¹ Mba akwa A-Filisitaya yakungulwila maswalale jo kujita. Yakungulukila ku Soko, yize yapwa ya Yunda. yasa yilombo yo hakachi ka Soko nyi Azeka, mu Elfesendami. ² Saulu hamwe nyi malunga ja Yizalele yakunguluka nyi kusa yilombo yo mu mungulunga wa Ela, yasa nyi mufunda wa jita hanga akaliwane nyi akwa A-filisitiya. ³ Akwa A-Filisitiya yamana ku sali lya mulundu umwe, nawa akwa Yizalele yamana hamulundu kusali likwo hakachi ko hapwile mungulunga. ⁴ Walunga umwe chitakame watachi wakatukile mu chilombo cha akwa A-Filisitiya, jina lyenyi Ngolyate waku Ngate. Kusuhwa chenyi mbandu jisambano nyi chihanda. ⁵ Wapwile nyi Ngalau ya unengu ha mutwe wenyi, nyi chikuto cha utale. Chikuto chalemene tununu atano a shekele ja unengu. ⁶ Wazalile yuma ya unengu hamolu jenyi nawa wapwile nyi kunga ya unengu hakachi kayipaya yenyi. ⁷ Chikundo cha kunga lyenyi chapwile chinene, yapwile nyi wina wakukashilako tambo hakumbila ngwe nguji lya kuseleka nalyo. Kulutwe lya kunga lyenyi lyalemene kulakaji jisambano ja utale. Mukwakumumbachila lukepwe wenyi wamutetekelele. ⁸ Yamana nyi kukolojoka kuli maswalale akwa Yizalele, "Kuchite hinwatuhuka nyi kululika mikana yenu ha jita? Ami nguli Kafilisitiya, nawa yenu nuli ngamba ja Saulu nyi? Sakulenu walunga hakachi kenu nawa echenu akeze kuli yami. ⁹ Nyi ngo kumahasa ku zwela nyi yami nyi kungushiha yami, mba mutu kapwa ngamba jenu. Alyoze nyi ngo namukumba nyi kumushiha, mba munupwa ngamba jetu nawa munutuzachila." ¹⁰ Nawa akwa A-Filisitiya yamba ngwo, " Ngunatombo maswalale akwa Yizalele musono uno. Nguhanenu lunga yoze munguzwela nenyi. " ¹¹ Muze Saulu nyi akwa Yizalele eswe evwile chize akwa Filisitiya ambile, alishimwokene nawa evwile woma wunji. ¹² Halyapwila Ndawichi wapwile mwana walunga wa Efulata wa ku Mbeteleme mu Yunda, jina lyenyi Yese. Wapwile nyi ana amalunga nake. Yese wapwile te mukwalana chikolo mu matangwa a Saulu, mukulwana chikolo hakachi ka malunga. ¹³ Ana atatu amakulwana amalunga te hanakaula Saulu ku jita. Nyi majina ja waze ayile ku jita apwile Elyambu mutangu, wamuchali wapwile Abinandambu, nyi wamuchitatu wapwile Shama. ¹⁴ Ndawichi iye wapwile kanuke hali ayo. Atatu amakulwana akawile Saulu. ¹⁵ Mba Ndawichi te mahiluka nawa maya hakachi ka maswalale ja Saulu nyi mapanga ja tato ku Mbeteleme, hanga akawalise. ¹⁶ Ha matangwa makumi awana mukwa ka Filisitiya lunga watachi wejile chimenemene nyi chingoloshi kulisolola mwene ku jita. ¹⁷ Mba Yese yamba kuli mwanenyi walunga Ndawichi, " Anda efa ya mbuto yumu nyi kumi lya mbolo, ukatwale kawashi ku chilombo cha ayayenu. ¹⁸ Nawa ukatwale kumi lya keju kuli kapitau wa tununu wo. Utale ayayenu chize anatwame nawa ukanehe chuma chimwe chize muchika solwesa ngo kali kanawa. ¹⁹ Ayayenu kali hamuwika nyi Saulu nyi malunga eswe a Yizalele mu mungulunga wa Ela, kwasa jita nyi akwa Fiwlisitiya." ²⁰ Ndawichi wakatukile chimenemene nawa yahichika mapanga nyi kafunga. Yambata yuma yeswe mba yaya, ngwe chizechene Yese amulwezanga. Yeza ku chilombo shimbu lize chizavu cha maswalale apwile nyi kuya kujita kanakomyoka ha