¹ Fifia éva va imé bé gbédika Yésu va lé gblɔ Mawunya lé Génézarɛt ho étoa to yi amékéwo tido lé zɔ kaba tsagbé wɔaté gogoé yi sé énya ké élé jagblɔa. ² Ekpɔ obla étɔjihun amévé, osa éka nɛ dé étoa to ké amédé kpékpé n'lé imé o dobé akpavi lélawo odi lé imé yi va jra wɔaho akpavi lékutsan do. ³ Yésu do étɔjihun dika mé ké nyi Simon tɔ yi égblɔ na Simon bé nékuyé yi étɔaji vidé yi énɔanyi dé étɔji huanmé yi lé fia améwo énu. ⁴ Eké éponua vɔa, égblɔna Simon bé: "fifia ku éhuan yi étoa ho dodomé yi miatsɔ akpavi lé kutsan tso da dé étsia mé yi mialé akpavi sugbɔ. ⁵ Simon lé tona bé: "Apétɔ mida akpavi lé kutsan dé étsia mé ézan kpata mé yi mimu lé édékpékpéwo, vɔa hado ényawo ké ogblɔ namua ta mayɔ dé iji." ⁶ Yi ké étsɔɛ dé étoamé akpavi lé kutsan lé akpavi kaka élé zé. ⁷ Tétéa Simon kudo nɔvia daha yɔ wɔaho évégɔnwo ké lé éhun évégɔa mé bé oné vakpé dé yéwo n'ti. Akpaviawo yɔ éhun amévéawo kaka olé yi étɔ gɔmé. ⁸ Vɔa ké Simon Pétro kpɔ ékiawoa éjéklo lé Yésu ho akɔmé yi lé gblɔ bé: "Apétɔ tso ji lé égbɔnyé dobé énuvɔn wɔla yi n'nyi yi nyémusɔgbé lé n'kumé nawo." ⁹ Ewɔ ya ni Pétro dobéna akpavi ké oléa sugbɔ yi éwɔ nukunu nawo n'tɔ. ¹⁰ Nɛnɛ ké yi Yakobo kudo Yohanɛs amékéwo nyi Zébédéo ho via nyi akpavi léla na Simon. Yi Yésu lé tonawo bé: "min'gbé vɔnwo dobé n'lé jawɔ mi tsagbé miatrɔ zu luvɔwo léla." ¹¹ Yi ké otsɔ étɔji huan va étoagodoa ogblédɛ yi ti Yésu do. ¹² Gbédika Yésu yi kɔpé démé yi ékpɔ ékponɔ dé lé éduamé. Ké ékpɔ Yésua étsɔ yiho n'kumé tso tsɔn anyigba yi dogbéda lé gblɔnɛ bé: "Apétɔ né inyi bé ojroa atéwɔm yi n'tinyé nékɔ." ¹³ Tétéa Yésu dra yiho alɔ tso tɔɛ yi lé gblɔ bé: "ɛn n'lɔ, yita n'tiwo nékɔ." Tétéa édɔa tsolé iji zidika. ¹⁴ Yi Yésu do ésé nɛ bé n'gbé gblɔ énya kia na amédékpékpé o. Yi égblɔnɛ bé: "Yi yi natsɔ édokéwo tso fia Osɔfo ganwo yi nawɔ vɔsa sigbé léké amékéwo lé doa yi ohaya lé Mosé ho éséanu. Yi éla fia amésiamé bé ohaya nyatoho." ¹⁵ Enya kia kaka dé toho dékpékpé yi amédéwo tsan lé jibé yéwɔa kpɔɛ yi wɔasé yiho Mawunya yi nédagbé lé yéwo n'ti. ¹⁶ Vɔa étso lé wɔagbɔ yi yi zogbéji tsagbé nété dogbéda. ¹⁷ Gbédika, éké Yésu lé fianua, Farizitɔwo kudo agbalɛnfialawo va tohoa. Amékiawo tso Galiléa ho kɔpéwo mé, kudo Yudéa kudo Yéruzalɛm yi Mawu ho édɔyɔyɔ ho n'sé lé iji bé néyɔ édɔ na améwo. ¹⁸ Tétéa n'tsu déwo kplɔ n'tsu dé va ké kplibɔ yi lé abaji, yi oji bé wɔatsɔɛ dé améwo mé lé Yésu ho n'kɔ. ¹⁹ Yi ké