¹ Yehova yamba kuli Samwele," Ndo mwiji muka mukalishimwoka hali Saulu, mumu hinalitunaye kupwa mwanangana ya Yizalele? Zalisa mbinga ye nyi maji nawa ukaye. Mungukutuma kuli Yese waku Mbeteleme, mumu hinalisela mwanangana hakachi ka anenyi amalunga. ² Samwele yamba ngwenyi, " Kuchi te munguhasa kuya? Nyi Saulu ma chivwa chocho, iye mangushiha." Yehova yamba ngwenyi, " Twala chimbembe cha chihwo nawa ukambe ngwo, ' Ngunayi nyi kulambula kuli Yehova'. ³ Ine usanyike Yese eze ku chitapo, mba munguka kulweza chize mukalinga. Mukawayisa nyi maji yoze mungu kakulweza." ⁴ Smwele yalinga chizechene Yehova yamwamba mba yaya ku Mbeteleme. Makulwana achihunda yamupatwiza nyikuchikima mba yamba ngwo, " Nuneza nyi sambukila?" ⁵ Yamba ngwenyi, " Nyi sambukila nguneza kulambula chitapo kuli Yehova. Lilulikenu nulisele ku usandu mba nwize hamuwika nyi yami ku chitapo. " Mba yasela ku usandu Yese nyi ana jenyi nawa yawasanyika ku chitapo. ⁶ Muze ejile, iye yatala hali Eliambu yamba kuli iye mwene ngwo pundu yoze mamuwahisa kuli Yehova kwali. Kanamana kumeso jami. ⁷ Alyoze Yehova yamba kuli Samwele, " Kanda utala ku meso jenyi, chipwe ku chizundamo chenyi ; mumu hinalitunaye. Mumu Yehova kamwene ngwe atu akumona; Atu kakutala hakusoloka cha haze, alyoze Yehova kakumona mu mbunge." ⁸ Mba Yese yasanyika Ambinandambe akapalike ku meso ja Samwele. Mba Samwele yamba ngenyi, " Chipwe yono Yehova kamutongwele." ⁹ Yese Yapalikisa Shama, alyoze Samwele yamba ngwenyi, " Chipwe yono Yehova kamutongwele." ¹⁰ Yese yapalikisa ana jenyi amalunga shimbyali ku meso ya Samwele. Mba Samwele yamba kuli Yese, " Yehova katongwele wano." ¹¹ Mba Samwele yamba kuli Yese," Wano e ana je eswe?" Yakumbulula ngwo, "Kwasala mwe kasulasongo, alyoze kanafungu mapanga."Samwele yamba kuli Yese, " Tuma amusake; mumu kutuchi kutwama ndo meza kuno." ¹² Yese yatuma mba yamuneha. Halyapwila iye te kapwile muchila chikolo nyi meso jenyi apwile apema nawa kanawaha chikolo kumutala. Yehova yamba ngwenyi, " Katuka, umuwayise; mumu mwe iye." ¹³ Mba Samwele yanda mbinga ya maji yamuwayisa hakachi ka ayayo amalunga. Mba Shipilitu ya Yehova yeza nyi tachi hali Ndawichi chize hatangwa lize. Mba Samwele yakatuka yeza ku Lama. ¹⁴ Shipilitu ya Yehova te hakatuka kuliSaulu, alyoze shipilitu mupi kukatuka kuli Yehova yamupinjisa. ¹⁵ Ngamba ya Saulu yamba kuli iye ngwenyi, Talenu, shipilitu mupi kukatuka kuli Yehova kanakupinjisa. ¹⁶ Enu mwata wetu nutume ngamba jenu waze ali kumeso jenu tufupe unanyingika kwimba kalyalya kanawa. Mba muze shipilitu mupi kukatuka kuli Yehova kali hali yena, iye makemba kalyalya mba munukapwa kanawa. ¹⁷ Saulu yamba kuli ngamba jenyi, " Fupenu lunga yoze unahase kwimba kanawa mukamunehe kuli yami. ¹⁸ Mba umwe mukweze yakumbulula, nyi kwamba ngwo, "Hingunamono mwana wa Yese waku Mbeteleme, yoze unanyingika kwimba, kapwa nawa chitakame, mukwa hamu, kajita, chikanyame, mupema; nawa Yehova kali nenyi hamuwika." ¹⁹ Chocho Saulu yatuma mikeji kuli Yese, nyi kwamba ngwo, " Tuma mwaneye Ndawichi kuno, yoze unafungu mapanga." ²⁰ Yese yamba chimbulu yamutwika nyi mbolo, nyi tuku ya vinyu, nyi pembe mukehe, yatuma hamuwika nyi mwanenyi Ndawichi kuli Saulu. ²¹ Mba Ndawichi yeza kuli Saulu nyi kumana ku meso jenyi. Saulu wamuzangile chikolo, mba yamusela kumumbachila yitwa yenyi. ²² Saulu yatuma kuli Yese, ngwenyi, "Tayiza Ndawichi akamane kumeso jami mumu kananguwahilila chiji ku meso jami." ²³ Shimbu shipilitu mupi wapwile hali Saulu, Ndawichi wanjile kalyalya nyi kwimba. Chocho Saulu wapwile nyiku huzuluka nyi kupwa kanawa, nyi shipilitu mupi hamwecha.