¹ Keshika , mumu Kilishitu wamwene lamba mumusunya , lipakatenu yenwene nyi yinyonga yimuwika . Mumu mweswawo hanamono lamba mu musunya hanalitwamina ku shili. ² Hanga , awu mutu , mumu shimbu yenyi ya hayamyaka mu musunya , kechi katwama ha usolo wa atu , alyoze ha ku zanga cha Zambi. ³ Mumu hali yenu myaka yize yapalika kulinga upale wa kwa mavungu , nyikwenda mu ujila , nyi usolo , nyi kuzengewa , nyi chimbangwinya , nyi kunwa walwa , nyi kukombelela cha kuzelwokesa. ⁴ Ka kunyonga ngwe chikomokeshi kwamba nushi kulinga no ha mahwiji wa yitanga yipi , keshika hanahanjika yipi hali yenu . ⁵ Wano kumakalumbununa kuli yoze halilulika nyi patwilo wa mwono nyi afu. ⁶ Mumu ha chino ambujolele sango lipema nawa kuli waze hanafu, hanga , chipwe hanapatwila mu musunya , ngwe atu , akatwame mu Shipilitu ngwe chize Zambi a kulinga . ⁷ Alyoze songo lya yuma yeswe hinakundama. Keshika , pwenu nyi mana , pwenu angunu mu yishinginyeka hamulonga wa kulemba. ⁸ Kuhyana yuma yeswe, pwenu nyi chivukuminya cha zango hali umwe nyi mukwo, mumu zango kulyakufuka milonga yinji. ⁹ Pwenu akwakulitambula umwe nyi mu kwo cha kuhona kulinyenga. ¹⁰ Ngwe umwe nyi mukwo hali yenu hanatambula chawana , zachisenu kulamwina umwe nyi mukwo ngwe tuselo apema a vumbi lyeka nyi lyeka lya Zambi . Kachi umwen mahanjika , echenu chipwe maliji a Zambi . ¹¹ Kachi mweswawo mazachila , chipwe ku ngolo jize akumaha Zambi . Lingenu yino yuma hanga mu jila yeswe achichimyeke Zambi ku tachi ja Yesu Kilishitu . Kukapwe kuli Yesu uhenya nyi ndundo ndo ku myaka nyi myaka ya mutolo. Amene. ¹² Akwa zango lyami , kanda nukomoka ha kutwala ku cheseko cha kahya chize hichalingiwa hakachi kenu , ngwe yuma yimwe ya kukomwesa yinalingiwa kuli yenu. ¹³ Alyoze , se nu palikile mu lamba lya Kilishitu , wahililenu , hanga nawa nukawahilile nyi kulikwiza muze usolwelo wa uhenya wenyi . ¹⁴ Nyi manutuka mumu ha jina lya Kilishitu , hana nukisula , mumu Shipilitu wa uhenya nyi Shipilitu wa Zambi kanahwimi hali yena. ¹⁵ Alyoze kanda nwecha mweswawo kuli yenu akamone lamba ngwe chingalwe, hanji mwiji , hanji mukwa kulinga yipi, chipwe hanji mukwa kusunga ku yuma ya mbala . ¹⁶ Alyoze nyi mweswawo mamona lamba ngwe mukwa Kilishitu , kanda akevwa sonyi ; alyoze , akachichimyeke Zambi ha jina lino . ¹⁷ Mumu shimbu ya upatwilo ku putuka ku zuwo lya Zambi . Nyi kachi mu uputuka nyi yetu , songo lika mulikapwa lya waze keshi kwononoka ku sango lipema lya Zambi? ¹⁸ Nyi , ''Kachi muchikapwa chikalu hali mukwa ululi kulilamwina , kuchi muchikapwa kuli chitanganyanyi nyi chivulumunyi masoloka?'' ¹⁹ Keshika echenu waze akumona lamba nyi kulita nyi upale wa Zambi akakunjike myono yo kuli Samatanga waumwenemwene ha kulinga yipema.