1 Limwe tangwa, Njonatasi mwana wa Saulu yamba kuli kambaji kenyi kenyi wamumbachilile yitwa yenyi, " Tweya, tuye kuli maswalale a Filisitia kusali lkwo. " Alyoze iye kalyezele tatenu. 2 Saulu te kanatwama ku songo lya Ngimbya mushi lya mutondo wa pomengilanate uze wapwile mu Mingolone. malunga waze apwile no apwile ngwe kulakaji asambano, 3 hamwe nyi Ahinja mwana wa Ahitube( yayo ya Ikabode) mwana wa Finehase mwana wa Eli, sasendote ya Yehova mushilo, yoze wazalile efonde. Atu kanyingikine ngwo Njonatasi haya. 4 Hakachi ka chipoka kuze Njonatasi wambile kupalikila hanga ahete ku chilombo cha Afilisitiya' , kwapwile sali lino mulundu wa mawe nyi sali lize mulundu wa mawe. Mulundu umuwika wa mawe auvulukile ngwo Mbozeze nawa mulundu wa mawe mukwo nawa avulukile ngwo Sene. 5 Mulundu umuwika wa mawe wapwile ku note kulutwe lya Mikimashi, ukwo nawa ku sule kulutwe lya Ngeba. 6 Njonatasi yamba kuli kambaji kenyi yoze wambachile yitwa yenyi, "Tweya kuno, tukaye ku chilombo cha wano yilima. Chinate kupwa ngwo Yehova matuzachila, mumu yakuhi yize mu yechesa Yehova kulamwina atu anji chipwe atu akehe. " 7 Kambaji kenyi yoze wakumumbachila yitwa yenyi yakumbulula ngwo, " Linga chize cheswe chili mu mbunge ye. Yako lutwe, tala, nguli hamuwika nyi yena, kufunga shimbi je jeswe." 8 Mba Njonatasi yamba ngwo, " Mutuya kuze kuli malunga, mba mutukasoloka kuli ayo. 9 Nyi ngwo mamba kuli yetu ngwo, ' Shimbwilenu hohene ndo mutwiza kuli yenu' - mba mutukatwama muchihela chetu mba tuchikaya kuli ayo. 10 Alyoze nyi ngwo makumbulula ngwo, ' Tweyenu kuli yetu, ' mba mutukaya kuli ayo; mumu Yehova hanawakunjika mu moko jetu. Achi muchikapwa chilayi kuli yetu. 11 Chocho eswe aali alisolwele ku maswalale a chilombo cha A-Filisitiya. A-Filisitiya yamba ngwo, " Talenu, A-Hepeleu kanakatuka ku mena jo kuze aswamine." 12 Mba maswalwalale a chilombo waze apwile mukamwihi nyi Njonatasi nyi kambaji kenyi yoze wambachile yitwa yenyi, yamba ngwo, " Tweyenu kuli yetu, mba mutunulweza yuma yimwe. Njonatasi yamba kuli kambaji kenyi yoze wamumbachilile yitwa yenyi ngwo, " Ungukaule, mumu Yehova hanawakunjika mu moko ja Izalele." 13 Njonatasi yanyinako ku zachisa moko jenyi nyi molu, nyi mukwa kumumbachila yitwa yenyi yakaula hanyima. Njonatasi yashiha akwa A- Filisitiya, nyi mukwa kumumbachila yitwa yenyi yashiha amwe waze apwile ku nyima yenyi. 14 Kuzunga kutangu kuze Njonatasi nyi mukwa kumumbachila yitwa yenyi azungile, ashihile malunga ngwe makumi aali homa hamwe ngwe wande wakweseka makumi atano a metelo. 15 Kwapwile mwongo mu chilombo, mu wande, nyi hali atu. Nyi maswalale nyi akwa kupupa eswe achikimine. Kwapwile minyiko, nawa kwapwile mwongo. 16 Mba tulayi a Saulu mu Ngimbiya ya Benjamine yatala; mbunga ya maswalale A-Filisitiya kanalimwange, mba kanayi kuno nyi kuze. 17 Mba Saulu yamba kuli atu waze apwile hamuwika nyi iye, " Alulenu hanga nunyingike waze hakatuka hakachi kali yetu. " Muze halula, Njonatasi nyi mwakwa kumumbachila yitwa yenyi keshiko. 