¹ Chocho Ndawichi yatuhukako ya lilamwina yaya ku chivwenge cha Ndulame. Muze ayayo nyi tatenyi evwile chino, yapalumukila kuli iye. ² Nyi mweswe mukwa lamba, nyi mweswe mukwa makongo nyi mweswe wevwile kupiha eswe alikungulukilile kuli iye. Ndawichi wapwile kapita ko. Apwile ngwe kulakaji awana a malunga. ³ Mba Ndawichi yatuhukako yaya ku Mizipa mu Moape. Yamba kuli mwanangana wa Moape, " Ngutayize kama tata nyi mama akaye hamuwika nyi yena ndo muze mungunyingika chize Zambi mangulingila." ⁴ Yawahichika nyi mwanangana wa Moape. Tatenyi nyi naye yatwama hamuwika nyi iye shimbu Ndawichi apwile mumbonge yenyi. ⁵ Mba kapulofeta Ngata yamba kuli Ndawichi, "Kanda utwama mumbonge ye. Katuka uye mu chifuchi cha Yunda." Chocho Ndawichi yatuhukako yaya mu yambu mu Heleta. ⁶ Saulu yevwa ngwo Ndawichi hanamuwana, hamuwika nyi malunga waze apwile no. Te Saulu kanatwama mu Ngimbya mushi lya mutondo mu Lama, nyi kunga yenyi mu kwoko, nyi ngamba jenyi eswe te kanamana kukamwihi nyi iye. ⁷ Saulu yamba kuli ngamba jenyi waze amanyine hakamwihi nyi iye," Panjikenu, atu ja Mbenjamine! Yono mwana wa Yese manwaha minda nyi mitondo ya uva nyi? kumanupwisa tupitau a tununu nyi tupitau a kulakaji, ⁸ keshika eswe hinwangutwama punga nyi? Wakuhi hali yenu yoze wakungulweza muze mwanami malingi usendo nyi mwana wa Yese. Nyi umwe mangulwezacho. Wakuhi hali yenu wakungulweza ngwo mwanami hanavundula kavumbi kami Ndawichi mukungujikinyina yami. Musono hanaswama nyi kushimbwila yami hanga akangulambe yami" ⁹ Mba Ndaoengi ka Endome, yoze wananyine mukamwihi nyi ngamba ja Saulu, Yakumbulula, "Ami namwene mwe mwana wa Yese kaneza ku Nombe, kuli Ahimeleki mwana wa Ahitumbe. ¹⁰ Yalemba kuli Yehova hanga akamukwase iye, yamwaha nyi yakulya nyi katana ka Ngolyate ka-Filisitiya." ¹¹ Mba mwanangana yatuma umwe hanga akasanyike sasendote Ahimeleki mwana wa Ahitumbe nyi zuwo lya tatenyi lyeswe, nyi sasendote waze apwile mu Nombe. Eswe ejile kuli mwanangana. ¹² Saulu yamba ngwenyi, "Panjika, ena mwana wa Ahitumbe." Yakumbulula ngwenyi, " Yami uno, mwata." ¹³ Saulu yamba kuli iye ngwenyi, " Kuchi te hiwangutwama punga, yena nyi mwana wa Yese, hiunamwehe kulya, nyi katana nawa hiunalembe kuli Zambi hanga akamukwase, hanga angukatukile nyi kungujikinyina, mu kuswama mu isweko chize chene analingi musono?" ¹⁴ Mba Ahimeleki yakumbulula mwanangana nyi kwamba ngwo, " Hakachi katuvumbi twenu iya kavumbi wa umwenemwene ngwe Ndawichi, yoze unapu tato-weno wa mwanangana nawa mukwa lutwe wa kufunga mwanangana mba nawa mulemu mu zuwo lyenu? ¹⁵ Te musono lye litangu yami kulemba kuli Zambi hanga akamukwase iye nyi? Chikapwe kusuku kuli yami! Mwanangana kanda nungwaha mulonga kuli yami kavumbi kenu hanji kuli akwa zuwo lya tata. Mumu kavumbi kenu yakuhi yize ananyingika kutwala kuli yino yuma yeswe." ¹⁶ Mwanangana yakumbulula, "Ene Ahimeleki, kumuofwa, yena nyi akwa zuwo lya tatenu eswe." ¹⁷ Mwanangan yamba kuli akwa kufunga mwanangana waze amanyine hakamwihi nyi iye, "Teulukenu nushihe asasendote ja Yehova. Mumu moko jo hamuwika ali nyi Ndawichi, nawa mumu anyingikine ngwo kanachina, alyoze ayo kangulwezelecho ko yami." Alyoze ngamba ja mwanangana katayile kwolola moko jo nyi kushiha asasendote ja Yehova. ¹⁸ Mba mwanangana yamba kuli Ndaoengi, "Teuluka ushihe asasendote." Chocho Ndaongi ka Endome wateulukile yashiha asasendote; tangwa lize yashiha atu makumi nake nyi atu atano waze azalile hina lya efonde. ¹⁹ Yashiha Nombe, chihunda cha asasendote, eswe malunga nyi mapwo, ana nyi akwa kwamwa, nyi ngombe, nyi yimbulu nyi mapanga, eswe yashiha nyi katana. ²⁰ Alyoze umwe mwana wa Ahimeleki mwana wa Ahitumbe, walijina lya Ambyatale, yalilamwina yachina kuli Ndawichi. ²¹ Ambyatale yalweza Ndawichi ngwo Saulu hashiha asasendote ja Yehova. ²² Ndawichi yamba kuli Ambyatale, " Ngunakanyingika ha tangwa lize, muze Ndaonge ka Endome wapwileho, ngwami pundu mambulwila Saulu. Hinashihisa atu eswe aku zuwo lya tatenu! ²³ Twama nyi yami kanda wivwa woma. Mumu yoze unafupu mwono we kanafupu nyi mwono wami. Mupwa kawape hamuwika nyi yami."