¹ Ndawichi yamba mu mbunge yenyi, "Tangwa limwe mangwonona kuli kwoko lya Saulu; Chuma chipema chakuhi kuli yami shina nguchine ku chifuchi cha Filisitiya; Saulu mujimuhwa kufupa yami mu njiza ja Yizalele; mba munguchina mu kwoko lyenyi." ² Ndawichi yakatuka yapalika, iye nyi malunga asambano waze apwile no, yaya kuli Akishe mwana wa Moake, mwanangana wa Ngata. ³ Ndawichi watwamine nyi Akishe ku Ngata, iye nyi malunga jenyi, mutu weswe nyi zuwo lyenyi, nyi Ndawichi nyi mapwo jenyi aali, Ahinoame Ka-Yezelele, nyi Ambingale Ka- kamela, pwo lya Nembale. ⁴ Saulu yamulweza ngwo Ndawichi hanachinyina ku Ngata, chocho kamufupile nawa. ⁵ Ndawichi yamba kuli Akishe, "Nyi ngwo nwanguvwila vumbi ku meso jenu, angwehe kama chihela mu limbo chimuwika mu chifuchi, hanga kutwame kuze. Kuchi te kavumbi kenu matwama mu limbo lya wanangana hamuwika nyi yenu?" ⁶ Chocho tangwa lize Akishe yamwahaZikilange; Hachikuma chino zikalange yapwa ya mbala ya myanangana ya A-Yunda ndo musono. ⁷ Matangwa waze Ndawichi atwamine mu chifuchi cha Filisitiya apwile mwaka umuwika nyi tukweji awana. ⁸ Ndawichi nyi malunga jenyi ayile nyi kupupa yihela yinji, yapupa a Ngeshule, nyi Ngezele, nyi A-Amaleke; mumu katu ku shakulu apwile e akwa chifuchi wano, ndo ku Shule, ku chifuchi cha Engitu. Apwile nyi kutwama kuze ku chifuchi putu ku myaka ya shakulu. ⁹ Ndawichi yapupa chifuchi chize kahichikileho lunga chipwe pwo. Yambata mapanga nyi ngombe, nyi yimbulu, nyi tumelu, nyi mazalo. Mba yahiluka yaya ku Akishe. ¹⁰ Akishe yahula ngwenyi, "waze wapupa musono aya?" Ndawichi makumbulula ngwenyi, "Akwa sule a Yunda," hanji "Akwa ku sule a Yelamila," hanji "Akwa sule A-Kene." ¹¹ Ndawichi kahichikileho nyi umwe lunga chipwe pwo nyi mwono akanehe ku Ngata, kwamba ngwo, "chocho mba kanda akahanjika hali yetu, 'Ngwo Ndawichi kakulinga chichize."" Chino chapwile nyi kulinga shimbu muze atwamine mu chifuchi cha Filisitiya. ¹² Akishe wafulyelele Ndawichi, nyi kwamba ngwo, "Iye hanapwisa mu kwa kole wahyana kuli atu jenyi, mapwa kavumbi kami myaka yeswe."