¹ Tétéa gbɔgbɔ kɔkɔé yɔ Yésu mé yi étso ji lé Yɔdan ho étoamé yi gbɔgbɔ kɔkoé kplɔɛ tso yi zogbéji, ² toho ké Abusam va doé kpɔ n'kéké blané. N'du ndékpékpé n'kéké kumuawo kpata jio, yi féfé lé sésédé ké n'kékéawo vɔ vayia. ³ Abosam lé gblɔna Yésu bé: "Né inyi bé Mawu ho vi onyi tututua, dégbé na ékpé kiawo bé oné trɔ zu énududu." ⁴ Yésu do yinti nɛ bé: "Oŋlɛdɛ bé: "n'nyi énududu n'ti koyi amégbétɔ do la nɔ agbé do." " ⁵ Tétéa Abusam kplɔɛ tso yi toho kɔkɔdé yi lé dé éhihéamé ho nuwo kpata tso fiɛn lé adaba popo dika mé. ⁶ Yi élé gblɔna Yésu bé: "édukɔ nyɔɛ kia kudo yiho nutikɔkoé nyi tɔnyé yi maté tsɔɛ tsona amédékpékpé ké n'lɔa. ⁷ Yintia né inyi bé ojé éklo yi subɔm la matsɔɛ tso nawo. ⁸ Tétéa Yésu do yinti nɛ bé: "Oŋlɛdɛ bé: "Mawu dika koyi élé bé miasubɔ." ⁹ Tétéa Abusam gbé kplɔɛ tso yi Yéruzalɛm yi tsɔɛ do tsɔtsihɔ ho toho kɔkɔ yi lé gblɔnɛ bé: "Né inyi bé Mawu ho vi yi nényi lé nyatoho méa zro lé gawun vajé anyigba, ¹⁰ dobé oŋlɛ dɛ bé: éla gblɔna yiho dɔlawo bé wɔakpɔ étawo. ¹¹ Yinti yi ola léwo dé wɔaho alɔwo mé tsagbé n'gbéva tsɔ afɔwo tso po ékpéwo." ¹² Yésu do yinti nɛ bé: Oŋlɔɛdɛ bé "n'gbété Apétɔ wo Mawu kpɔ o." ¹³ Eké Abusam vɔ tété kpɔala étso lé Yésu yi yi na n'kéké bubu. ¹⁴ Tétéa Yésu trɔ yi joyi Galiléa kudo gbɔgbɔ kɔkɔé ho n'sé yi ké yitoho n'didiwoa améwo jési lé énutoamé. ¹⁵ Etɔ iji lé fia Mawu ho énya lé wɔaho tsɔtsihɔwomé yi amésiamé lé kafui. ¹⁶ Eva Nazarɛt, toho ké énɔ lé yiho dévimé, yi lé wɔaho édɛn kɔnuwo nua, éyi wɔaho tsɔtsihɔmé lé Sabat ho n'kékéji. Eké étso bé yéahlɛn Mawu ho énya, ¹⁷ otsɔ ényagblɔdila Yésaya ho agbanlɛ nɛ bé néhlén. Ehun toho ké oŋlɔ lé bé: ¹⁸ "Apétɔ ho gbɔgbɔ lé éjinyé, yita ési ami nam do bé magblɔ énya nyɔɛwo na amékéwo lé dahéawo, édɔm bé madégbéfan bé oné dé gakpaménɔlawo yi n'kugbatɔwo ho n'kuviwo néhun yi amékéwo kpata oté né anyigbanméa wɔaté tso ¹⁹ Yi madégbéfan Apétɔ ho épé nyɔɛ. ²⁰ Eké éhlɛn énya kiawo vɔa étu éhoma yi gbé tsɔɛna améké tsɔɛnɛa yi yi n'tɔ yi vana nyi. Yi amédékpékpé ké lé tsɔtsihɔamé tsɔ yiho n'ku dé iji. ²¹ Tétéa Yésu lé gblɔna améawo bé: "Mawunya kia va imé lé égbé ho n'kéké kia ji." ²² Amékéwo kpata nɔ tsɔtsihɔaméa kafui yi éwɔ ya niwo lé Mawunya kéwo égblɔa n'ti. Olé bia wɔanɔnɔɛwo bé: "énya ka yi nyi kiawo? alo munyi Yosɛf ho évia yi kéa?. ²³ Tétéa Yésu lé gblɔ nawo bé: "tamunyɔ miado n'ku élododo kia ji bé: "égbédala, dagbé lé édokéwo n'ti. Misé énukéwo kpata owɔ lé Kapernaum, wɔɛ nɛnɛ lé éduwo jijia tsan mé. ²⁴ Egblɔ nawo