¹ Kwapwile lunga umwe wa ku Lamataime Zufine, wa ku mulundu wa Efuleme; jina lyenyi Elekana mwana wa Jelohame mwana wa Elihu mwana wa Tohu mwana wa Zufu, ka- Efeleme. ² Wapwile nyi ma pwo aali, mutangu jina lyenyi Hana, nyi mukwo wa muchali wapwile Penina. Penina wapwile nyi ana, alyoze Hana kasemene. ³ Yono lunga wakatukile mu chihunda chenyi mwaka ha mwaka nyi kuya nyi kuwayila nyi kulambula yitapo kuli Yehova wa Tujita ku Shilo. Ana ja Eli aali, apwile kukuze, Hofini nyi finehase, waze apwile sasendote ja Yehova. ⁴ Muze tangwa hilyaheta lize Elekana wapwile nyi kulumbula mwaka ha mwaka, wapwile nyi kuhana yawana kuli Penina pwo lyenyi nyi kuli ana jenyi eswe amalunga nyi mapwo. ⁵ Alyoze kuli Hana iye wahanyine yawana yihanda yaali, mumu wazangile Hana, hindu Yehova hanajila kusema chenyi. ⁶ Mba chihalika chenyi wamwihile chikolo nyi ku mwivwisa chipekete, mumu Yehova hanajila kusema chenyi. ⁷ Chocho mwaka ha mwaka muze ayile nyi akwa zuwo lyenyi ku zuwo lya Yehova , chihalika chenyi wamwihile. Keshika walilile nyi kulitwamina kulya. ⁸ Lunga lyenyi Elekana yamba kuli iye, " Hana, yika unalilila? Kuchi te kuwalile? Kuchi te mbunge ye inapihilila? Te yami chahyanyine kulya ana amalunga kuli yena nyi ? " ⁹ Mba muze halya, hanwa mu Shilo, Hana yakatuka. Mwe sasendote Eli te kanatwama ha chitwamo chenyi ku chikuli cha chikolo cha tembele ya Yehova. ¹⁰ Mwe pwo te kanalifwichi; yalembe kuli Yehova nikulila chikolo. ¹¹ Yalakenya chilakenyo ngwo, " Yehova wa tujita, nyi chamwenemwene mutula luyinda wa yami kavumbi ke nyi kungwiuluka, nyi kuhona kuvulama kavumbi ke, alyoze ukahane kavumbi ke mwana walunga, mba mungukamwaha kuli Yehova matangwa eswe a mwono wenyi, kechi kasa teulu ku mutwe wenyi. " ¹² Mba shimbu machilemba kuli Yehova, Eli wamwene kanwa lyenyi. ¹³ Hana wahanjikile mu mbunge yenyi. Mivumbo yenyi inalivwevweta, alyoze liji lyenyi kalivwile. Keshika Eli yanyonga ngwenyi kanazengewa. ¹⁴ Eli yamba kuli iye, " Mwiji muka mulitwamina kuzengewa? Echa kunwa vinyu. " ¹⁵ Hana yakumbulula, " Ka, mwata, nguli pwo wachinyengo. Kuchanwine vinyu chipwe kunwa chikwo chisasu, alyoze hinazukwila mbunge yami kuli Yehova. ¹⁶ Kanda nungumona kupwa mwana wapwo wamokomoko; mumu ha kulumba ha chinyengo chami nyi kungwihi hingunahanjika ndo halyapwila. " ¹⁷ Mba Eli yakumbulula nyi kwamba ngwenyi, " Yako nyi sambukila; chocho Zambi ya Yizalele akwehe chize wamwita. " ¹⁸ Mwana pwo yamba ngwo, " Yami kavumbi ke ngukawane vumbi kumeso je. " Chocho mwana- pwo wayile nawa yalya; mba kapwile nyi chinyengo ha meso jenyi. ¹⁹ O eswe yalimeneka chimenemene yawayila Yehova, yahiluka nawa ku zuwo lyo ku Lama. Elekana yali mona nyi mukwo pwo, Yehova ya mwiuluka . ²⁰ Muze shimbu hiyaheta, Hana yasema mwana walunga. Yamuluka jina ngwo Samwele, kwamba ngwo, " Mumu ngwenyi namwichile kuli Yehova. " ²¹ Nawa, Elekana nyi akwa zuwo lyenyi yaya nyi kulambula kuli Yehova mulambu wa mwaka ha mwaka nyi chilakenyo chenyi. ²² Alyoze Hana kayile; yamba kuli lunga lyenyi, " Ndo hinasumuna mwana; mba ngukamutwale, akasoloke kumeso ya Yehova nyi kutwama kuze myaka yeswe. " ²³ Elekana yamba kuli iye, " Linga cheswacho chakupemena. Shimbwila ndo hiwamusumuna; chino wika, Yehova akakolese liji lyenyi. " Chocho pwo yono watwamine nyi kwamwisa mwanenyi ndo hamusumuna. ²⁴ Muze hamusumuna , yaya nenyi, hamwe nyi ngombe yoze uli nyi myaka yitatu, efa umuwika ya unga, nyi tuku yimuwika ya vinyu, yamuneheha ku zuwo lya Yehova ku shilo. Mba mwana wapwile kemba. ²⁵ Yashiha kuji wa ngombe, yaneha mwe mwana kuli Eli. ²⁶ Mwana-pwo yamba ngwenyi, " O, mwata ! nyi mwono we mwata, yami nguli pwo yoze unakamana kukamwihi nyi yena hanohene muze te napwile nyi kulemba kuli Yehova. ²⁷ Mwana yono nechile mba Yehova hangwaha chize namwichile. ²⁸ Hinamuhana kuli Yehova, hamatangwa eswe amwono wenyi hinamuhana kuli Yehova ." Mba mwe mwana wa wayilile Yehova kuze.