¹ Hana walembele ngwnyi, " Mbunge yami yinawahilila muli Yehova. Mbinga yami yina zunduka muli Yehova. Kanwa lyami hilitohwa hali akwa kole jami, mumu ngunawahilila mu ulamwino we. ² Nyiumwe wapwa musandu ngwe Yehova wakuhi, mumu mukwo wakuhi ndo yena wika; liwe lyakuhi ngwe Zambi yetu. ³ Kanda nuhanjika nawa nyi kulengumuka chikolo kuhyana; kanda nulivwimba mumakanwa jenu. Mumu Yehova ye Zambi wa yinyingi; kakupezalisa yitanga. ⁴ Mata ja malunga a ndundo hanamakuka, alyoze waze akutalingisa hanalijichika nyi tachi. ⁵ Waze akuchile halilingila ngamba kulinga ha kulya; Waze apwile nyi kapunga hanalitwamina kupwa nyi kapunga. Nyi waze keshi kusema mba kanaseme ana akuheta ku shimbyali, alyoze pwo yoze uli nyi ana anji hahonga. ⁶ Yehova kakushiha nawa kakupwisa nyi mwono. Iye kakupalumwisa ku Shiole nawa kakukandwisa. ⁷ Yehova kakupwisa atu amwe yiswale nyi akwo kupwa pichi. Kakununguna mutu, alyoze nawa kakumuzundula. ⁸ Kakuchiza yiswale ku fufuta. Iye kakuzundula mukwa kuhona hakachi aka chichilila cha uto nyikumunangamisa akatwame hamwe nyi alemu. Mumu nguji ya chifuchi ya Yehova mba iye hakoleselaho he hashi. ⁹ Kumakafunga molu ja asandu jenyi, alyoze kumakaholesa yingulungu mumilima, mumu wakuhi makumba ku tachi jo. ¹⁰ Waze akulitachika nyi Yehova kumaka makwoka muyipinji; iye malimika no nyi kukulunguza kukatuka mwilu. Yehova kumakayula songo lya chifuchi; kumakahana tachi kuli myananga jenyi nyi kuzundula mbinga ya yoze hanawayisa nyi maji. " ¹¹ Mba Elekana wayile ku Lama, kuzuwo lyenyi. Yoze mwana wavumbikile Yehova kumeso ja Eli sasendote. ¹² Halyapwila ana ja Eli apwile amokomoko. Kanyingikine Yehova. ¹³ Ndako ya sasendote yapwile jino, muze mutu halambula chitapo, ngamba ya sasendote wejile nyi lungafu wa misako yitatu mu kwoko lyenyi, shimbu machiteleka ye yifwo. ¹⁴ Iye yalunjisa mu yifwo muchikango, chipwe mundeho, hanji mundeho yakwochela, hanji chikwachilo chikwo. Yeswe yize lungafu muluneha sasendote wambachile. Yalinga chino mu Shilo kuli atu eswe a Yizalele waze aheteleko. ¹⁵ Chipwe shimbu kandocha e maji, Ngamba ya sasendote wejile, nyi kwamba kuli lunga yoze wapwile nyi kulambula, " Hana yifwo akayoche ya sasendote; mumu kechi kutayiza yifwo ya kuteleka kukatuka kuli yena, alyoze ndo ya wisu." ¹⁶ Nyi ngwe mutu mahanjika kuli iye ngwenyi, " Kanatela hatangu kwocha e maji, mba akambate yeswe ayo anazange. " mba iye mahanjika ngwo, " ka , munguhanayo hahene; nyi ka, munguyitambula nyi tachi. " ¹⁷ Mulonga wa ano makweze wapwile unene chikolo kumeso ya Yehova. Mumu mulambu wa Yehova hiwalumuka chizelwokesa kuli ayo. ¹⁸ Alyoze Samwela wavumbikile kumeso ja Yehova muze achili mwana wakulijichikila efondi hina litoma lipema. ¹⁹ Naye wamu tongelele chikuto nyi kumunehena mwaka ha mwaka, muze ejile nyi lunga lyenyi nyiku lambula yitapo ya ha mwaka. ²⁰ Eli yawahisa Elekana nyi pwo lyenyi nyi kwamba ngwo, " Yehova