¹ Mba liji lya Samwele lyejile ku A-Yizalele eswe. Mba Yizalele wayile nyi kwasa jita nyi A-Filistea. Yasa chilombo cho mu Embenezele, nawa A-Filisitea yasa chilombo cho ku Afeke. ² A-Filisitea yalilongela ngango ja kwasa jita nyi A-Yizalele. Muze ashile jita, A-Filistea akumbile akwa Yizalele, ashihile tununu awana a tujita muze apwile nyi kwasa jita. ³ Muze atu heza mu chilombo, Makulwana A-Yizalele yamba ngwo, " Kuchi te Yehova hatulamba musono kumeso ja A-Filisitia? Tusakenu musheta wa usendo wa Yehova kukatuka ku Shilo, hanga ukapwe nyi yetu kuno, hanga mutulamwina kuli akwa kole jetu. ⁴ Chocho atu atumine malunga ku Shilo; yambata mushete wa usendo wa Yehova wa Tujita, yoze unatwama helu lya akerupimi. Ana ja Eli eswe aali , Hofini nyi Finehase, apwile kwekuze hamuwika nyi mushete wa usendo wa Zambi. ⁵ Muze mushete wa usendo wa Yehova hiweza mu chilombo, A-Yizalele eswe akalumyokene nyi liji linene, ndo hashi hanyikinye. ⁶ Muze A-Filisitia evwile zungo lya kukalumyoka, yamba ngwo, " Zungo lyakukalumyoka mu chilombo cha Hepeleu kuchi linalumbunuka? " Mba yanyingika ngwo mushete wa Yehova hiweza mu chilombo. ⁷ A-Filisitia yevwa woma; yamba ngwo, Zambi heza mu chilombo. " Yamba ngwo, " Lamba lyetu ! mumu chumu chino kanda chipwa kama nyilimwe! ⁸ Lamba lyetu ! Iya kama matulamwina ku tachi ja yono Zambi ya ndundo? Awu mwe Zambi wa kumbile akwa Engitu nyi yilungo yeswe mu puya. ⁹ Enu A-Filisitia, takameneu, pwenu malunga, kuchina munupwa ngamba kuli A-Hepeleu, ngwe chizechene ayo apwile ngamba kuli yenu. Asenu jita ngwe malunga. " ¹⁰ Chocho A-Filisitia ashile jita, yakumba A-Yizalele. Mutu weswe yachinyina ku zuwo lyenyi, kwapwile kushiha chunene; mumu tununu atatu amaswalale a kwenda hashi a ku Yizalele a washihile. ¹¹ Mba mushete wa Zambi yaumbata, nyi ana aali ja Eli, Hofini nyi Finehase, yafwa. ¹² Umwe lunga wa ku Mbenjamine yazomboka kukatuka ku jita tangwa lyolene kwiza ku Shilo, nyi mazalo jenyi akusonya nyi mavu ha mutwe wenyi. ¹³ Muze haheta, Eli watwamine ha chitwamo chenyi ku jila kanatale mumu mbunge yenyi yinachikimina mushete wa Zambi. Muze yono lunga hanjila mulimbo yatwa lusango, akwa limbo eswe yalila. ¹⁴ Muze Eli yevwa zungo lya kulila, yamba ngwenyi, " Chizungozungo chino kuchi china lumbunuka? " Mba yoze lunga wejile kapupushi nyi kumulweza Eli. ¹⁵ Mba Eli wapwile nyi makumi livwa a myaka nyi myaka nake; meso jenyi hala, kahashile kumona. ¹⁶ Yono lunga yamba kuli Eli , " Yami nguna katuka ku jita. Nachinanga ku jita musono. " Eli yamba ngwenyi, " Kuchi yapwa , mwanami ? " ¹⁷ Yoze lunga watwile lusango yakumbulula ngwenyi, " A-Yizalele hachina kumeso ja A-Filisitia. Nawa, hapwanga kushiha chinene hali atu. Hamuwika nyi ana je aali, Hofini nyi Finehase, hafwa, nyi mushete wa Zambi hautambula. " ¹⁸ Muze havuluka mushete wa Zambi, Eli yalimbika ha chitwamo chenyi kunyima ku kulwa chajilo. Kota yenyi yo mwimakuka, yafwa, mumu wapwile mukulwana chikolo nawa kanaleme. Te hanayulu Yizalele makumi awana amyaka. ¹⁹ Mba Tembwa - mwanenyi, Pwo lya Finehase, kali nyi ufumba hakamwihi te nyi kusema . Muze evwile lusango ngwo mushete wa Zamba hanautambula nawa tato-weno nyi mwe lunga lyenyi hafwa, yalihetamina yasema mwana, mumu misongo yamukwata. ²⁰ Ha shimbu ya kufwa chenyi anamapwo waze apwileho yamba ngwenyi, " kanda wivwa woma, mumu hiwasema mwana walunga. " Mba iye kakumbulwile chipwe kuchisa mu mbunge. ²¹ Yamuluka yoze mwana ngwo Ikambonde, kwamba ngwo, "Ulemu hiwakatuka ku Yizalele! mumu mushete wa Zambi hautambula, nawa mumu wa tato-wenu nyi lunga lyenyi. ²² Yamba ngwenyi, "Ulemu hi wakatuka ku Yizalele, mumu mushete wa Zambi hanautambula. "