¹ Mba Ndawichi wejile ku Nombe hanga akamone sasendote Ahimeleki. Ahimeleki yapatwiza Ndawichi nyikuchikima nyi kwamba ngwo, "Kuchi te uli wika ukawe kuushi nyi umwe mukwenu?" ² Ndawichi yamba kuli sasendote Ahimeleki, "Mwanangana hanangutume yami kulinga milimo yimwe nawa hamba kuli yami ngwo,' kanda ulweza umwe hali pande jino ngunakutumu yena, nyi chize ngunakulweze.' Hinalilakenya nyi amwe akweze kutakana yena kumwe kuma. ³ Keshika yika yize uli nayo mu moko je? ngwehe mbolo jitanu chipwe cheswacho chili hano." ⁴ Sasendote yakumbulula Ndawichi nyi kwamba ngwo,"Mbolo yakuhi mu kwoko lyami, alyoze kuli lume mbolo jisandu- achi makweze malifunga ku mapwo." ⁵ Ndawichi yakumbulula sasendote, "pundu kutwalimwene nyi mapwo ha matangwa atatu, ngwe matangwa eswe muze nakatukanga. Mba yikwachilo yakweze yisandu chipwe ha milimo . chikwo nawa je mbolo japwa ngwe jeswajo se musono masalakanyisa jikwo jisandu mu yikwachilo!" ⁶ Chocho sasendote yawahana mbolo jisandu. Mumu kwapwile mbolo nyi jimwe shina jakutumbyeka, jize hachiza kumeso ja Yehova, muze masako mbolo ja kahya kusalakana jikwo halize tangwa ajimbachile. ⁷ Keshika umwe kavumbi wa Saulu wapwileho ha tangwa lize, te hamukwikako ku meso ja Yehova. Jina lyenyi wapwile Ndionge ka- Endome, iye mukwa lutwe ha tufunga ja Saulu. ⁸ Ndawichi yamba kuli Ahimeleki, " kushi nyi kunga chipwe katana hakamwihi? Mumu chambachile katana chipwe yitwa yami, mumu mu milimo ya mwanangana chayitamba kulinga fuji." ⁹ Sasendote yamba ngwo, "Katana wa Ngolyate ka - Filisitiya, yoze washihile mu chikulo cha Ela, tuli nenyi wakuvunga muhina kunyima lya efonde. Nyi ngwo unafupe ku mbata yoze, mbata, mumu yitwa yeka yakuhi kuno."Ndawichi yamba ngwo," Kukushi mukwo walita nenyi; ngwehenuye." ¹⁰ Ndawichi yakatuka yachina tangwa lize kukatuka kuli Saulu nyi kuya ku Akishe, mwanangana wa Ngata. ¹¹ Ngamba ja Akishe yamba kuli iye ngwo,"Au hi Ndawichi ko, mwanangana wa chifuchi? Ngwetu mwenawo embilile nyi kutawiza ha kuhangana cho ngwo, ' Saulu ha shiha tununu twenyi, nyi Ndawichi hashi tununu kumi nyi?"' ¹² Ndawichi wasele wano maliji ku mbunge nyi kwivwila woma Akishe, mwanangana wa Ngata. ¹³ Chocho yalumuna yilinga yenyi ku meso jo yalyonga kuzaluka hakachi ko; yasonyekasonyeka ha yajilo ya chikolo mba yazulumuna yileji ha wevu wenyi. ¹⁴ Mba Akishe yamba kuli ngamba jenyi ngwo, " Talenu, nunamono yono lunga hazaluka. Kuchi te hinwamuneha kuli yami? ¹⁵ Te yizaluke ngushi no, keshika nwaneha yono akapwe chizaluke ku meso jami nyi? kechi kunjila muzuwo lyami nyi?"