jita. ²¹ Mba Yizalele nyi akwa Filisitiya alilulikile kwasa jita, chizavu cha maswalale kutalangana nyi chizavu chikwo nawa. ²² Ndawichi yahichi yikwata yenyi kuli kafunga wa yiteli, yaya fuji kuli chizavu chamaswalale, yameneka ayayenyi. ²³ Shimbu machihanjika no, lunga wa tachi, mu kwa Filisitiya waku Ngate, jina lyenyi Ngolyate, watuhukile mu maswalale akwa Filisitiya, mba yahanjika maliji waze wene nawa, mba Ndawichi ya wevwa. ²⁴ Muze te malunga eswe akwa Yizalele umumwene yoze lunga, yachina kukatuka kuli iye nawa evwile woma wunji. ²⁵ Malunga ja Yizalele yamba ngwo," Unamumono yoze lunga uze wakanduka? Heza mukutomba Yizalele. Mwanangana kumahana upite unene kuli lunga yoze ma kamushiha, nawa mamwaha mwanenyi kumbata, mba matusula munyachi wa tato mu Yizalele." ²⁶ Ndawichiyamba kuli malunga aze amujingilikile, " Chuma chika chize mamulingila mutu yoze mahashiha yono mukwa Filisitiya nawa makachiza luchoko yono kuli a Yizalele? Iya yono ka Filisitiya chilima unanhase kutomba maswalale a Zambi wa mwono? ²⁷ Mba atu yahanjika nawa chize apwile nyi kwamba nawa yamulweka, " Chocho muchikapwa kuli mutu yoze makahasa kumushiha." ²⁸ Eliyambu yayenyi wamukulwana wevwile muze te kanachihanjika nyi malunga. Elyambu yapwa nyi utenu kutenukina Ndawichi, nyi kwamba ngwo, " Kuchi te hiweza kuno? Iya yoze hunahichikila mapanga akepe mu puya? Ngunanyingika kulengumuka che nyi kuhuka cha mbunge ye; mumu hiweza ku kuno hanga ukamone jita." ²⁹ Ndawichi yamba ngwo, " Chuma chika nalinga kevwe? Kuchapwile chihula wika?" ³⁰ Yakindulukila kukatuka kuli iye nyi kutalangana mukwo nawa, nyi kuhanjika chizechene. Atu amukumbulwile chizechene nawa. ³¹ Muze maliji waze Ndawichi ahanjikile awevwile, maswalale yalweza waze maliji kuli Saulu, yatuma kutambika Ndawichi. ³² Mba Ndawichi yamba kuli Saulu, " Nyiumwe kanda alezumuka mu mbunge mumu ya Filisitiya; ngamba yenu maya nyi kuzwela nyi yono muka Filisitiya." ³³ Saulu yamba kuli Ndawichi, "Kuwahashile kuya kuli yono muka Filisitiya nyi kuzwela nenyi; mumu uchili mukweze, neye hapwa kajita chize ku ukweze wenyi." ³⁴ Alyoze Ndawichi yamba kuli Saulu, " Ngamba yenu wapwile nyi kufunga mapanga atatenyi. Muze te ndumba chipwe usu machiza panga ku tanga, ³⁵ namukawile yingumulamba, nyi kumuchiza mukanwa lyenyi. Muze mangukatukila, mungumukwata ku uzangi wenyi, nyi kumulamba nyi kumushiha. ³⁶ Ngamba yenu hanashiha ndumba nyi usu eswe aali. Yono chilima cha ka Filisitiya kumapwa ngwe umwe hakachi ko, mumu hatomba maswalale ja Zambi wamwono." ³⁷ Ndawichi yamba ngwenyi, " Yehova yoze wangupulwile ku tachi ja ndumba nyi ku tachi ja usu. Iye kumakangupulula ku kwoko lya yono ka Filisitiya." Mba Saulu yamba kuli Ndawichi, " Yako, Yehova apwe nyi yena." ³⁸ Saulu yajika Ndawichi mazalo a jita enyi. Yasa ngalau ya unengu ha mutwe, nawa yamujika chikuto cha utale. ³⁹ Mba Ndawichi yalijichika katana ha mazalo jenyi. Alyoze kahashile kwenda, mumu iye kakalilongesele nayo ko. Mba Ndawichi yamba kuli Saulu, " Kunguchihuhasa kuya nyi kuzwela nyi yino, mumu kunalilongesele nayo ko. " Chocho