¹ Saulu yamba kuli mwanenyi Njonatasi nyi kuli ngamba jenyi eswe ngwo akashihe Ndawichi. Alyoze Njonatasi, mwana wa Saulu, wazangile chikolo Ndawichi. ² Chocho Njonatasi yalweza Ndawichi, " Taata Saulu kanafupu ku kushiha yena. Keshika kanyama kanawa hamene chimenemene ukaswame muchiswamino chimwe. ³ Mungukatuhuka nyi kumana hamwe nyi taata mu wande muze uli, mungukahanjika kuli tata hali yena. Nyi mungwivwa chuma chimwe, mungukulweza." ⁴ Njonatasi yahanjika kanawa kuli tato Saulu kutwala kuli Ndawichi nyi kwamba kuli iye ngwo, " Mwanangana kanda avulumuna mumu hali Ndawichi ngamba ye. Mumu iye kavulumwine hali yena, nyi ilinga yenyi hiyaneha kuwaha kuli yena. ⁵ Mumu iye wanjile mwono wenyi nyi kuwusa mu kwoko lyenyi hanga akashihe akwa Filisitiya. Yehova wanehene kukumba chinene hali a Yizalele. Kuwachimwene nyi yena yiuwahilila. Kuchi te muvulumuna manyinga keshi mulonga haku shiha Ndawichi kwakuhona mulonga?" ⁶ Saulu yevwilila Njonatasi. Saulu yalishinga ngwenyi, " Nyi mwono wa Yehova , keshi kamushiha." ⁷ Mba Njonatasi yasanyika Ndawichi, Nyi Njonatasi yamulweza yuma yeswe yino. Njonatasi yaneha Ndawichi kuli Saulu, nawa wapwile kumeso jenyi ngwe chizechene walingile ku nyima. ⁸ Kwapwile nawa jita, mba Ndawichi wayile nawa washile jita nyi akwa Filisitiya mba yashiha anji chikolo. Yachina kumeso jenyi. ⁹ Shipilitu mupi kukatuka kuli Yehova yeza hali Saulu muze te hatwama muzo lyenyi kali nyi kunga mukwoko lyenyi, shimbu Ndawichi wembile kalyalya. ¹⁰ Saulu yeseka kumupalakenya Ndawichi ku yishimi nyi kunga, alyoze yachina kukatuka kumeso ja Saulu, chocho kunga yomulikwata mu yishimi. Ndawichi yachina yalilamwina ufuku uze. ¹¹ Saulu yatuma mikeji ku zuwo lya Ndawichi hanga akamutale hanga akamushihe mu chimenemene. Mikale, pwo lya Ndawichi, yamulweza, " Nyi kwalilamwinyine mwono we ufuku wuno, hamene kumakushiha." ¹² Chocho Mikale yasosa Ndawichi ku Njanela. Yaya mba yachina, yalilamwina. ¹³ Mikale yanda umwe kaponya wa muzuwo ya mupombesa ha muhela. Yasa mushachilo wa wona wa pembe ku mutwe wenyi, nyi kumufuka nyi mazalo. ¹⁴ Muze Saulu yatuma mikeji hanga akambate Ndawichi, Iye Mikale yamba ngwo, "Kanayiji." ¹⁵ Mba Saulu yatuma mikeji kumumona Ndawichi; yamba ngwenyi, " Munehenu kuli yami nyi we muhela wenyi, hanga ngumushihileho." ¹⁶ Muze mikeji anjilile, kutala, kaponya wa muzuwo wapwile ha muhela hamwe nyi chishachilo cha wono wa pembe ku mutwe wenyi. ¹⁷ Saulu yamba kuli Mikale, "Kuchi te wangwonga nyi kwecha mukwakole yami kuya, hanga alilamwine? " Mikale yakumbulula Saulu," Iye wambanga kuli yami ngwo, 'Ngweche kama nguye. Ngukushihile yika?"' ¹⁸ Keshika Ndawichi yachina yalilamwina, Yaya kuli Samwele ku Lama yamulweza yeswe yize Saulu amulinga. Mba iye hamuwika nyi Samwele yaya nyi kutwama ku Naiote. ¹⁹ Atu yambulwila Saulu,kwamba ngwo, " Talenu, Ndawichi kali ku Naiote mu Lama." ²⁰ Mba Saulu yatuma mikeji hanga akatwate Ndawichi. Muze hamona mbunga ya apulofeta kanapulofuteza, nyi Samwele kanamana ngwe mukwa lutwe hakachi ko, Shipilitu ya Zambi yo muyiza hali mikeji ya Saulu, nyewo yapulofeteza. ²¹ Muze Saulu yamulweza chino, yatuma mikeji akwo nawa, nyewo nawa yapulofeteza. Chocho Saulu yatuma mikeji chisuho chamu chitatu, nawa yapulofeteza. ²² Mba iye nawa yaya ku Lama mba yeza ku shima linene lili ku Seku. Yahula, " Samwele nyi Ndawichi kuli ko ali? " umuwika yamba ngwenyi, "Talenu, kali ku Naiote mu Lama." ²³ Saulu yaya ku Naiote mu lama. Mba Shipilitu ya Zambi yo muyiza hali iye, muze ayile wapulofetezele ndo muze haheta ku Naiote mu Lama. ²⁴ Yachiza mazalo jenyi nyi iye yapulofeteza ku meso ja Samwele. Yapomba uselesele tangwa lize nyi ufuku weswe. Keshika kakuhula ngwo, "Saulu hakachi ka pulofeta ali nyi? "