¹ Ndawichi yachina kukatuka ku Naiote mu Lama yeza yamba kuli Njonatasi, " Yika nalinga? chitela chami chika? mulonga wami kumeso ja tatenu uka, hanga azange kungushiha?" ² Njonatasi yamba kuli Ndawichi, "Hi chocho ko; kuushi kafwa. Tata kechi kulinga chuma chimwe chikehe chipwe chinene kwa kuhona kungulweza yami. Kuchi tata masweka chuma chino kwakuhona kungulweza yami? Hi chocho ko." ³ Alyoze Ndawichi yalishinga nawa nyi kwamba ngwo, "Tatenu kananyingika kanawa ngwo hingunawane vumbi kumeso je. Hahanjika ngwo,'Kanda nulweza Njonatasi hali chino, kuchina mevwa kupiha.' Alyoze chamwenemwene ni mwono wa Zambi, nyi mwono wa yena, shimbo yimuwika yiliho hakachi ka yami nyi kufwa." ⁴ Mba Njonatasi yamba kuli Ndawichi, " Cheswacho muhanjika, mungukulingilacho." ⁵ Ndawichi yamba kuli Njonatasi, "Hamene kakweji mwaha, mba mungukatwama hashi nyi kulya hamuwika nyi mwanangana. Alyoze ngutayize nguye, hanga ngukaswame mu wande ndo tangwa lya muchitatu chingoloshi. ⁶ Nyi ngwo tatenu mamona chishiho, mba ukahanjike ngwo, ' Ndawichi kalyumbile hanga akazomboke kuya ku Mbeteleme kuchihunda chenyi; mumu malambula mulambu ya mwaka wa usoko wo eswe.' ⁷ Nyi ngwo mamba ngwo, 'Chipema,' mba yami ka vumbi ke mungupwa nyi sambukila. Alyoze nyi ngwo kanatenuka chikolo, mba ena unyingike ngwo hanasakula chize chipi. ⁸ Keshika ngulingile vumbi yami ka vumbi ke. Mumu hiuna kolesa usendo wa Yehova nyi yena. Alyoze nyi ngwo muli upi muli yami, ngushihe yenamwene; Mumu kuchi te munguneha kuli tatenu?" ⁹ Njonatasi yamba ngwo, "Chikapwe kusuku hali yena! Nyi nanyingika ngwo tata kanakuhalila chipi, kachi nakulwezele nyi?" ¹⁰ Mba Ndawichi yamba kuli Njonatasi, Iya mangulweza nyi ngwo tatenu makukumbulula nyi utenu?" ¹¹ Njonatasi yamba kuli Nndawichi, " Tweya, tuye mu wande." Chocho esswe aali ayile mu wande. ¹² Njonatasi yamba kuli Ndawichi, "Yehova, Zambi wa Yizalele, apwe chela. Muze mungukahula tata hali yino yene shimbu hamene, chipwe tangwa lya muchitatu, ukatale, nyi ngwo kanevu kanawa hali yena Ndawichi, yami mungukatuma hanga akakulwezecho nyi? ¹³ Nyi ngwo chihawahila tata kulinga chipi hali yena, Yehova akalinge chikolo kuli Njonatasi nyi ngwo shikakulwezacho nyi kukushika ukaye nyi sambukila. Yehova apwe hamwe nyi yena, chizechene hanapu nyi tata. ¹⁴ Nyi ngwo nguli nyi mwono, ushikangulweza usendo wa mwenemwene wa Yehova, hanga kanda ngufwa? ¹⁵ Kanda uteta usendo wa mwenemwene kukatuka kuzuwo lyami ndo kumyaka wamutolo - chipwe muze Yehova mateta eswe akwa kole ja Ndawichi kukatuka hachifuchi." ¹⁶ Chocho Njonatasi yalinga usendo nyi zuwo lya Ndawichi nyi kwamba ngwo, "Yehova akalambe akwa kole ja Ndawichi." ¹⁷ Njonatasi yashingisa Ndawichi nawa mumu wa zango lyenyi hali iye, mumu wamuzangile ngwe chizechene azangile mwono wenyi. ¹⁸ Mba Njonatasi yamba kuli iye, "Hamene kakweji muhya. Makufupa mumu chitwamo che muchipwa chamokomoko. ¹⁹ Muze hiwatwama matwangwa atatu, ukashikumuke kawashi mba ukeze ku chihela kuze muukaswama hatangwa lya pande jino, ukatwame kuli liwe lya Ezele. ²⁰ Mungukonga mivu yitatu kusali limwe lyacho, ngwe ngunase chuma chimwe. ²¹ Mba mungukatuma mukeji wami nyi kwamba kuli iye ngwo, 'Yako ufupe mivu.' Nyi ngwo mungukamba kuli mukweze, ' Tala, mivu ili kusali ya yena; anda," mba