¹ Enu atu ja Yizalele, ivwenu ku liji lino lize Yehova hana hanjika lya kulimika nyi yenu, munyachi weswe yoze na chijile mu chifuchi cha Engitu: ² " Hingunanutongola yenu wika hakachi ka minyachi ya hashi. Keshika mungu kumwesa lamba mumu wa uhenge wenu weswe." ³ Atu aali kakulyendela nyi kalitesele? ⁴ Ndumba kakuhyohya mu yambu nyi keshi nyi yiofwo? mwana wa ndumba kakuteta muchivwenge chenyi nyi kakwachile chimwe? ⁵ Kajila mafwa muli kambwila nyi kamutelelelyo? kambwila kulyakukambuluka nyi lya kwachile nyi chimwe? ⁶ Nyi hasunga chitavwi, atu kechi kevwa woma nyi chimwe nyi? Nyi chuma chikalu muchiwana chihunda, Yehova kachitumine? ⁷ Chamwenemwene Yehova keshi kulinga chuma chimwe shina malweza chijimbikilo chenyi kuli tuvumbi twenyi apulofeto. ⁸ Ndumba hahyohya; iya yoze kechi kwivwa woma? Yehova Mwene ha hanjika; iya yoze keshi kupulofeteza? ⁹ Ambululenu yino mu bonge ja Ashindonda, nyi mubonge ya Engitu; ambenu ngwo, " Lingukululenu yenu ha mulundu wa Samaliya hanga nukamone chizungozungo muli ayo, nyi we upinjiso hakachi ko. ¹⁰ Mumu kanyingikine kulinga yipema - Chocho anambe Yehova - kakuvundula upupilo nyi wiji mu mbonge jo." ¹¹ Keshika, Yehova kanambe ngwo: " Mukwa kole ku makajingilika chifuchi, nyi kunupuzwila yipanga yenu nyi kupupa membo jenu." ¹² Yehova kanambwe ngwenyi: " Ngwe chizechene kafunga akulamwina kuchiza mulo aali wika mu kanwa ka ndumba, chipwe chihanda cha twitwi, chocho atu waze atwama mu Samaliya kuma kawalamwina; kumakasala lume nyi mbango ya muu hanji ha muhela wakulyengela." ¹³ Ivwenu nawa nukashindakenye munyachi wa Yakomba - chocho anambe Yehova Mwene, Zambi ya Tujita: ¹⁴ " Mumu ha tangwa lize mungukamwesa lamba ha milonga ya Yizalele, mungukamwesa lamba yilumbilo ya Mbetele. Mbinga ja ku chilumbilo makateta mujikaholokela hashi. ¹⁵ Mungu lamba zuwo lya lushiho hamwe nyi zuwo lya lwiza. zuwo lya mazo a njamba makanonga, nyi mazuwo anene kumakahwa - chocho anambe Yehova."