¹ Chocho Mwene angumwesele. Tala, mutonga wa mihuko ya lwiza! ² Yamba ngwenyi, "Amose, yika yize unamono?" Nakumbulwile," Mutonga wa mihuko ya lwiza." Mba Yehova yamba kuli yami. " Songo hilyeza hali atu jami A-Yizalele; chichi kwapalika nawa. ³ Myaso ya ku tembele muyalumuka kulila mbimbi ha tangwa lize - chocho anambe Yehova - mijimba yinji ya afu, makayimbila kweswe! nyi kuhola" ⁴ Panjikenu ku chino, yenu nwa kulyata akwa kuhona nyi kuchiza yiswale mu chifuchi. ⁵ Ka kwamba ngwo, " Ka kweji mwaha hali masulila, hanga tukalanjise mbuto? Tangwa lya sambata ola yika muyipatuka, hanga tukalanjise tiliku? Mutu kehesa jongo nyi kuweza ku ndando, muze nyi kwonga mbalasa ja mahuza. ⁶ Chocho hanga tukalanjise tiliku yipi, nawa tukalande yiswale nyi pulata, nyi akwa kuhona nyi haku jaili ." ⁷ Yehova halishinga nyi ulemu wa Yakomba, "Pundu chichi kavulama yitanga yo nyiyimwe." ⁸ Te cchifuchi kuchichi ka chikima ha chikuma chino? Nyi yoze mweswe watwamamo kechi kalishimwoka? Cheswe muchizunduka ngwe lwiji wa Nilo, nyi kupindangana nyi ku kuhuwa, ngwe lwiji wa Engitu. ⁹ Muchikapwa chocho mu tangwa lize - chocho anambe Mwene Yehova - mungu kanjisa tangwa ha tangwa ha muchima, mba mungu kaneha milima hachifuchi ha ola ya mwalwa. ¹⁰ Mungukalumuna yiwanyino yenu mu kulishimwoka nyi myaso yenu yeswe nyi kulila lungungu. Munngu kajika mijimba yeswe nyi yikeleyi mungu kasa lwole ha mitwe yeswe. Munguchipwisa kupwa ngwe kulila hali mwana wa lunga wa wika, songo lyacho mulipwa tangwa lisasu. ¹¹ Tala, matangwa kaneza - chocho anambe Mwene Yehova - muze mungutuma kapunga muchifuchi, hi kapunga ka mbolo ko, hanji pwila ya meya, alyoze ha kwivwa liji lya Yehova. ¹² Kumakendangana chize ku mbaka ndo ku mbaka; kumakazomboka chize ku note ndo ku chivumbuko nyi kufupa liji lya Yehova, alyoze kechi kaliwana. ¹³ Ha tangwa lize mapwo apema waze kanda achinyingika malunga nyi akweze makalezumuka nyi pwila. ¹⁴ Waze akulishinga nyi shili ya Samaliya nyi kwamba ngwo, 'Ni mwono wa zambi ye, Ndani,' nawa , 'Ni mwono wa jila ya Mbyashipa,' o kumakalimbuka kechi kahinduka nawa."