¹ Muze iye hahwisa kuhanjika kuli Saulu, mbunge ya Njonatasi yililinunga nyi mbunge ya Ndawichi, nyi Njonatasi yamuzange ngwechizechene azanga mbunge yenyi. ² Saulu yamutambula Ndawichi; kamutayijile kuhiluka kuzuwo lya tatenyi. ³ Mba Njonatasi nyi Ndawichi akolesele usendo wo mumu Njonatasi yamuzanga ngwe chizechene azanga mbunge yenyi. ⁴ Njonatasi yazula mazalo jenyi waze apwile nyi kuzala mba yawana kuli Ndawichi hamuwika nyi yuma yenyi yakuzwela nacho, nyi katana, nyi uta wenyi, nyi muya wenyi. ⁵ Ndawichi wayile kweswako Saulu wamutumine, iye wachilingile nyi mana. Saulu yamusa helu ya tujita twenyi. Chino chapemenene atu eswe hamuwika nyi ngamba ya Saulu. ⁶ Chapwile te hakuhiluka mu kushiha akwa Filisitiya, ana amapwo eswe a mulimbo ya Yizalele ejile, kanembi nyi kukina, hanga akatakane mwanangana Saulu, apwile nyi tumikupyela, nyi kulikwiza, nyi tuyisaji. ⁷ Mapwo alitawijile umwe nyi mukwo nyi kwimba. Yemba: " Saulu hashiha tununu twenyi, mba Ndawichi hashiha makumi jenyi atununu." ⁸ Saulu yatenuka chikolo, nyi mwaso wuno wamupihilile. Yamba ngwenyi, " Hahana kuli Ndawichi makumi atununu, alyoze hahana wika tununu kuli yami. Chika chamusala shina wanangana wika?" ⁹ Chize ku tangwa lize Saulu yamutala Ndawichi mumu wapwile nyi kumunyongena ngwo tangwa limuwika kumapwa mwanangana. ¹⁰ Tangwa lyakawileho shipilitu mupi kukatuka kuli Zamba wejile nyi tachi hali Saulu mba yapulofeteza mu zuwo. Chocho Ndawichi yemba kalyalya kenyi, ngwechizechene apwile nyikulinga matanwa eswe. Saulu te kali nyi kunga mu kwoko lyenyi. ¹¹ Saulu yakonga kunga, mumu wambile mumbunge yenyi ngwo, " Ngumupalakenya kuyishimi." Alyoze Ndawichi yalieha kaali kumeso jenyi . ¹² Saulu wevwilile woma wunji Ndawichi, mumu Yehova kwali hamuwika nenyi, alyoze keshi nyi Saulu. ¹³ Chocho Saulu yakatwisa Ndawichi kumeso jenyi yamusela kupwa kapitau wa kanunu. Ndawichi watuwhokele nawa yanjilanjila kumeso ya atu. ¹⁴ Ndawichi walingile nyi mana muyuma yeswe, mumu Yehova wapwile hamwe nenyi. ¹⁵ Muze Saulu yamona ngwo Ndawichi walingile nyi mana, yamuvwila woma. ¹⁶ Alyoze A-Yizalele nyi A-Yunda azangile Ndawichi, mumu iye watuwhokele nyi kunjilanjila kumeso jo. ¹⁷ Mba Saulu yamba kuli Ndawichi, " Tala Melembu mwanami mukulwana. Mungukwahaye akapwe pwo lye. Pwako wika chitakame chami ukashile jita Yehova." Mumu Saulu yanyonga ngwenyi, " Kwoko lyami kanda lipwa hali iye, alyoze kwoko lya Akwa Filisitiya likapwe hali iye." ¹⁸ Ndawichi yamba kuli Saulu, " Ami kuchi napwa, mba usoko jami aya, chipwe munyachi wa tata mu Yizalele kuchi wapwa, ngukapwe tato-weno wa mwanangana?" ¹⁹ Hindu ha shimbu yize Melambu, mwana wa Saulu wapwo, azangile kumuhana kuli Ndawichi, te amuhanyine kuli Andiele ka-Meholate kupwa pwo lyenyi. ²⁰ Alyoze Mikale, mwana wapwo wa Saulu, azangile Ndawichi. Yalweka Saulu, chino chamupemenene iye. ²¹ Mba Saulu yanyonga, " Ngumuhana kuli iye, hanga akapwe kambwili kuli iye, nawa hanga kwoko lya akwa Filisitiya likalimike nenyi." Chocho Saulu yamba kuli Ndawichi chisuho chamuchali, " Yena muopwa tato-weno." ²² Saulu yatuma ngamba yenyi, " Hanjikenu nyi Ndawichi kutenga, kwamba ngwo, ' Tala, mwanangana kanakuzange chikolo, nyi ngamba jenyi eswe kanakuzange. Halyapwila, pwako tato-weno wa mwanangana."' ²³ Chocho ngamba ja Saulu yahanjika wano maliji kuli Ndawichi. Mba Ndawichi yamba ngwenyi, " Chinapu chuma chilelu kuli yenu kupwa tato-weno wa mwanangana, mumu nguli chiswale, mutu mulelu lume?" ²⁴ Ngamba ja Saulu ya mulweza maliji waze Ndawichi ahanjikanga. ²⁵ Mba Saulu yamba ngwenyi, " Hanjikenu chino kuli Ndawichi, ' Mwanangana kafupile yihako yikwo shina misosha ya kulakaji lya A-Filisitiya akaikale hali akwa kole."' Halyapwila Saulu yanyonga ngwenyi Ndawichi mafwa kuli A-Filisitiya. ²⁶ Muze ngamba jenyi alwezele Ndawichi maliji wano, chamuwahilile Ndawichi kupwa tato-weno wa mwanangana. ²⁷ Matangwa te kanda ahwa, Ndawichi wayile nyi malunga jenyi nyi kushiha kulakaji aali a A-Filisitiya. Ndawichi yaneha misosha, yayihana yeswe kuli mwanangana, hanga akapwe tato-weno wa mwanangana. Chocho Saulu wahanyine Mikale mwanenyi wapwo kupwa pwo lyenyi. ²⁸ Mba Saulu yamona, nawa yanyingika ngwo Yehova kali nyi Ndawichi, nawa Mikale, mwana wapwo wa Saulu, amuzangile, ²⁹ Saulu wevwilile woma wunji Ndawichi. Saulu yapwa mukwa kole kuli Ndawichi mu matangwa eswe. ³⁰ Myanangana a A-Filisitiya ejile kujita, alyoze jila yeswe atuhwokele, Ndawichi walingile nyi mana kuhyana ngamba eswe ja Saulu, Keshika jina lyenyi lyafumanyine.