¹ Keshika A-Filisitiya yakungulula tujita two eswe ku Afeki, nyi Yizalele yasa chilombo cho ku fuji lya meya lili ku Yezelele. ² Myata ja A-Filisitiya yapalika kuma kulakaji nyi ku tununu; Ndawichi nyi malunga jeyi yapalika kunyima nyi Akishe. ³ Myata ja A-Filisitiya yamba ngwo, "Wano A-Hepeleu yika yize analingi kuno?" Akishe yamba kuli umwe wa myata ja A-Filisitiya, "Au ngwami Ndawichi, kavumbi wa Saulu, mwanangana wa Yizalele, yoze hanapu nyi yami matangwa wano, chipwe myaka yino, namuwanyine nyi chipi chimwe chize ku shimbu muze ejile kuli yami ndo nyi tangwa lino nyi?" ⁴ Alyoze myata ja A-Filisitiya atenukine nenyi nyi kuhanjika ngwo, "Hilwisa yono lunga, hanga akahiluke kuchihela chize wamusele. Kechi kuya nyi yetu ku jita, mumu iye malumuka mukwa kulimika nyi yetu shimbu ya jita. Mumu kuchi te malitayijisa kuli mwene wenyi ndo akachize mitwe ya malunga jetu nyi? ⁵ Au ngwetu Ndawichi yoze embile umwe kuli mukwo nyi kuhangana, kwamba ngwo,'Saulu washihile tununu jenyi, nyi Ndawichi kumi lya tununu jenyi nyi?" ⁶ Mba Akishe yasanyika Ndawichi yamba kuli iye ngwenyi, "Nyi mwono wa Yehova, hiwapwa mutu mupema, kutuhuka che nyi kunjila che hamuwika nyi yami mujita chinanguwahila yami; mumu nawanyine chipi nyi yena chize ku tangwa lize wejile kuli yami ndo nyi tangwa lya musono. Alyoze myata ka kutayile. ⁷ Keshika hiluka ukaye nyi sambukila, kuchina myata ja Filisitiya makwila kupihya." ⁸ Ndawichi yamba kuli Akishe, "Alyoze yika yize nalinga? Yika yize unawane muli kavumbi kenu muze hingunapu nyi yenu ndo ku tangwa lya musono, hanga ngukahone kuya nyi kwasa jita nyi akwa kole ja mwene wami mwe mwanangana?" ⁹ Akishe yakumbulula nyi kwamba kuli Ndawichi ngwenyi,"Ngunanyingika ngwami ushi nyi chipi chimuwika mu meso ja yami ngwe umwe mungelo wa Zambi; alyoze myata ya Filisituya hamba ngwo, 'Kanda aya nyi yetu ku jita.' ¹⁰ Keshika katuka chimenemene hamuwika nyi tuvumbi ja mwene we waze eza hamuwika nyi yena; muze hiwakatuka hakucha cha chimenemene, ukaye." ¹¹ Chocho Ndawichi yalimeneka, iye nyi malunga jenyi, hanga akakatuke chimenemene, ahiluke ku chifuchi cha Filisitiya. Alyoze A-Afilisitiya yaya ku Yezelele.