¹ Muze Samwele hakola chikolo, yapwisa ana jenyi akwa kuyula hali A-Yizalele. ² Jina lya mwaneyi mutangu ngwo Joele, nyi wamuchali mwana wapwile Ambija. Apwile akwa kuyula mu Mbya- Shipa . ³ Anenyi kendele mu ndako ja tato, alyoze apyasukile nyi kukawula upite. Atambwile chindo nyi kuhengesa upatwilo. ⁴ Mba makulwana eswe amu Yizalele alikungulwile nyi kwiza kuli Samwele ku Lama. ⁵ Yamba kuli iye, Tala, uli mukulwana chikolo, nyi ana je kendele mu ndako je. Utesele mwanangana aka tuyule ngwe mavungu akwo. ⁶ Alyoze chuma chino chapihilile Samwele muze hamba ngwo, " Twehenu mwanangana aka tuyule. " Chocho Samwele yalemba kuli Yehova. ⁷ Yehova yamba kuli Samwele, " Ononokela atu ku liji lyeswe ma hanjika kuli yena. Mumu kalitunyine yena, alyoze yami analitunu kazangile yami kupwa mwanangana wo. ⁸ Yalinga yitanga yo ngwe chizechene muze nawachijile ku Engitu, nyi ku ngwehuka, nyi kulingila mazambi eka, chocho kanalingi chizechene nawa kuli yena. ⁹ Mba panjika kuli ayo; alyoze muatoweze nyi kuwalweza chize mapwa mwanangana yoze ma wayula. " ¹⁰ Chocho Samwele yalweza maliji eswe waze Yehova ahanjikanga kuli atu waze apwile kufupa mwanangana. ¹¹ Yamba ngwenyi, " chocho mapwa mwanangana yoze manuyula. Makwata anenu amalunga nyi kwasela ku matemba a jita jenyi nyi kupwa akwa tuvwalu twenyi, akazomboke kulutwe lya matemba jenyi. ¹² Mapwisa tupitau a tununu nyi tupitau a makumi atano. Amwe mamuchipila minda, amwe a kucha mbuto yenyi, amwe mamutungila yikungo ya jita nyi yikungo ya matemba jenyi. ¹³ Makwata ana jenu amapwo nyi kwa pwisa akumulingila maji wazea kuneha vumba lipema waze akusa ha mujimba wenyi, nyi awme akwa kuteleka, nyi akumulingila mbolo. ¹⁴ Iye manutambula minda yenu yize yipema chinji, nyi minda yenu ya uva nyi ya olevwe, nyi kuyihana kuli ngamba jenyi. ¹⁵ Manutambula chihanda cha kumi yakumbuto jenu nyi ya ku minda ya uva nyi olevwe, nyi ku yihana kuli alemu nyi ngamba jenyi. ¹⁶ Iye manutambula ngamba jenu ama pwo nyi amalunga nyi ngombe jenu waze apema nyi yimbulu yenu; nyi kwasela ku milimo yenyi. ¹⁷ Manutambula chihanda cha kumi cha mapanga jenu nyi pembe jenu, nyi yenu munupwa ngamba jenyi. ¹⁸ Mba munu ka teta halize tangwa mumu hali mwanangana yoze nwalitongwele; Alyoze Yehova keshi kanu kumbulula halize tangwa. " ¹⁹ Alyoze atu alitunyine kupanjika kuli Samwele; yamba ngwo, " Hi chocho ko, hanatela kupwa mwanangana helu lya yetu ²⁰ hanga tukapwe ngwe mavungu akwo, hanga mwanangana wetu aka tuyule nyi kututetekela akatwashile jita. " ²¹ Muze te Samwele wevwile maliji ja atu iye yambulula kuli Yehova. ²² Yehova yamba kuli Samwele, " panjika ku liji lyo nawa ukapwise umwe kupwa mwanangana wo. Chocho Samwele wambile kuli malunga a Yizalele, " Yenu eswe kuyihunda yenu. "