omunya léké wɔawɔ yi tsɔɛ do améawo méa dobé améawo sugbɔa yita olia éhɔ ho étamé yi odidi kplibɔkplibɔ ho amé do Yésu ho akɔmé tututu. ²⁰ Ké Yésu kpɔ wɔaho hɔséa, égblɔ bé: "n'tsu otsɔ énuvɔnwowo tso kéwo." Farizitɔwo kudo agbalɛfialawo lé gblɔ lé wɔadékéwo mé bé: "mɛka yi iya nyi yi, améké lé gblɔ busu ho ényawoa? ²¹ Mɛkayi laté tsɔ énuvɔn tso kéa mé yi n'nyi Mawu o?" ²² Yésu ya nya wɔaho susu ké olé bua, yita élé gblɔnawo bé: "n'ka n'ti yi milé bu susu bada kumuawo lé miaho éjimé yi? ²³ N'ka yi lé fafa wu bé wɔagblɔ bé: "otsɔ énuvɔwo tso kéwo" alo wɔagblɔ bé: "tso yi nazɔ?" ²⁴ Yi kéngbɔ mianya bé amégbétɔ ho vi do ŋsé lé anyigba ji bé élaté tsɔ énuvɔnwo tso kéamé, yinti yi n'lé gblɔɛnawo bé: "tso yi na ŋlɔ abawo yi nayi ahomé." ²⁵ Tété zidika, n'tsua tso lé n'kɔ nawo yi ŋlɔ yi aba yi lé kafu Apétɔ kudo aha bobobo yi joyi ahomé. ²⁶ Amédé kpékpé ké lé tohoa vɔn énukéa ké okpɔa yi wɔakpata olé kafu Mawu lé gblɔ bé: "Mikpɔ énumajɔkpɔwo égbé." ²⁷ Ké énukéawo vayi vɔa Yésu do lé éduamé yi kpɔ n'tu dé ké nyi éduga jɔtɔ ké yiho n'kɔ nyi Lévi nanyi lé yiho édɔwɔho. Yi Yésu gblɔnɛ bé: "tim do." ²⁸ Tétéa Lévi tso yi ti Yésu do lé n'gbé. ²⁹ Yi toho n'didiwɔa, Lévi do ékplɔ na ékplɔ na Yésu yi yɔ yitɔ égajɔla kpɔtɔɛwo dé ékplɔa n'ti kudo Yésu. ³⁰ Farizitɔwo kudo Agbanlɛn fialawo lé gblɔ na wɔanɔnɔwo bé: "n'ka n'ti yi olé dunu kudo égajɔlawo kudo énuvɔnwɔlawo yi?" ³¹ Yésu do yinti nawo bé: "n'nyi amékéwo lé laméséan yi hian dɔkitawo, vɔa amékéwo lé lédɔa yi. ³² Nyé n'va na amékéwo lé jɔjɔɛyi o, vɔa n'va na énuvɔnwɔlawo yi tsagbé wɔatrɔ éjimé." ³³ Olé gblɔnɛ bé: "Yohanɛs ho énusrɔnlawo ya blana énu yijiyiji yi odonagbéda n'tɔ, yi nɛnɛ ké yi Farizitɔwo tsan wɔna yi, vɔa tɔwɔawo ya oduna énududu yi nuna aha tsan." ³⁴ Yésu do yinti nawo bé: "miaté wɔ bé ésrɔntɔ n'tsu ho éhɔnlɔnwo né blanua ké inyi bé ésrɔntɔa lé kudo wɔa? ³⁵ N'kékédéwo légbana ké ola tsɔ ésrɔntɔa tso ji lé wɔagbɔ, gakumua méa, olalé tsi nudɔ." ³⁶ Egbé gblɔ élo dodo ho énya dé nawo ké bé: "amé n'zéna avɔ yéyé bé yéatso jra yéyéa do. Né inyi bé éwɔɛ a avon yéyéa la zé kpata yi yéyéa ho kakan n'janya kpɔkpɔ kudo hohoawo. ³⁷ Yi nɛnɛ ké yi owun tsɔna Vin yéyé tso kɔna dé égo hoho mé o, nényi bé owɔɛ nɛnɛa aha yéyéa ho n'sé lawɔ bé égoa la wo. ³⁸ Yinti yi odo latsɔ vin yéyé dé égo yéyé mé. ³⁹ Nɛnɛ ké yi amédé nu vain hoho voa n'gbé lɔna la nu yéyéa dobé égblɔna bé: "hoho nyɔ tsowu yéyéa." "