Ndawichi yazula. ⁴⁰ Yambata mulumbu wenyi mukwoko lyenyi mba yasakula mawe atanu kuchitwewe; yasa mu katuku ka kafunga kaze apwile nako te mu ngonga nyenyi. Yakwata chikapa chenyi mukwoko cha kukonga nacho mawe yakundama wkuli ka Filisitiya. ⁴¹ Ka Filisitiya yeza nawa yakundama Ndawichi, hamuwika nyi yoze mukwa kumumbachila lukepwe te kanatetekela. ⁴² Muze te Ka Filisitiya ya tala mba yamona Ndawichi, yamulelesa, mumu te wapwile mukweze, muchila, mupema kumeso. ⁴³ Mba Ka Filisitiya yamba kuli Ndawichi, " Te nguli kawa, se uneza kuli yami nyi mbwechi?", ka Filisitiya yashinga Ndawichi nyi majina a mazambi jenyi. ⁴⁴ Ka Filisitiya yamba kuli Ndawichi, "Tweya kuli kuno, ngukahana musunya we kuli tujila a mwilu nyi kuli tushitu a mu yambu." ⁴⁵ Ndawichi wakumbulwile kuli muka Filisitiya, "Yena kuwuneza kuli yami nyi katana, nyi kunga nyi kunga lyaku konga. Alyoze yami nguneza kuli yena ni jina lya Yehova wa tujita, Zambi ya maswalale a Yizalele waze hiwatomba. ⁴⁶ Musono Yehova kuma kukunjika yena mu mokwo jami, mba mungukushiha nyi kuchiza mutwe we kukatuka ku mujimba we. Musono munguhana mujimba ya ka Filisitiya ku tujila a mwilu nyi kuli tushitu a mu yambu ahano hashi, hanga akwa hashi eswe akanyingike ngwo kwatama Zambi mu Yizalele, ⁴⁷ nawa wano eswe akunguluka kuno akanyingike ngwo Yehova keshi kulamwina nyi katana chipwe kunga. Mumu jita ya Yehova nawa neye makuhana mu muko jetu." ⁴⁸ Muze ka Filisitiya yahinduka nyi ku mukundama Ndawichi, chocho Ndawichi yazomboka fuji kutalangana nyi mu kwa kole yenyi hanga akaliwane. ⁴⁹ Ndawichi yanjisa kwoko lyenyi mu ngonga, yachizamo liwe, yalikonga, yililamba ka Filisitiya ha huma, liwe yilinjila mu huma lya ka Filisitiya, yalimbukila hashi. ⁵⁰ Ndawichi yakumba ka Filisitiya nyi liwe lya konga nyi chikapa. yalamba ka Filisitiya nawa yamushiha. Ku kwapwile katana mu kwoko lya Ndawichi. ⁵¹ Chocho Ndawichi yazomboka yaya kuli ka Filisitiya yanda nyi katana kenyi, nyi kumutomona chindalo chenyi, nyi kumushiha, yamutapa mutwe. Muze akwa Filisitiya yamona ngwo chitakame cho hafwa, yachina. ⁵² Mba malunga a Yizalele nyi a Yunda yakatuka nyi kukolojoka, nyi kuhangisa akwa Filisitiya ndo kuheta ku mungulunga nyi yikolo ya ku Ekoloni. Akwa kufwa aku Filisitiya yapomba mujila ya kuya ku Shaalaimi, ku heta ndo ku Ngate nyi Ekoloni. ⁵³ Atu akwa Yizalele yakinduluka hakuhanga akwa Filisitiya, yapupa chilombo cho. ⁵⁴ Ndawichi yambata mutwe wa kwa Ka Filisitiya yauneha ku Yelusaleme, alyoze yasa mazalo jenyi mu mbalaka. ⁵⁵ Muze Saulu yamona Ndawichi kanayi kulimika nyi akwa Filisitiya, yamba kuli Ambenele, kapitau wa maswalale, " Ambenele, auze mukweze mwana waya?" Ambenele yamba ngwo, " Mwanangana, nyi mwono wenu, chanyingikine." ⁵⁶ Mwanangana yamba ngwenyi, " Hula waze anahase kunyingika, yono mwana lunga mwana waya." ⁵⁷ Muze Ndawichi ha hiluka ku kushiha ka Filisitiya, Ambenele yamumbata, yamuneha kuli Saulu nyi mutwe wa ka Filisitiya mu kwoko lyenyi. ⁵⁸ Saulu yamba kuli iye, "Ulimwana waya, mukweze?" Ndawichi yakumbulula, " Nguli mwana wa ngamba yenu Yese wa ku Mbeteleme.