akakwehe ana anji kuli yono pwo mumu ha kwita chize echile kuli Yehova . " Mba ahilukile ku zuwo lyo. ²¹ Yehova yanangisa Hana, yapwa nawa nyi ufumba. Iye yasema ana amalunga atatu nyi ana amapwo aali. Mba mwe mwana Samwela yatatuka kumeso ya Yehova. ²² Mba muze Eli wapwile mukulwana chikolo; yevwa yeswe yize ana jenyi alingile kuli A-Yizaele eswe, nyi chize apombele nyi mapwo aze avumbikile ku chikolo cha mbala ya chikungulwila. ²³ Yamba kuli ayo, " kuchi te nunalingi yuma yipwa haha? Mumu hingunevu yitanga yenu yipi kuli wano atu eswe . " ²⁴ Hi chocho ko ,ana jami, mumu lufuma yoze ngunevu himupema ko . Nwakuvulumwisa atu a Yehova. ²⁵ Nyi mutu mavulumuna mutu nyi mukwo, Zambi mamupatwila; alyoze nyi ngo mutu mavulumuna kuli Yehova, iya mamuhakwila? " Alyoze kechi kevwa ku liji lya tato, mumu Yehova kanazange kwashiha. ²⁶ Yoze mwana Samwela watatukile, nyi kuwana vumbi kuli Yehova nyi kuli atu . ²⁷ Mba mutu wa Zambi wejile kuli Eli nyi kwamba ngwenyi, " Yehova kanahanjika ngwenyi, ' Te chasolwele kuli munyachi wa tatenu shimbu te achili mu Engitu mu undungo kuli atu ja Falau nyi? ²⁸ Ngunakamusakula hakachi ka minyanchi ya Yizalele kupwa sasendote, kuya ku chilumbilo chami, nyi kwocha insensu, kuzala efondi kumeso jami. Nahanyine kuli minyachi ya tatenu milambu yeswe ya kahya ya atu Yizalele. ²⁹ Mba, kuchi te, wakulyatalyata ha chitapo chami nyi ha mulambu wami nakolesele nyi shimbi mu zuwo lyami nakutwama? Kuchi te wakulemesa ana je halu lya yami nyikulitohesa nyi yeswe yahyana hakachi ka milambu ha atu jami A-Yizalele? ' ³⁰ Mumu Yehova, Zambi ya Yizalele, kanambe ngwo, ' Chamwenemwene nambile ngwami zuwo lye nyi zuwo lya tatenu kumakenda kumeso jami ndo myaka nyi myaka. ' Alyoze Yehova kanambe ngwenyi, ' Chikapwe kusuku nyi yami kulinga chino, mumu mungukalemesa waze akungulemesa, alyoze waze mangulelesa kuma sauka. ³¹ Tala, matangwa kaneza muze mungukateta tachi je nyi tachi ya zuwo lya tatenu, hanga kanda kukapwa mukulwana nyiumwe mukachi ka zuwo lye. ³² Kumukamona lamba mu chihela chize natwama. chipwe yipema muyikahanyiwa kuli Yizalele, mba kumushi kapwa kama mukulwana mukachi ka zuwo lye. ³³ Mutu yoze hali yenu chamutetele ku chilumbilo chami, mungukalayisa meso je , nyi kuneha chinyengo mu mbunge ye, mba waze eswe anasemuka mu munyachi we kumafwa. ³⁴ Chino muchipwa chilayi chize muchiza hali ana je aali amalunga, hali Hofini nyi Finehase: Hatangwa limuwika eswe aali kumafwa. ³⁵ Mba mungulisolwela sasendote wa jika yoze malinga nyikulita nyi chize chili mu mbunge yami nyi mu manyonga jami. Ngumutungila zuwo likolo; iye mendela mwono wamutolo kumeso ja yoze mwanangana hingunamuwayisa nyi maji. ³⁶ Mweswe masala mu zuwo lye kumakeza nyi kumuhetamina kuli iye akatambule lumbongo wa pulata nyi pinji ya mbolo, nyikwamba ngwenyi, " Ngunalyumbu ungusele kama milimo yimwe ya sasendote hanga ngu kalye kama chihanda cha mbolo.""