myaka ya mutolo. ²⁵ Mba kumuchikapwa muze hinwaheta ku chifuchi chize Yehova makanwaha , ngwe yiye hanalakenya kulinga, chanutamba kulinga uvumbiko uno wa ku wayila. ²⁶ Muze ana jenu makanuhulisa ngwo, ' Uvumbiko uno wa ku wayila kuchi unalumbunuka? ' ²⁷ Mba nukambe ngwenu, ' Chino che chitapo cha chizomboka ha mazuwo ja A- Yizalelemu chifuchi cha Engitu muze alambile A-Engitu. Yapulula mazuwo jetu. "' E atu yahetamisa mitwe nyi kuyawila Yehova. ²⁸ A - Yizalele yaya yalinga chocho ngwe chizechene Yehova hatuma Mose nyi Alone. ²⁹ Hichisoloka ha machima ufuku Yehova yalamba tupula- majimo eswe a mu chifuchi cha Engitu, chize kuli kapula jimo wa Falawu, watwama ha ngunja yenyi , ndo kuli kapula-jimo wa funge wapwile muzuwo lyaususu nyi tupula- majimo eswe a yimuna. ³⁰ Falawu yahinduka ha ufuku - yiye, nyi ngamba jenyi eswe , nyi A- Engitu eswe. Mwapwile miteto yinene mu Engitu, mumu kukwapwile zuwo nyilimwe kulishi mufu ka. ³¹ Falawu yatambika Mose nyi Alone ha ufuku ngwenyi, "Katukenu, nutuhuke ha kachi ka atu jami, yenu nyi A-Yizalele. Yenu, nukawayile Yehova, ngwe hinwamba nwazangile kulinga. ³² Mbatenu yimuna jenu nyi ngombe jenu, ngwe chize hinwamba, nyi kuya, nunguwahise nyi yami nawa." ³³ A-Engitu ashinjilile atu yaapupwisa kukatuka mu chifuchi, mumu ambile ngwo, " Kumutufwa yetu eswe. " ³⁴ Chocho atu ambachile wunga wo wa mbolo kuwushi kusa ufutunwiso . Mboke jo ja kuchikulamo te hajikasa nyi mahina jo ha yipaya yo. ³⁵ Halyapwila atu a Yizalele alingile nyikulita nyi liji lya Mose. Yeta kuli A-Engitu upite wa palata, nyi upite wa olu, nyi mazalo. ³⁶ Yehova yapwisa A-Engitu kupemena A-Yizalele nyi vumbi. Chocho A-Engitu yahana yize aechile . Mujila yino, A-Yizalele yapupa A-Engitu. ³⁷ A-Yizalele yaya nyi wenyi wo nikwenda hashi chize ku Lameses ndo ku sukote. Kafwa te apwile ngwe makulakaji asambano a tununu a malunga hashi, mba kuwezaho nyi mapwo nyi ana. ³⁸ Nyi mbunga yakulichinga yakandukile hamwe no, hamuwika nyi yimuna nyi ngombe, nikwalula cha yimuna anji chikolo. ³⁹ O yocha mbolo kuyishi futunwiso ya ku wunga uze akatukile nawo ku Engitu. Ku yakapwile nyi futunwiso mumu te yaahuma ku Engitu kahashile kulaluka chipwe kululika kulya ka. ⁴⁰ A-Yizalele atwamine mu Engitu ha myaka makulakaji awana a myaka nyi makumi atatu a myaka. ⁴¹ Mba hakuhwa makulakaji awana a myaka nyi makumi atatu a myaka, ha tangwa lize lyene, yizavu yeswe ya Yehova yakatuka chifuchi mu chifuchi cha Engitu. ⁴² Uno ufuku wapwile ufuku wa kufunga meso, mumu wa Yehova ha kwachiza mu chifuchi cha Engitu. Uno ufuku wa Yehova akaufunge chikolo kuli A-Yizalele eswe ndusu yisemuko ya atu jo. ⁴³ Yehova yamba kuli Mose nyi Alone ngwenyi, " Yino ye shimbi ya chizomboka : Nyiumwe kandaka kanda akalyako. ⁴⁴ Alyoze, ngamba mweswe wa Yizalele, wa kulanda nyi mbongo, akalyeko muze hinwapwisa ngalami. ⁴⁵ Tunjize nyi akwa milimo a kufweta kanda akalyako cheswacho. ⁴⁶ Nukachilile ku zuwo limuwika. Kanda mbata nyi yimwe yifwo yacho haze lya zuwo, chipwe kanda nukamakuna chifwaha chacho nyichimwe. ⁴⁷ Eswe akwa chikungulwila A- Yizalele akachilinge. ⁴⁸ Muze kanjize matwama nyi yenu nyi mafupa kufunga che chizombo cha Yehova, Usoko jenyi a malunga eswe akaapwise ngalami mba akakundame akachifunge. Mba o kumakapwisa ngwe akwa chifuchi. Alyoze, chilima nyiumwe kanda akalyako cheswacho kulya. ⁴⁹ Yino shimbi yimuwika yikapwe hali mukwa chifuchi nyi hali kanjize watwama hakachi kenu. " ⁵⁰ Chocho eswe A-Yizalele alingile chechene ngwe chize Yehova hatuma Mose nyi Alone. ⁵¹ Mba ha tangwalize lyene Yehova yachiza A-Yizalele mu chifuchi cha Engitu nikulita nyi yizavu yo.