18 Saulu yamba kuli Ahinja, " Neha mushete wa Zambi kuno, " mumu hashimbu yize wapwile nyi atu a Izalele. 19 Shimbu te Saulu machihanjika nyi sasendote, chizungozungo mu chilombo cha A-Filisitiya chaliwezelele nyi kutwalilika. Mba Saulu yamba kuli sasendote, " Chiza kwoko lye." 20 Saulu nyi atu eswe apwile hamwe nenyi yalikungulula yaya ku jita. Katana kamutu mweswe wa mu Filisitiya walambile sepa lyeni, mba kwapwile kulifutula chinene chikolo. 21 Halyapwila waze a Hepeleu apwile hamwe nyi A-Filisitiya, nawa waze ayile hamwe mu chilombo, nyiwo apwile hamwe nyi akwa Izalele waze apwile nyi Saulu nyi Njonatasi. 22 Muze malunga eswe waze aswamine ku milunda yize yapwile ku kamwihi nyi Efulemu evwile ngwo A-Filisitiya kanachina, o nawa aahangile chikolo mu jita. 23 Chocho Yehova yalamwina Izalele haliza tangwa, mba jita yiyipalika ku Mbete Avene. 24 Tangwa lize malunga akwa Izalele alifwichile chikolo mumu Saulu hasa shingo hali atu nyi kwamba ngwo, " Mutu mweswewo malya chimwe chuma ndo chingoloshi hinalikala hali akwa kole jami ashingiwe. " Chocho nyiumwe hakachi ka atu walile nyichimwe chakulya. 25 Mba atu eswe ayile mu musenge mba kwapile wuchi hashi. 26 Muze atu hanjila mu musenge, wuchi wasotokele, wakuhi nyi umwe wasele kwoko lyenyi hakanwa lyenyi mumu atu evwile woma shingo. 27 Alyoze Njonatasi ka kevwile yize tatenyi wasele kuli atu. Yase songo lya mulumbu lize lyapwile mu kwoko lyenyi nyi kusa muze mwapwile wuchi. Yazundula kwoko lyenyi kusa mu kanwa kenyi, nyi meso jenyi yamona kanawa. 28 Mba umwe hakachi ka atu, yakumbulula, " Tatenu kakanjisanga atu nyi shingo, nyi kwamba ngwo, ' mutu mweswe malya chuma chimwe halino tangwa ashingiwe,' chipwe atu kanazeye nyi zala. " 29 Mba Njonatasi yamba ngwo, " Tata kanapinjisa chifuchi. Talenu chize meso jami hamona kanawa mumu hinalya chikepe ku wuchi wuno. 30 Shinaho achi atu kalyanga ku upite uze wa akwa koLe jo awananga? mumu kutwashihile chikolo akwa Filisitiya." 31 Alambile akwa Filisitiya hatangwa lize chize ku mikimashi ndo ku Ajalone. Atu apwile akuzeya chikolo. 32 Atu alundumukile ha upite nyi kutambula mapanga, ngombe nyi ana- ngombe, nyi kuwashiha hashi. Atu yalya hamuwika nyi manyinga. 33 Mba yalweza Saulu, " Talenu, atu kanavulumuna Yehova hakulya yifwo hamwe nyi manyinga." Saulu, yamba ngwenyi, " hinwalinga nyi mafwefwe. Halyapwila, lungumunenu luliwe kuli yami." 34 Saulu yamba ngwenyi, " Yenu katukenu kuli atu, nyi kuwalweza ngwo, 'Mutu mweswe akanehe ngombe jenyi nyi mapanga jenyi, nyi kuwashiha kuno nyi kuwalya. Kanda nuvulumuna Yehova mukulya ifwo ili nyi manyinga." Chocho mutu mweswe wanehene ngombe jenyi ha ufuku uze nyi kushiha hazehene. 