¹ A-Zife ejile kuli Saulu ku Ngimbya nyi kwamba ngwo, "Ndawichi kanaswama ku mulundu wa Hachila, uze uli kusali lya Njeshimone nyi?" ² Mba Saulu yakatuka yaya yapalumukina ku puya ya Zife, wapwile nyi tununu atatu amalunga ja Yizalele, akafupe Ndawichi ku puya ya Zife. ³ Saulu wasele chilombo chenyi ha mulundu wa Hachila, uze uli ku sali lya Njeshimone, kusali ya jila. Alyoze Ndawichi wapwile nyi kutwama mu puya, yamona ngwo Saulu hamukaula ndo mu puya. ⁴ Chocho Ndawichi yatuma ngendeshi nyi kunyingika ngwo chamwenemwene Saulu haneza. ⁵ Ndawichi yakatuka mba yaya ku chihela kuze Saulu asele chilombo chenyi; yamona ku chihela kuze Saulu anapombo, nyi Ambenele mwana wa Nele, mwe kapitau ka tu jita; Saulu wapombele mu chilombo, nyi atu eswe apwile mu chilombo amujingilikile, apombele. ⁶ Mba Ndawichi yamba kuli Ahimeleke Ka-Hete, nyi kuli Ambishai mwana wa Zluia, usoko wa Joambe, "Iya yoze maya nyi yami kuli Saulu mu chilombo?" Ambishai yamba ngwenyi, " Nguya nyi yenu." ⁷ Chocho Ndawichi nyi Ambishai yaya ku tujita nyi ufuku. Saulu te kanapombo mu muchima wa chilombo nyi kunga lyenyi te halijika ku mutwe wenyi. Ambenele nyi tujita te hapomba hamujingilika. ⁸ Mba Ambishai yamba kuli Ndawichi," Zambi hakunjika mu kwa kole wenu mu kwoko lyenu musono. Keshika ngutayizenu kama ngumupalakenye hashi nyi kunga ke kamuwika. Chichi kumulamba kaali." ⁹ Ndawichi yamba kuli Ambishai, "Kanda umushiha; mumu iya yoze nahase kusamba nyi masa kwoko lyenyi likalimike nyi yoze Yehova hanawayisa?" ¹⁰ Ndawichi yamba ngwenyi, "Nyi mwono wa Yehova, Yehova kumamushiha, hanji tangwa lyenyi lya kufwa muliza, hanji maya kujita mba mafwa. ¹¹ Yehova angukanjise kusa kwoko lyami lya kulimika nyi yoze hanamuwayisa; alyoze keshika, ngunalyumbu kuli yena, anda kunga lize lili ku mutwe wenyi nyi mulondo wa meya, mba tuye. ¹² Chocho Ndawichi yanda kunga nyi mulondo wa meya kukatuka ku mutwe wa Saulu, yaya kwo. Wakuhi wachimwene chipwe wachinyingikine, chipwe umwe kuhinduka, mumu eswe apwilemu tulo, mumu Yehova hatumina tulo anji chikolo. ¹³ Mba Ndawichi yaya sali likwo yamana ha mulundu; pinji inene yapwileho hakachi ko. ¹⁴ Ndawichi yakololoka kuli waze atu nyi kuli Ambenele mwana wa Nele; yamba ngwenyi, "Ambenele, kuushi kukumbulula?" Mba Ambenele yakumbulula nyi kwamba ngwenyi, "Yena iya unasanyika mwanangana?" ¹⁵ Ndawichi yamba kuli Ambenele, "Te hi uli lunga ko nyi? Iya walita nyi yena mu Yizalele? Kuchi te wakalayilile mwanangana iye mwene we? Mumu umwe wezanga nyi kushiha mwanangana mwene we. ¹⁶ Chuma chino walinga kuchapemene. Nyi mwono wa Yehova, watela kufwa mumu kuwalayile mwene we, yoze Yehova hanawayisa. Halyapwila tala kuze kunga lya mwanangana lili nyi mulondo wa meya uze wapwile hakamwihi nyi mutwe wenyi!" ¹⁷ Saulu wanyingikine liji lya Ndawichi mba yamba ngwenyi, "Mwanami Ndawichi, Alyo liji lya yena?"Ndawicih yamba ngwenyi, "Liji lyami, mwene wami, mwanangana." ¹⁸ Yamba ngwenyi, "Kuchi te mwene wami kanakaula kavumbi kenu? Yika nalinga? upi uka nguli nawo? ¹⁹ Keshika, ngunalyumbu kuli yenu, mwene wami mwanangana panjikenu ku maliji a kavumbi kenu. Nyi Yehova hananuvundula kulimika nyi yami, atambule mulumbu; alyoze nyi mutu, ashingiwe ku meso ja Yehova, mumu hananguhumu musono, hanga ngukahone chihanda cha chihinga cha Yehova; kakwamba kuli yami, 'Yako uwayile mazambi eka.' ²⁰ Keshika, Kanda nwecha manyinga jami kumwangana hashi kusuku nyi Yehova; mumu mwananagana wa Yizalele haneza nyi kufupa yoze unachinyi ngwe chize umwe kakuhanga ngwali ha mulundu." ²¹ Mba Saulu yamba ngwenyi, " Hiluka, mwanami, Ndawichi, mumu chichi ku kulamba nyi chimwe, mumu mwono wami wapwanga ulemu ku meso je musono. Tala, nalinganga uhepuke nawa navulumunanga." ²² Ndawichi yakumbulula nyi kwamba ngwenyi, " Mwanangana, talenu, kunga lyenu lino! Echenu umwe mukweze eze mba akalimbate nyi kununehena yenu. ²³ Yehova akononone mutu weswe nyi kulita nyi ululi wenyi nyi umwenemwene wenyi; mumu Yehova wakunjikanga yenu mu kwoko lyami musono, alyoze cholwele kwoko lyami nyi kulimika nyi yoze awayishile. ²⁴ Talenu, chize mwono wenu wapwanga ulemu mu meso jami musono, chocho nawa mwono wami ukaleme ku meso ja Yehova, mba angulamwine yami ku lamba lyeswe." ²⁵ Mba Saulu yamba kuli Ndawichi ngwenyi, "Ukawahe, mwanami Ndawichi! kumulinga yuma yinji nawa kumuyimanununa kanawa." Chocho Ndawichi wayile kwenyi, mba Saulu yahiluka ku mahyo.