¹ Samwele yamba ku akwa Yizalele eswe, " hingunapanjika kuli yuma yeswe yize hinwamba kuli yami, nawa hinanwaha mwanangana. ² Halyapwila yono mwe mwanangana uli kumeso jenu; nawa hinapwa mukulwana nyi kambu jami jatoma; nyi ana jami kali hamuwika nyi yenu. Chize ku wanuke wami ndo musono yami napwa wakuyula. ³ Yami uno; shindakenya ku meso ja Yehova nyi kumeso ja waze jenyi hanawahisa. Mba ngombe jaya waze hinambata ? Iya yoze nalweza mahuza? Iya yoze napinjisa? mukwoko lyaya lize hingunatambula chindo hanga ngukajike meso jami? shindakenya hali yami, Mba mungukakuhilwishila kuli yena. " ⁴ Yamba ngwo, " kanda utulwezaho mahuza, watupinjishileho, chipwe kwiya chuma chimwe ku kwoko lya mutu. " ⁵ Yamba kuli ayo ngwo, " Yehova chela kuli, nyi waze hanawahisa yela musono, hanga yakuhi yize hinwawaha mu kwoko lyami." Yakumbulula ngwo, " Chela yami Yehova. " ⁶ Samwele yamba kuli atu, Yehova iye wasele Mose nyi Alone, nawa iye wachijile a tatenu mu chifuchi cha Engitu. ⁷ Halyapwila, liselenu, hanga ngukalembelele hamwe nyi yenu kumeso ja Yehova hakutwa ku yitanga ya ululi ya Yehova, yize hananulingila yenu nyi a tatenu. ⁸ Muze Yakomba heza ku Engitu, mba tulamba twenu yalila kuli Yehova, mba Yehova yatuma Mose nyi Alone, waze atetekelele tulamba twenu kukatuka mu Engitu mba yatunga mu chihela chino. ⁹ Alyoze yavulama Yehova Zambi wo; yawalanjisa ku kwoko lya Sisele, mukulwana wama swalale aku Hazole, ku kwoko lya A-Filisitia, nawa ku kwoko lya mwanangana wa Moape; awa eswe ashile jita nyi tulamba jenu. ¹⁰ Yalila kuli Yehova nyi kwamba ngwo, ' Hitunavulumuna, mumu ha kwehuka Yehova nyi kulingila Ambale nyi Asatalote. Alyoze tulamwine ku kwoko lya akwa kole jetu, mba mutukulingila. ' ¹¹ Chocho Yehova yatuma Jelumbane, Mbandane, Jefeta, nyi Samwele, nyi kunwaha kukumba hali akwa kole jenu eswe, hanga nukatwame mukuhanda. ¹² Muze nwamwene ngwo Nahashi mwanangana wa atu ja A-Mone yeza kuli yenu, mukamba kuli yami, ' Hi chocho ko! hindu, mwanangana akatuyule ' - chipwe Yehova Zambi yenu, wapwile mwanangana. ¹³ Mba mwanangana uno yoze hinwalisela, yoze hinweta nawa yoze hanusela kuli Yehova kupwa mwanangana hali yenu. ¹⁴ Nyi munwivwa woma wa Yehova, nukamulingile, ononokenu ku liji lywenyi, kanda nukavulumuna ku shimbi ya Yehova, mba yenu nyi mwanangana makayulu hali yenu munukapwa akukaula Yehova Zambi yenu. ¹⁵ Nyi kunushi kwononokela liji lya Yehova, alyoze nukavulumune shimbi ya Yehova, mba kwoko lya Yehova mulikapwa hali yenu, ngwe chizechene lyapwile hali tulamba twenu. ¹⁶ Nyi halyapwila liselenu hanga nukamone yuma yinene yize Yehova manulingila kumeso jenu. ¹⁷ Musono tangwalya kucha tiliku nyi ? Mungutambika Yehova hanga akatume kulunguza nyi vula. Mba mununyingika ngwo ungulungulu wenu unene, uze hinwalinga ku meso ja Yehova, ha kwita enwene mwanangana. " ¹⁸ Chocho Samwele yatambika Yehova ; tangwa lize lyene Yehova yatuma kulunguza nyi vula. Atu eswe yevwa woma wa Yehova nyi Samwele. ¹⁹ Mba atu eswe yamba kuli Samwele ngwo, " Nutulembele etu ngamba je kuli Yehova Zambi ye, hanga kanda tukafwa. Mumu hitwanungaho ku kuvulumuna chetu ha yipi ya kwita mwanangana yetwene. " ²⁰ Samwele yakumbulula ngwenyi, " Kanda nwivwa woma. Hinunalingi yeswe ayi yipi, Alyoze kanda nukakatukako kuli Yehova, alyoze nukamulingile Yehova nyi mbunge yenu yeswe. ²¹ Kanda nupyasuka ku yuma yamokomoko yize kuyishi kufumbuka chipwe yize kuyichi kunupulula, mumu ya mokomoko. ²² Mumu wa wa jina lyeni linene, Yehova keshi kwehuka atu jenyi, Mumu chinamupemena Yehova kupwisa atu kupwa hijenyi. ²³ Hakutwala kuli yami, chikapwe kusuku kukatuka kuli yami ngukavulumune mumu wakuhona kunulembelela. Alyoze mungunulongesa jila yipema nawa yinoloka. ²⁴ Evwilenu woma Yehova wika, nyi kumulingila mu umwenemwene nyi mbunge yenu yeswe. Kanda nuvulama yuma yeswe yinene yize hanulingila. ²⁵ Alyoze nyi munu kolesa mbunge jenu mukulinga yipi, yenu nyi mwanangana wenu nulyesswe kumunukakuwa.