¹ Panjikenu ku liji lino, enu Ngombe aku Mbashane, yenu nuli mu milundu ya Samaliya, yenu nwakupinjisa yiswale, yenu nwakupupa akwa kuhona, yenu nwakuhanjika kuli akwa zuwo lyenu amalunga, "Nehenu tunwe." ² Mwene Yehova halishinga nyi usandu wenyi ngwenyi, "Talenu, matangwa kaneza muze manumbata nyi yikungo, nyi waze makasulako makamba nyi tuzambu. ³ Munutuhuka ku yituwa ya yipanga, mutu mweswe kuma kapalika ndusu , mba kumanumbila haze kulutwe lya Hamone - chocho anambe Yehova. ⁴ " Yenu ku Mbetele nukavulumune, ku Ngilingali nukokese milonga, Nukanehe yitapo yenu chimene tanga ha tanga, nyi milambu yenu ya kuchihanda kumi ha matangwa atatu. ⁵ Lambulenu milambu yakusakwila hamuwika nyi mbolo; ambululenu milambu ya mbunge; nukayi tambike, mumu chenacho nwazanga kulinga, yenu atu a Yizalele - chocho anambe Mwene Yehova. ⁶ Nanuhele makanwa ja zala mu yihunda yenu yeswe nyi kuhona mbolo muchifuchi cheswe. Hindu nwahilwishile kuli Yami- chocho anambe Yehova. ⁷ Nanuminyine vula muze hindu hi kwasala tukweji tutatu ku matangwa a kucha. Napwile kutuma vula ha chihunda chimuwika, nawa nyi kukwika vula ha chihunda chikwo nawa. Chihanda chimuwika yi mukupwa vula mba chihanda chimuwika nawa kuze kuwakatambwile womine ⁸ Akwa yihunda yaali yitatu endele ku chimuwika akanwe meya hindu pwila kuyawhile. Hindu kunwahilukile kuli yami - chocho anambe Yehova. ⁹ Nanulambile nyi makonya nyi mbumba. napwishile manaka jenu, minda yenu ya uva, nyi mitondo ya mikuyu nyi mitondo yenu ya maoleve yayilya yeswe kuli makumbi . Hindu kunwahilukile kuli yami - chocho anambe Yehova. ¹⁰ Natumine chilungo hakachi kenu ngwe chizechene natumine hali Ingitu. Nashihile akweze jenu nyi katana, nambachile tuvwalu twenu, mba napwishile yilombo yenu kukupuka nyi vumba lipi. Hindu kunwahilukilekuli yami- Chocho anambe Yehova. ¹¹ Nanungwine yihunda hakachi kenu, ngwe muze Zambi anungwine Sondoma nyi Ngomola. Nwapwile ngwe lukunyi wa kuchanga mu mbwemena. Hindu kunwahilukile kuli yami - chocho anambe Yehova. ¹² Keshika mungulinga chuma chikalu kuli yenu, A-Yizalele; mba mumu mungulinga chuma chikalu kuli yenu, lulikenu hanga nukalitakane nyi Zambi yenu, A-Yizalele! ¹³ Mumu, talenu, yoze watengele milundu nawa watengele fuji, iye kakusolola manyonga jenyi kuli mutu, iye kakupwisa chimene kupwa milima, iye kakulyata ha milundu ya hashi. Yehova, Zambi wa Tujita, lye jina lyeni."