¹ Munyachin wa Yizalele, ivwenu liji lino lize ngunande lya kunulilila. ² Yizalele yoze kanda anyingika lunga halimbuka; kechi kahinduka nawa; hamwehuka mu chifuchi chenyi; wakuhi nyi umwe wakumuhindwisa. ³ Mumu chocho kanambe Mwene Yehova: "Chihunda chize chatuhikile nyi kanunu muchikasala nyi kulakaji, mba nyi chize chinakatuhuka nyi kulakaji kumuchikasala nyi kumi ku munyachi wa Yizalele." ⁴ Mumu chocho Yehova kanambe ku munyachi wa Yizalele: " Ngufupenu hanga nupwe nyi mwono! ⁵ Kanda nufupa Mbetele; kanda kunjila chipwe mu Ngilingali; Kanda nuya ku Mbyashipa. Mumu Ngilingali pundu kumaya ku unjize, mba Mbetele mapwa wa mokomoko. ⁶ Fupenu Yehova nutwame nyi mwono, kuchina kumakalekwoka ngwe kahya mu munyachi wa Yosefu. Makalaisa, nyi yoze makajima kechi kasoloka mu Mbetele. ⁷ Atu waze kakwalumuna upatwilo wakulita mu musase nyi kumbila ululi hashi ha mavu." ⁸ Zambi watangile kunguvwila nyi muta- nyi- kawa; kakwalumuna ufuku pwi mu kucha; ka kwalumuna mwalwa mu ufuku nyi kusanyika meya a mu kalunga lwiji nyi kwazukwila hakuzazuluka cha hashi. Jina lyenyi Yehova! ⁹ Iye kakuneha kwonona chipi hakachi ka yitakame hanga kwonona chikeze ha yihunda ya kukolesa. ¹⁰ Kakwivwila kole yoze mukwa ku wakanjisa mu yipanga ya chihunda, kakuvwila kupiha yoze mahanjika umwene mwene. ¹¹ Mumu nwakulyata hashi yiswale nyi kumufweteza tiliku - chipwe hinwatunga ma zuwo amawe akululika, kunuchi kutwamamo. Hinwatumba minda yipema ya uva, kunuchi kanwako vinyu yako. ¹² Mumu ngunanyingika kwalula cha milonga yenu nyi kutoha cha shili yenu - Enu nwakupinjisa akwa ululi, nyi kutambula chindo, chikupyangula mukwa kuhona ku yipanga ya chihunda. ¹³ Keshika mukwa kukanyama mahola ngwe ha shimbu yino, mumu hi shimbu ya upi. ¹⁴ Fupenu chipeme hi chipi ko, hanga nukatwame nyi mwono. Chocho Yehova, Zambi wa Tujita, kumapwa hamwe nyi yenu, ngwe chizechene hinwamba. ¹⁵ Vwilenu lwaji yuma yipi, zangenu chipema, kolesenu upatwilo wa ululi mu yipanga ya limbo. Hanji Yehova, Zambi ya Tujita, mevwila vumbi masalila a yosefu. ¹⁶ Keshika, chocho anambe Yehova, Zambi wa Tujita, mwe Mwene, "kumukapwa kulila mbimbi mu yihela yeswe, kumambulula mu matapalo eswe, 'Lamba! Lamba!' Kumakasanyika njimi akalishimwoke nyi waze anyingika kulila lungungu akalile mbimbi. ¹⁷ Mu minda yeswe ya uva kumukapwa mbimbi, mumu mungupalika hakachi kenu," chocho anambe Yehova. ¹⁸ Lamba kuli yenu nwazanga tangwa lya Yehova! Mumu yika te nwazangila tangwa lya Yehova? Kumulikapwa ufuku nyi pangu lyakuhi, ¹⁹ ngwe chize lunga machina ndumba mba matakana usu, chipwe maya mu zuwo mba masa kwoko lyenyi ha yishimi mba kapela mamusuma. ²⁰ Tangwa lya Yehova mulipwa milima nyi pangu lyakuhimo nyi? Ufuku pwi uliko nyi mwalwa wakuhi nyi? ²¹ Chazangile, nakwivwila lwaji yiwanyino yenu, chevwile kuwaha nyi yikungulwila yenu yilemu. ²² Chipwe munulambula kuli yami milambu ya kulumba nyi wunga, chichi kuyitambula, chichi katala milambu yenu ya sambukila nyi yimuna jenu a maji. ²³ Chiza kuli yami zungo lya myaso yenu; chichi kupanjika ku myaso ya tulyalya twenu. ²⁴ Alyoze, upatwilo wakulita ukapwe ngwe sanga lya meya, nyi ululi ngwe lwiji yoze wakukaplika wa mutolo. ²⁵ Te nwangnehenene yitapo nyi milambu yenu ha makumi awana aze amyaka mu puya, enu munyachi wa Yizalele? ²⁶ Hinwazundula chizulye cha Sakute, mwanangana wenu, nyi Kaiwana zambi yenu wamatongonoshi, yoze nwatangile yenu ene. ²⁷ Keshika mungukanutwala ku unjize ku sali lya Ndamasiku," chocho Yehova kanambe, jina lyenyi iye Zambi wa Tujita.