¹ Mba mushete wa Zambi wa pwile mu chifuchi cha Filisitia tukweji shimbyali. ² Akwa Filisitia yasanyika asasendote jo nyi tahi; yamba kuli ayo, " Chika mutulinga nyi mushete wa Yehova? Nutulweze kama neka mutuutuma kuya kuchifuchi kwayo? " ³ Asasendote nyi tahi yamba ngwo, " Nyi munutuma mushete wa Zambi ya Yizalele, kanda nukatuma kwakuhona yawana; chanutamba kutuma nyi mulambu wa uhye. Mba makanuwuka, mba munukanyingika chize chakwika kwoko lyenyi kunwecha." ⁴ O yamba ngwo, "Mulambu wa uhye ukamutumutuma? Yakumbulula, " yivunda ya olu yitanu nyi tumbi a olu atanu, nyikulita nyi kwalula kwa myata a Filisitia. Mumu musongo umuwika wapwile hali yenu nyi myata jenu. ⁵ Chocho munulinga tuponya twa yivunda, nyi tuponya twa tumbi aze anapihisa chifuchi, nukalemese Zambi ya Yizalele. Hanji malelumwisa kwoko lyenyi hali yenu, nyi hali tuzambi twenu, nyi hali chifuchi chenu. ⁶ Kuchi te nukalisa mbunge jenu, ngwe akwa Engitu nyi Falau yoze wakalishile mbunge jo? Chapwile muze halinga yipupu hakachiko; te kechele atu kuya ? ⁷ Keshika, lulikenu temba nyi ngombe aali a yamwa waze te kanda asa kanga. Kashilenu ngombe ku temba, alyoze handununenu ana jo, nukanehe kuchihunda. ⁸ Mba nukambate mushete wa Yehova nyi kuusa mu temba. Mba upite wa olu wuze nunatumu ha mulambu wa uhye nukause hamuwika muchikasa chimwe. Mba munuyituma yikaye yeswe. ⁹ Mba munutala; nyi muukandukila ku jila kuya ku chifuchi chayo ku Mbete- shemeshe, iye mwene hanatulingi chuma chino chipi. Alyoze, nyi ka, mba mutunyingika ngwo hi kwoko lyenyi ko lya tupinjisa; alyoze, mutunyingika ngwenu chapwile chuma chakutuwana chiwanyina. " ¹⁰ Malunga yalinga chizechene awalwezele; yambata ngombe aali a yamwa, yakashilila ku temba, nyi kutwala ana jo ku zuwo. ¹¹ Yasa mushete wa Yehova ha temba, nyi chikasa cha tumbi a olo nyi tuponya twa yivunda yo. ¹² Ngombe yayila pundu jila yakuya ku Mbete- shemeshe. Hatapalo limuwika, nyi kuteta shimbu machiya, kahambulukile chipwe ku chindume chipwe ku chimeso. Myata ya Filisitia yakaula hanyima ku heta nyi ku njiza ya Mbete-Shemeshe. ¹³ Akwa Mbete-Shemeshe te macha tiliku mu chikulo. Muze hahetula meso jo yamona mushete, yawahilila. ¹⁴ Temba lyejile mu wande wa Yoshua mu Mbete-Shemeshe yilimana . Kwapwile liwe linene, o yapula mitondo ya ku temba, yalambula ngombe mulambu wakocha kuli Yehova. ¹⁵ A-Levi yachiza mushete wa Yehova nyi chikasa chize chapwile hamuwika, muze mwatwamine upite wa olu, nyi kusa ha liwe linene. Malunga aku Mbete- Shemeshe yalambula mulambu wakwocha tangwa lyenalyo nawa yalinga yitapo kuli Yehova. ¹⁶ Muze myata atano a Filisitia hachimona, yahiluka tangwa lize ku Ekolone. ¹⁷ Yino ye yivunda ya olu yize a Filisitia a hilwishile ha mulambu wa uhye wa kuli Yehova- ha Asheondande umuwika, ha Ngeza umuwika, ha Asekelone umuwika, ha Ngata umuwika, ha Ekolone umuwika. ¹⁸ Tumbi a olu nyi kulita nyi kwalula cha membo a myata atano aFilisitia, nyi membo a yipanga nyi yihunda yamu yambu. Liwe linene, kuze kukamwihi atumbikile mushete wa Yehova, hiunasala chela ndo musono mu wande lya Yoshua Ka- Mbeteshemeshe. ¹⁹ Yehova yalamba amwe malunga a ku Mbete-Shemeshe mumu atalile muchima wa mushete wa Yehova. Ya shiha hakachiko makumi atano atununu nyi makumi shimbyali. Atu alinyengene, mumu Yehova halamba atu nyi kufwa chinene. ²⁰ Malunga a ku Mbete-Shemeshe yamba ngwo, " Iya nahase kumana kumeso ja Yehova, yono Zambi musandu? kuli iya makanduka atweche yetu? " ²¹ Yatuma mikeji kuli akwa Kiliyate Yelimi, kwamba ngwo, " A-Filisitia hanahilwisa mushete wa Yehova; tweyenu nukaumbate. "