ukeza; mumu nyi mwono wa Zambi sambukila yili nyi yena, nyi utoji wakuhi. ²² Alyoze nyi ngwo mungukahanjika kuli mukweze ngwami, 'Tala, mivu yili kulutwe lye,'mba ukaye jila ye, mumu Yehova hakutuma kuya. ²³ Mumu ha usendo hakutwala ku chuma chino hitwamba hali yena nyi yami, tala, Yehova kali hakachi ka yena nyi yami ndo kumyaka ya mutolo.'" ²⁴ Chocho Ndawichi waswamine mu wande. Muze kakweji wahya ejile, mwanangana yatwama kutambula kulya. ²⁵ Mwananga yatwama hachitwamo chenyi, ngwe matangwa eswe, ha chitwamo ku yishimi. Njonatasi yamana, nyi Ambinele watwamine kulumbu lya Saulu. Alyoze chihela cha Ndawichi chapwile chamokomoko. ²⁶ Hindu Saulu ha tangwa lize kambile nyichimwe, mumu wanyongene ngwenyi," chimwe chuma hichinalingika kuli iye. Iye kapemene; pundu kapemene." ²⁷ Alyoze hatangwa lya muchali, lyakukaula kakweji muhya, chihela cha Ndawichi chapwile chamokomoko. Saulu yamba kuli mwanenyi Njonatasi, "Kuchi te mwana wa Yese kejile kutambula kulya kwiza chipwe zau chipwe musono?" ²⁸ Njonatasi yakumbulula Saulu, "Ndawichi walyumbile yangwita lisesa ya kuya ku Mbeteleme. ²⁹ Yamba ngwo, 'Ngutayize kama nguye. Mumu usoko kakaulambula mu chihunda, mba yaya hangwamba ngwenyi chakutamba kupwako. Halyapwila nyi ngo mungwivila vumbi, ngutayize kama ngukaye ngukamone ayaya jami.' Keshika kejile ku mesa ya mwanangana." ³⁰ Mba Saulu yatenukila chikolo Njonatasi, yamba kuli iye, "Ena mwana wa chihulya, pwo mukwa kupiha! Te chanyingikine hiunatongola mwana wa Yese chikapwe sonyi ja yena, nyi ja uselesele wa noko? ³¹ Mumu shimbu mwana wa Yese matwama nyi mwono ha chifuchi, chipwe yena chipwe wanangana we kuchi kakola. Keshika, tuma amusake akamunehe kuli yami, mumu pundu mafwa lume." ³² Njonatasi yakumbulula tatenyi Saulu, "Kuchi te mamushiha? Yika alinga?" Mba Saulu yakonga kunga yenyi hanga amushihe. ³³ Chocho Njonatasi yanyingika ngwo tata hasa mbunge yenyi kushiha Ndawichi. ³⁴ Njonatasi yakatuka ku mesa nyi kutenuka chikolo mba kalileho nyi chakulya nyichimwe ha tangwa lyamuchali lya kakweji, mumu ha chinhyengo cha Ndawichi, mumu tato hamukolesa sonyi. ³⁵ Chimenemene, Njonatasi wayile mu wande kuze halilakenya nyi Ndawichi, apwile nyi mukweze. ³⁶ Yamba kuli mukweze, "Zomboka ufupe mivu yize mungukonga." Muze mukwe mazomboka, yakonga mwivu kulutwe lyenyi. ³⁷ Muze mukweze ejile hachihela chize mwivu waholokele uze Njonatasi wakongele, Njonatasi yatambika mukweze, nyi kwamba ngwo, "Mwivu kulutwe lye uli nyi?" ³⁸ Mba Njonatasi yatambika mukweze,"Zomboka, kawashi, kanda utwama!" Chocho mukweze yanda mivu yeza kuli mwata wenyi. ³⁹ Alyoze yoze mukweze kanyingikine nyichimwe. Ndo Njonatasi nyi Ndawichi wika anyingikine. ⁴⁰ Njonatasi yahana yitwa yenyi kuli mukweze nyi kwamba kuli iye ngwo, "Yako, twala ku chihunda." ⁴¹ Muze mukweze haya, Ndawichi yakatuka ku liwe sali lya ku sule, yafulamana hashi, nyikuhetama katatu. Yalimbeja nyi kulila umwe nyi mukwo, Iye Ndawichi yalila chikolo. ⁴² Njonatasi yamba kuli Ndawichi, "Yako nyi sambukila, mumu etu tulyeswe hitunalishingi nyi jina lya Yehova nyi kwamba ngwo, 'Yehova apwe hakachi ka yena nyi yami, nyi hakachi ka chisemuko chami nyi chisemuko che, ndo kumyaka ya mutolo.'" Mba Ndawichi yakatuka mba yaya, nyi Njonatasi yahiluka mu limbo.