¹ Lamba kuli waze atwama nyi kwololoka mu Zaione, nyi kuli waze anatwama kawape mu yihunda ya milundu ya Samaliya, malunga alemu akwa lutwe a yifuchi, kuli ayo akwa munyachi wa Yizalele kakuya nyi kuwakwasa! ² Tetekeli enu ka kwamba ngwo, " Yenu ku Kelenehe nu kamone; kukatuka kuze nukaye ku Hamate chihunda chinene chikolo; mba nukapalumukine ku Ngata ya akwa Afilisitiya, o te ahyana ma wanangana jenu aali? Chifuchi cho chinene kuhyana chifuchi chenu?" ³ Lamba kuli waze akuchizaho tangwa lipi nyi kupwisa chitwamo cha upupilo kupwa hakamwihi. ⁴ Ayo ka kupomba ha mihela a mazo ja njamba nyi kuliolola ha miu yo. Ayo ka kulya ana amapanga a ku mbunga nyi yimbembe ya ngombe hakachi ka tanga. ⁵ Ayo kakwimba myaso ya mokomoko nyi kalyalya; kakulinyongena yisaji ya myaso ngwe chize Ndawichi alingile. ⁶ Kakunwa vinyu mu misenge yinene nyi kulikwita maji apema, alyoze kevwile kupihya ha kuji- tomo lya Yosefu. ⁷ Chocho mapwa atangu hakachi ka waze maya ku unjize, nyi chimbangwinya cha akwa kulyolola muchikahwa. ⁸ "Yami, Mwene Yehova, hinalishinga kuli yami mwene - chocho anambe Yehova, Zambi ya Tujita, kulengumuka cha Yokomba nakuchivwila lwaji; mbonge jenyi jangupihilila. Keshika mungukunjika chihunda nyi yeswe yize yilomo." ⁹ muchikapwa chocho nyi kachi malunga kumi masala mu zuwo limwe, kumakanonga eswe. ¹⁰ Muze usoko wenyi chipwe yoze mamwocha mambata yifwaha kukatuka ku zuwo - muze mamba kuli mutu yoze uli mu muchima lya zuwo, " Kwasala umwe mukwo nawa uli nyi yena?" Mutu yoze mamba ngwenyi, " Wakuhi nyi umwe." mba mukwo mamba ngwo, " Hola kulu, mumu kuchatumbile kuvuluka jina lya Yehova." ¹¹ Mumu, talenu, Yehova mahana shimbi, nyi zuwo linene ma li fwenyona mu yipinji, nyi zuwo likehe mu tuyipinji tukehe chinji. ¹² Tuvwalu kakuzomboka ha yimawe? mutu nahasa kuchipa ha mawe nyi ngombe? Hindu hinwalumuna upatwilo wa kulita mu utendi nyi mihuko ya ululi hinwayalumuna kupwa musase - ¹³ yenu waze nwakuwahilila ni Lo - Ndevale, yoze wakwamba ngwo, "Te ku tachi ja yetwene kutwatambwile Kanaime?" ¹⁴ " Alyoze talenu, mungukatwisa limwe vungu kulimika nyi yenu, munyachi wa Yizalele - chocho anambe Yehova, Zambi ya Tujita. Kumanupinjisa chize ku Lembo Hamate ndo ku chitwetwe cha Alapa."