bé: "lé nyatoho méa, n'lé gblɔɛ ni mi bé bubu n'nɔ ényagblɔdila dékpékpé wun lé édunyé jijiamé. ²⁵ Vɔa lé nyatoho méa n'lé gblɔɛ ni mi bé: "ahosi sugbɔ nɔ Izraël lé Elia ho gamé éké jipo tu épé amétɔ kudo wléti amadɛn yi adɔwɔamé va éduakpata ji. ²⁶ Vɔa omudɔ Elia va édékpékpé gbɔ lé wɔamé o négbé dika ké lé Sarɛpta lé Sidon. ²⁷ Yi anyijélawo sugbɔ lé Izraɛl lé ényagblɔdila Elisa ho gamé, vɔa Elisa n'dagbé lé wɔa n'ti o, négbé Naaman Siriatɔ dika koyi. ²⁸ Yi éké osé énya kiawoa, wɔakpata ké olé tsɔtsihɔaméa obiji n'tɔ. ²⁹ Otso yi nyɛ do lé éduamé yi okpɔ tsoyi éto ké ji otu édua do tsagbé wɔaté tutui dangbé lé guwun. ³⁰ Ganké Yésu zɔ to améawo domé yi jo yi. ³¹ Yésu trɔyi Kapernaum, Galiléa ho édu dé mé yi lé gawun a éléfianu améwo lé Sabat ho n'kékéwo ji lé wɔaho tsɔtsihɔwomé. ³² Yiho ényagblɔgblɔa wɔ nukunu na améwo kpata dobé élé honu kudo atsɛkpakpa. ³³ Gbédéka éké Yésu va lé fianu lé wɔaho tsɔtsihɔmé, n'tsu dé ké gbɔgbɔvɔn lé défuna, yi élédaha kudo égbé sésédé: ³⁴ "n'kayi miwɔnawo Yésu Nazarɛt tɔ yi? ova bé yéatsrɔn mi yéa? N'jési améké onyia, Mawu ho vi yi onyi!" ³⁵ Yésu dégbé na gbɔgbɔ kudo atsɛ kpakpa bé: "bɔnu yi nado lé n'tsuamé!" Yi ké gbɔgbɔ vɔan tsɔ n'tsua tso pu anyigba zidika yi do lé imé ké ényi bé n'wɔ bada kudoé. ³⁶ Tétéa éwɔ ya ni wɔakpata yi owun tɔté énya gblɔgblɔ lé wɔadékéwo mé o lé gblɔbé: "n'sé ka yi lé amékéa ho ényawo yi bé gbɔgbɔ badawo n'tɔtsan lé dotoé yi?" ³⁷ Tétéa Yésu ho nukunu ké éwɔa kaka dé toho dékpékpé lé dukɔamé kudo édua ho kɔpé wluiwluiwomé. ³⁸ Tétéa Yésu do lé tsɔtsihɔamé yi yi Simon gbɔ lé ahomé, yi ékpɔ Simon ho lɔhɔ ké lé atikétsi ho édɔ sésédé, tétéa wɔakpata ké lé gawuan va dé kuku nɛ bé néda égbé lé yinti. ³⁹ Tétéa Yésu tɔté dé nyɔnua gbɔ yi lé tona atiké tsia bé nédo lé nyɔnua mé yi édolé imé nyatoho. Yi zidika étso yi yi va da énududu nawo. ⁴⁰ Ké fiɛnsimé vadoa, améwo lé kplɔ amékéwo édɔnɔ pomévi dékpékpé tso va Yésu gbɔ. Etsɔ yiho alɔ dé wɔaji dikadika yi wɔakpata ohaya. ⁴¹ Gbɔgbɔvɔnwo odo lé amédéwo yi olé gblɔ bé: "Mawu ho évi yi onyi!" tétéa Yésu dégbé na gbɔgbɔ vɔanwo bé owugbéhonuo dobé onya bé yi yi nyi Kristoa. ⁴² Ké éhun kéa, étso yi yi tohoa dé lé zogbéji. Améwo va lé ji yi ova kpɔɛ lé toho ké éléa yi ké ova kpɔɛ lé gawuan odé kuku nɛ bé n'gbé jo lé wɔagbɔ lé Kapérnaum. ⁴³ Vɔa élé gblɔ nawo bé: "élé bé magblɔ na dukɔ kpɔtɔɛwo Mawu ho éfiaduhoa; dobé énukum n'ti yi odɔm va gɛké do." ⁴⁴ Tétéa étso joyi Yudéa yi éva lé gblɔ lé wɔaho tsɔtsihɔwo mé.