¹ Mwe mwana Samwela wavumbikile Yehova kumeso ja Eli. Chapwile chikalu kwivwa maliji a Yehova waze matangwa; Te usolwelo wa mwenemwene kuushiko. ² Ha shimbu yize, muze Eli , Meso jenyi hala kahashile kumona kanawa, iye wapombele ha muhela wenyi. ³ Shimbu ndeya ya Zambi kanda yichijima, nawa te Samwele hapomba mu tembele ya Yehova, kuze kwatwama mushete wa Zambi. ⁴ Yehova yasanyika Samwele, iye yakumbulula ngwenyi, " Yami uno. " ⁵ Samwele yazomboka kuli Eli nyi kwamba ngwenyi, " Yami uno, mumu wangusanyika. " Eli yamba ngwenyi, " Chakusanyikine; pomba nawa. " Chocho Samwele yaya yapomba nawa. ⁶ Yehova yasanyika nawa, " Samwele" Nawa Samwele yahinduka yaya kuli Eli nyi kwamba ngwo, " Yami uno, mumu wangusanyika. " Eli yakumbulula, " Chakusanyikine, mwanami, yako upombe nawa. " ⁷ Mba samwele kanda achinyingika Yehova , chipwe liji lya Yehova kanda achilivwa. ⁸ Yehova yasanyika Samwele cheka nawa kamuchitatu. Cheka nawa Samwele wahindukile nyi kuya kuli Eli nyi kwamba ngwo, "Yami uno, mumu wangusanyika. " Mba Eli yanyingika ngwenyi Yehova hanasanyika mwe mwana yono. ⁹ Mba Eli yamba kuli Samwele, " Yako upombe cheka nawa; nyi makusanyika nawa, ukakumbulule ngwo, Amba, Yehova, mumu kavumbi kenu kanapanjika. "' Chocho Samwele yaya yapomba mu chihela chenyi cheka nawa. ¹⁰ Yehova yeza nawa yamana, yasanyika ngwe chize chene apwile nyi kusanyika yisuho yikwo, " Samwele, Samwele. " Mba Samwele yamba ngwenyi, "Hanjika, mumu kavumbi kenu kanapanjika. " ¹¹ Yehova yamba kuli Samwele, " Tala, mungulinga chuma chimwe mu Yizalele mba mutu mweswe machivwa matwi jenyi mevwa chimbangwinya. ¹² Hatangwa lize mungukalinga yeswe ya kulimika nyi Eli yize hinamba kutwala ku zuwo lyenyi, chize ku uputukilo ndo ku kusula. ¹³ Hinamulweza ngwami hingumu patwila zuwo lyenyi ndo kumyaka mumu ha shili yize anyingikine, mumu ana jenyi apwile nyi kushililika Zambi alyoze iye kaakanjishile. ¹⁴ Mumu wa chino hinalishinga ha kutwala ku zuwo lya Eli hanga uhengeya zuwo lyenyi kechi kaukukila nyi yitapo chipwe mulambu ndo ha myaka." ¹⁵ Samwele te hanapombo ndo chimenemene; Mba yazulula yikolo ya zuwo lya Yehova . Alyoze Samwele wevwile woma wa kulweza Eli hali uze usolwelo. ¹⁶ Mba Eli yasanyika Samwele nyi kwamba ngwo, " Samwele. mwanami. " Samwele yakumbulula, " Yami uno. " ¹⁷ Yamba ngwenyi, " Chuma chize akulweka chika? Ngunalyumbu kanda unguswekacho. Zambi akalingeho kuli yena, nyi kuhyanaho, nyi ngwe munguswekaho chuma chimuwika ha maliji waze akulwekanga. " ¹⁸ Samwele yamulweza yeswe; kaswekelele nyi chimwe. Eli yamba ngwenyi, " Iye Yehova. Akalinge chize chinamupemena. " ¹⁹ Samwele watatukile, nyi Yehova wapwile hamwe nenyi, kataijile maliji jenyi kuholoka hashi nyiamwe. ²⁰ Yizalele mweswe chize kuli Ndane ndo kuli Mbya- Shipa anyingikine ngwo hanakolesesa Samwele akapwe pulofeta wa Yehova. ²¹ Yahova yasoloka cheka nawa mu Shilo, mumu walisolwele kuli Samwele mu Shilo ku liji lyenyi.