35 Saulu yatunga chilumbilo kuli Yehova, chapwile chilumbilo chitangu chize atungile kuli Yehova. 36 Mba Saulu yamba ngwenyi, " Tukaulenu akwa Flilisitiya ha ufuku tukapupe ndo chimenemene; kanda tukahichikako chipwe umwe wamwono." Yakumbulula ngwo, " Lingenu cheswacho chanupemena." Alyoze sasendote yamba ngwenyi, "Tukandukenu kuli Zambi." 37 Saulu yahula Zambi, " Ngukaule akwa Filisitiya nyi? Munukangwahawo mu kwoko lya Isalele? " Alyoze Zambi kamukumbulwile halize tangwa. 38 Mba Saulu yamba ngwenyi,tweyenu kuno, enu myata eswe a atu; nunyingike nyi kumona chize shili jino hijalingiwa musono. 39 Mumu, chize chene ngwe Yehova wa mwono, yoze wakulamwina Isalele, chipwe chikapwe muli Njonatasi mwanami walunga, pundu kumafwa." Alyoze wakuhi nyi umwe hali atu aswe wamukumbulwile. 40 Mba yamba kuli isalele mweswe, " Numane sali limuwika, mba Yami nyi Njonatasi mwanami walunga mutupwa sali likwo nawa." Atu yahanjika kuli Saulu, " Lingenu chize chinanupemena." 41 Saulu yamba ngwo, " Yehova, Zambi ya Isalele! nyingwe yami hinavulumuna chipwe mwanami walunga Njonatasi, mba, Yehova Zambi ya Isalele, hana shindakenyo yipema." Mba Njonatasi yawa sakula hakachi ko, alyoze maswalale kapwileho nyi chechimwe. 42 Mba Saulu yamba ngwenyi, " Sakulenu hakachi ka yami nyi mwanami walunga Njonatasi." Mba yahya Njonatasi. 43 Mba Saulu yamba kuli Njonatasi, " Ngulweze chize hiwalinga."Njonatasi yamulweza, " Nalyanga tuwuchi tukehe ha songo lya mulumbu lize lyapwanga mu kwoko lyami. Yami nguli hano; Mba mungufwa." 44 Saulu yamba ngwo, " Njonatasi, Zambi achilinge nyi chikwo nawa, kufwa muofwa. 45 Mba atu yamba kuli Saulu, " Te Njonatasi mafwa nyi, yoze hanalamwina Isalele? Hichochoko! Nyi mwono wa Yehova, chipwe lukambu umuwika wa mu mutwe wenyi kuushi kaholoka hashi, mumu hanazate hamuwika nyi Zambi musono." Chocho atu yalamwina Njonatasi hanga aka hone kufwa. 46 Mba Saulu yalitwamina kukaula akwa Filisitiya, mba akwa Filisitiya yaya kuyihela yo. 47 Muze Saulu waputukile kuyula Isalele, washile jita nyi akwa kole jenyi eswe ku sali nyi sali. Washile jita nyi A-Moape, akwa A-Mone, A-Endome, nyi myanangana a Zomba, nyi akwa Filisitiya. Kweswe kuze atalikishile yakumba. 48 Yalinga nyi hamu nyi ku kumba akwa Ameleki. Yalamwina Isalele ku moko ja waze apupile. 49 Ana amalunga ja Saulu apwile, Njonatasi, Ishivi, malakishua. Majina aana- amapwo jenyi apwile Melemba, wapwile mutangu nyi Mikale, wapwile wakanuke. 50 Jina lya pwo lya Saulu wapwile Ahinoame; wapwile mwana wapwo wa Ahimaaze. Jina lya kapitau wa tujita twenyi wapwile Ambenele mwana walunga wa Nele, natu ya Saulu. 51 Kishi wapwile tato ya Saulu; nyi Nele, tato ya Ambenele, wapwile Ambyele. 52 Kwapwile kuzunga chikolo hali akwa Filisitiya mu matangwa eswe akwa Saulu. Muze Saulu wamwene lunga mweswe wa tachi, chipwe lunga chitakame, yamusa kusali yenyi.