¹ Yalweza Ndawichi, "Tala, Afilisitiya kanase jita nyi A-Keila nawa kanapupu yizungwilo." ² Chocho Ndawichi yalemba kuli Yehova amukwase nyi kumuhula, "Nguye ngukase jita nyi akwa Filisitiya nyi?" Yehova yamba kuli Ndawichi, "Yako ukase jita nyi akwa Filisitiya ukalamwine A-Keila." ³ Malunga ja Ndawichi yamba kuli Iye, " Tala, hitwevwa woma muno mu Yunda. Mba kuchi muchipwa nyi ngwo mutuya kuli A-Keila nyi kwasa jita nyi maswalale ja A-Filisitiya?" ⁴ Mba Ndawichi yalemba nawa kuli Yehova akamukwase nawa. Yehova yamukumbulula, "Katuka, palumuka uye ku A-Keila. Mumu mungukunjika akwa Filisitiya kuli yena." ⁵ Ndawichi hamuwika nyi malunga jenyi yaya ku Keila yasa jita nyi akwa A-Filisitiya. Yapupa ngombe jo nyi kushiha anji hakachi hakachi ko. Chocho Ndawichi yalamwina A-Keila. ⁶ Muze Ambyatale mwana wa Ahimeleki wachinyine kuli Ndawichi ku Keila, wayile nyi efonde mu kwoko lyenyi. ⁷ Saulu yamulweza ngwo Ndawichi haya kuli A-Keila. Saulu yamba ngwenyi, "Zambi hangukunjika ye mu kwoko lyami. Mumu iye halyajililamo mumu hanjila muchihunda cha yajilo nyi njalo." ⁸ Saulu yasanyika eswe tujita akase jita, akapalumukine nyi kuya ku A-Keila, akaseleke Ndawichi nyi malunga jenyi. ⁹ Ndawichi te kananyingika ngwo Saulu chipi ananguhalila. Yamba kuli Ambyatale sasendote, "Neha efonde kuno." ¹⁰ Mba Ndawichi yamba ngwemyi, "Yehova, Zambi ya Yizalele, kavumbi ke pundu hinevwa ngwo Saulu kanafupu kwiza kuli A-Keila, akapupe chihunda ha mukunda wa yami. ¹¹ Malunga a ku A-Keila mngukunjika yami mu kwoko lyenyi nyi? Saulu kumapalumuka nyi kwiza, ngwe chizechene kavumbi ke hevwa nyi? Yehova, Zambi ya Yizalele, ngunalyumbu, ungulweze kama yami kavumbi ke." Yehova yamba ngwenyi, "Kumeza" ¹² Mba Ndawichi yambangwenyi, "Malunga a ku A-Keila mangukunjika yami nyi malunga jami mu kwoko lya Saulu nyi?" Yehova yamba ngwenyi, "Kumakakukunjika." ¹³ Mba Ndawichi yamba kuli malunga jenyi, waze apwile ngwe kulakaji asambano, yakatuka nyi kuhichika Keila, yachinyina kweswako ahashile. Muze alwezele Saulu ngwo Ndawichi hanachina ku Keila, yalitwamina kuyako. ¹⁴ Ndawichi watwamine mu mbonge yenyi mu puya, mu chifuchi cha milundu mu puya ya Zife. Saulu te wamufupile matangwa eswe, alyoze Zambi kamukunjikile ko mu kwoko lyenyi. ¹⁵ Ndawichi yamona ngwo Saulu heza kanafupu kumushiha; mba Ndawichi wapwile mu puya ya Zife mu Holeshi. ¹⁶ Mba Njonatasi, mwana wa Saulu, yakatuka yaya kuli Ndawichi ku Holeshi, nyi kumutakamisa muli Zambi. ¹⁷ Yamba kuli iye, "Kanda wivwa woma. Mumu kwoko lya tata Saulu kulichi kukuwana yena. Mupwa mwanangana hali A- Yizalele, nawa mungupwa wa muchali kuli yena. Tata Saulu kanachinyingika chino." ¹⁸ Yalinga usendo kumeso ja Yehova. Ndawichi yasala mu Holeshi, nyi Njonatasi yaya kuzuwo. ¹⁹ Mba akwa Zife ejile kuli Saulu mu Ngimbya nyi kuhanjika ngwo, "Ndawichi kanaswama hakachi ka yetu mu mbonge ya Holeshi, ha mulundu wa Hakila, yoze uli ku sule ya Njeshimone nyi? ²⁰ Halyapwila palumuka, Mwanangana! kulita nyi upale wa mbunge ye, palumuka! Muchipwa kuli yetu kumukunjika kukwo lya mwanangana." ²¹ Saulu yamba ngwenyi, "Akanuwayise kuli Yehova. Mumu hinwangwivwila keke. ²² Yenu, nukase chinyingi kanawa. Nunyingike nyi kuwana kuchihela kuze ana swame nyi yoze hamumonako. Hanangulweze yami ngwo wahyana kukanyama. ²³ Chocho talenu, nyi kunyingika ku yihela yeswe yize akuswama iye. Nukahiluke kuli yami nyi chinhyingi chamwenemwene, mba mungukahiluka nyi yenu. Nyi kali mu chihunda, ngumufupa hakachi ka tununu eswe a A-Yunda." ²⁴ Mba yakatuka nyi kuya ku Zife kulutwe lya Saulu. Mba Ndawichi nyi malunga jenyi te kali mu puya ya Mayone, mu Alapu ku sule ya Njeshimone. ²⁵ Saulu nyi malunga jenyi yaya nyi kumufupa. Alyoze Ndawichi yamulwezacho, chocho wapalumukine kuli mulundu wa mawe nyi kutwama mu puya ya Mayone. Muze Saulu hachivwa, yahangisa Ndawichi mu puya ya Mayone. ²⁶ Saulu yaya ku sali limwe lya mulundu, nyi Ndawichi nyi malunga jenyi yaya sali likwo lya mulundu. Ndawichi te kanalipupwisa kukatuka kuli Saulu. Muze Saulu nyi malunga jenyi kanaseleka Ndawichi nyi malunga jenyi hanga akakwate, ²⁷ mukeji wejile kuli Saulu nyi kwamba ngwo, "Tambukenu nwize, mumu akwa Filisitiya hanjila muchifuchi." ²⁸ Chocho Saulu wahilukile kakawile Ndawicchi nawa mba yaya nyi kulimika nyi akwa Filisitiya. Keshika chize chihela achilukile ngwo liwe lya ulamwino. ²⁹ Ndawichi yakatuka kuze nyi kuya nyi kutwama mu mbonge ya Engendi.