¹ Namwene Mwene kanamane hakamwihi nyi chilumbilo, mba yamba ngwenyi, "Lamba manguji ha masongo ndo yikuli muyichikima. Ukayifwenye ha mitwe ya atu eswe, mba mungu kashiha nyi katana yoze masalaho. Nyiumwe kechi ka china; nyiumwe makaha kuomboka. ² Chipwe mafula ndo ku Shiole, hindu kwoko lyami mulikachizako. Chipwe makanduka mwilu, hindu mungwa hulumunamo. ³ Chipwe maswama helu lya Kamela, mungukafupa haze nyi kuwakwata. Chipwe manguswamina mu mashima a kalunga lwiji, Mungukatuma kapela, mba makasuma. ⁴ Chipwe maya ufunge, kanawambata nyi kuwatetekela kuli akwa kole jo, kwenako mungukatuma katana, mba ma kashiha. Mungwahulikila meso jami kwalinga chipi hi chipema ko." ⁵ Mwene Yehova wa Tujita iye ka kukwata chifuchi mba muchisangunuka; waze eswe atwamamo malishimwoka; eswe kuma kamana ngwe lwiji, nyi kuhuwa nawa ngwe lwiji wa Engitu. ⁶ Iye yoze wakutunga yipatwilo yenyi ya kwilu mu malilu, nyi kusa kuzazuluka chenyi helu lya hashi. Yoze wakusanyika meya a kalunga lwiji, nyi kwazukwila ha mavu, Jina lyenyi iye Yehova. ⁷ "Yenu atu a Yizalele kunwapwile ngwe akwa Kushi chocho anambe Yehova - Te chachijile atu A-Yizalele ku chifuchi cha Ingitu, akwa Filisitiya ku kafetole, nyi akwa Seila ku Kiri? ⁸ Talenu, meso ja Mwene Yehova kana lihulikila ha wanangana wa shili, mba mungukachonwona he ha mavu, kuchizako munyachi wa Yakomba wika - chocho anambe Yehova. ⁹ Talenu, mungukahan lushimbi, mba mungu kasakumuna munyachi wa Yizalele hakachi ka yifuchi yeswe, ngwe umwe kakusakumuna musalo wa masekeseke, hanga kushi kapwa nyi chipwe kaliwe kamwe mukakaholoka hashi kakuhi. ¹⁰ Yivulumunyi eswe a atu jami kuma kafwa ku katana, waze akwamba ngwo,'Chipi kuchichi kutuwana chipwe kutakana nyi yetu.' ¹¹ Ha tangwa lize mungu kamika mika nawa mbalaka ya Ndawichi yize hinalimbuka, nyi kwajila mitango yacho. Mungu kalulika yituwo yayo, nyi kuyi tunga nawa ngwe chize chapwile ha matangwa a kunyima, ¹² hanga aka zuke masalila ja Endome, nyi mafuchi eswe waze hanaluku jina lyami - chocho anambe Yehova - iye mukwa kulinga chuma chino. ¹³ Talenu, matangwa kaneza muze mukwa kuchipa maheta mukwa kucha, nyi mukwa kukama uva maheta mukwa kutumba mbuto. Milundu miyikasulumuka nyi vinyu yipema, nyi mindundena mu yikapukukila nayo. ¹⁴ Nungu kahilwisa atu jami a Yizalele ku ufunge. Kumakatunga yihunda yize hiyapuzuka nyi kutwamamo, kuma katumba mbuto ya uva nyi kunwa vinyu yayo, makalima minda ya uva nyi kulya ku mihuko yayo. ¹⁵ Mungu katumba ha mavu jo, mba kechi kayichizaho nawa mu chifuchi chize hinaaha," chocho anambe Yehova Zambi yenu.