¹ Kwapwile umwe lunga wa Mbenjamine, wapwile wa tachi nyi kukanyama. Jina lyenyi Kishi mwana wa Ambiyele mwana wa Zelole mwana wa Mbekolate mwana wa Afya, mwana wa Ka- Mbenjamine. ² Iye te kali nyi mwanenyi walunga yoze jina lyenyi Saulu, mukweze mupema. wakuhi lunga mu Yizalele yoze wapwile mupema ngwe iye. Chize kuyipaya yenyi wapwile musuku kuhyana atu eswe. ³ Yimbulu ja Kishi, tato ya Saulu, yajimbala. Chocho Kishi yamba kuli Mwanenyi , " Mbata amwe ngamba hamwe nyi yena; katukenu yenu nufupe yimbulu. " ⁴ Chocho Saulu yapalika mu chifuchi cha Efulame ku milundu ndusu ndo ku chifuchi cha Shalisha, alyoze kawanyine. Yapalika mu chifuchi cha Shalime, alyoze akuhi. Mba yapalika muchifuchi cha Ka- Mbenjamine, alyoze kawanyine ko. ⁵ Muze ejile ku chifuchi cha Zufu, Saulu yamba kuli ngamba jenyi waze apwile hamwe nyi iye, " Tweyenu, tuhiluke, kuchina tata malitwamina kunyonga hali yombulu mba maputuka kunyonga hali yetu. " ⁶ Alyoze ngamba yamba kuli iye, " Panjikenu ku kuno, kwali mutu wa Zambi muno muchifuchi. Hi mutu yoze mulemu; cheswe chize mamba chakupwa. Tuyenu kuli iye; Mba iye mahasa kutulweza jila yize mutuya. " ⁷ Mba Saulu yamba kuli Ngamba jenyi, " Alyoze nyi mutuya yika yize mutumwaha yoze mutu? Mumu mbolo muyikwachilo yetu hiyahwa, nyi yawana yakumwaha mutu wa Zambi yakuhi. Chika tuli nacho? " ⁸ Ngamba yakumbulula Saulu nyi kwamba ngwo, " Tala, nguli nyi chihanda cha muchiwana cha shekele ya palata mukwoko yize mungumwaha yoze mutu wa Zambi, akatulweza jila mutuya. " ⁹ ( ku shakulu, muze mutu maya nyi kuhula chimwe chuma kuli Zambi , yamba nwgo, " Tweya, tuye tuhule mukwa kumona. " Mumu pulofeta apwile nyi kumuvuluka ngwo mukwa kumona. ) ¹⁰ Mba Saulu yamba kuli ngamba jenyi, " chipema wamba. Tweyenu, tuyenu." Chocho ayile kulimbo kuze kwapwile mutu wa Zambi. ¹¹ Shimbu machikanduka kuya kuze limbo, yatakan ana- amapwo kanayi nyi kutaha meya; Saulu nyi ngamba jenyi yamba kuli ayo, " mukwa kumona kwali? " ¹² Yaakumbulula, yamba ngwo, " Kwali; talenu, kali kulutwe lyenu. Tambukenu, mumu kaneza mulimbo musono, mumu atu chitapo ali nacho musono ha nangama. ¹³ Ha kuheta muchihunda mununuwana lume shimbu kanda achikundama ku nangamo mukulya, atu keshi kulya ndo meza, mumu iye mawahisa chitapo; mba waze hanalakenya malia. Mba kandukenu, mumu munumuwana ola yino yene. ¹⁴ Chocho yakanduka yaya mulimbo. Muze apwile kunjila mu chihunda, yaamona Samwele kanatuhuka akalitakane no, ha kukanduka ku nangamo. ¹⁵ Yehova hanachisolola kuli Samwele, ha tangwa lya zau: ¹⁶ lya Hamene ha ola yino mungutuma mutu kukatuka ku chifuchi cha Mbenjamine, ukamuwayise akapwe kasongo ka atu jami a Yizalele. Iye makalamwina atu jami ku kwoko lya Filisitia. Mumu hinatala atu jami nyi keke mumu mutete wo hiwanguheta. " ¹⁷ Muze Samwele yamona Saulu, Yehova yamulweza, " Mwe lunga yono yoze nakulwezanga! Iye mayula atu jami. " ¹⁸ Mba Saulu yeza ku kamwihi nyi Samwele ku chikolo nyi kwamba ngwo , " Ngulweze kama zuwo lya yoze mukwa kumona ? ¹⁹ Samwele yakumbulula Saulu ngwo, " Mukwa kumona yami. Tetekela ku nangamo, muulya nyi yami musono. Mu chimenemene mba ukaye, mba mungukulweza yeswe yize ili mu mbunge je. ²⁰ Hakutwala kuli yimbulu yize yajimbala ha matangwa atatu kunyima, kanda uwanyonga , mumu hawana. Mba te waya ulemu weswe upema wa mu Yizalele ? Hi wayena nyi eswe a zuwo lya tatenu nyi? " ²¹ Saulu yakumbulula ngwo, " Yami hinguli Ka-Mbenjamine, wa umwe hakachi ka minyachi yikepe ya Yizalele nyi ? jimo lyami lye jimo likepe hali ma jimo a minyachi ya Yizalele nyi? Mba kuchite unahanjika chocho nyi yami? " ²² Chocho Samwele yambata Saulu nyi ngamba jenyi, yatwala ku zuwo lya ngeji, yaha chitwamo kulutwe lya waze alakenyene, ngwe makumi atatu a atu. ²³ Samwele yamba kuli yoze wakuteleka, " Nehenu chilyo chize nanwahanga, chize namabanga ngwami, ' Chitulikenu. " ²⁴ Chocho mukwa kuteleka yaheha chilama nyi yize yapwileho yasa kumeso ja Saulu. Mba Samwele yamba ngwenyi, " Tala yize atulikile hasa kumeso je. Lyako mumu ayitulikilile yena ndo ola yize hamba, chize ku ola yize nambanga, ' Hingunalakenya atu. "' Chocho tangwa lize Saulu walile hamwe nyi Samwele. ²⁵ Muze hakatuka ku nangamo kwiza mu chihunda, Samwele yahanjika nyi Saulu helu lya zuwo. ²⁶ Yalimeneka ha ku vumbuka cha tangwa, Samwele yasanyika Saulu helu lya zuwo yamba ngwenyi, " Hinduka, hanga ngukutume mu jila ye. " Chocho Saulu yahinduka, eswe aali iye nyi Samwele yatuhuka yaya mu jila. ²⁷ Shimbu machipalika ku songo lya chihunda, Samwele yamba kuli Saulju, ' Lweza ngamba je atetekele akaye kulutwe lyetu " - iye yapalika kulutwe - " Mba ena mana hano hene ngukwambulwile ma liji a Zambi.