¹ Keshika mbilenu yhulya weswe , nyi tulimbalimba , nyi ulembekese, nyi lufwachinda , nyi kuhanjika chipi. ² Ngwe ana akemba waze anasemuka halyapwila , kakwivwa usona wa ya mwaya u Shipilitu , hanga nuka tatuke nayo mu ufulyelo, ³ kachi hi nuna panjika ngwe Mwene iye mukwa vumbi. ⁴ Tweyenu kuli iye liwe lya mwono alitunyine lya kuli atu , alyoze kuli Zambi lya pwa lyakutongola lilemu. ⁵ Nyiyenu nawa ngwe mawe a mwono kana nutungu kupwa asasendote asandu mukulambula itapo ya u Shipilitu yaku pemena kuli Zambi kutachi ja Yesu Kilishitu. ⁶ Muchisoneko china sonewa ngwo : ''Talenu , mungusa mu Zayone liwe lya mumbango ,lya kutongola lilemu . Mweswawo mamufulyela kechi kevwa sonyi.'' ⁷ Ulemu , nawa, ulikuli yenu nwafulyela . Alyoze kuli waze kafulyelele , '' Liwe lize alikalile kuli akwa kutunga , achino hichapwa liwe lya lutwe lya mbango,'' ⁸ nawa , '' Liwe lya ku hukanyisa nyi luliwe lwa kwa pwisa ku limbuka ''. Kaku hukana mumu keshi kwononoka ku liji lize atongwelele hanga alilinge. ⁹ Alyoze enu nuli atu akutongola , asasendote aku wanangana , achifuchi chisandu , amwe atu akwa pita Zambi mwene , hanga nukambujole che kuhyana cha yoze hananu tambika nukakatuke ku milima ndo kupangu lyenyi lya ku komwesa. ¹⁰ Yenu kunwakapwile atu, alyoze halyapwila nuli atu a Zambi . kunwatambwile keke , alyoze halyapwila hinwa tambula keke. ¹¹ Akwetu a zango , nguna lyumbu kuli yenu ngwe njize nyi ngeji nuka chizeko mana jita nyi mbunge . ¹² Pwenu nyi kwenda chenu ngwe chinate , hakachi ka akwa mavungu hanga chipwe manu hanjika ngwe akwa kulinga yipi , hanga akapwe yela kuitanga yenu ipema nyi ku chichomyeka Zambi hatangwa lya kwiza. ¹³ Zeyelenu ku yiyulo yeswe ya atu mumu hali Mwene. Zeyelenu nyi kuli mwanangana munene wa hyana , ¹⁴ nyi manguvulu nawa , waze akutumiwa akakole milonga yakwa kulinga ipi nyi ku halisa waze akulinga ipema. ¹⁵ Mumu achi chinapu kupala cha Zambi , hakulinga ipema nukaholese kwa lajala cha kuhanjika cha atu ihepuke. ¹⁶ Ngwe atu akwa kutusuka m kanda nu tenga kutusuka chenu chipwee chifuko cha u hulya , alyoze pwenu ngwe ndungo ja Zambi. ¹⁷ Lemesenu atu eswe zangenu mandumbu . Ivwenu woma kuli Zambi . Lemesenu mwanangana. ¹⁸ Yenu ngamba ,zeyelenu kuli myata jenu nyi vumbi lyeswe . Zeyelenu hi kuli apema nyi mbovu wikako, alyoze nawa nyikuli akalu. ¹⁹ Mumu chino chinapemena nyinge , iye kasa mbunge kuli Zambi , mutu manyongonona mu yinyengo nyi kwivwa lamba hi hachiotela che nyiko. ²⁰ Te kuchi manu chichimyeka nyi ngwe munuvulumuna nyi kunyongona shimbu manu mbufula ? Alyoze kachi hakulinga ipema manumwesa lamba , achino chinapemena muku halisa Zambi. ²¹ Mumu kuchino chenacho hananu tambika , mumu Kilishitu neye wanuvwilile lamba . Nyikunuhichikila cheseko hanga nuka kaule mu ngango jenyi . ²² ''Iye kavulumwine , chipwe mukanwa lyenyi kawanyinemo kalimbalimba.'' ²³ Muze amutukile , iye katukanyine. Muze evwile lamba, iye kakumbulwile nyi chimwe, alyoze walikunjikile kun moko ja yoze waku patula nyi ululi. ²⁴ Iye mwene wambachile shili jetu mumujimba wenyi ha mutondo hanga yetu tu katukeko kushili nyi kutwama mu ululi . Kumbandu jenyi hinuna hinduka. ²⁵ Yenu eswe nwapwile nyi ku pyanguka ngwe mapanga akutoka , alyoze halyapwila hi nuna hilukila kuli kafunga nyi kalayi ka mbunge jenu.