¹ Egajɔla mawɔ énutohowo kudo énuvɔn wɔla déwo va do na to Yésu ho énya yiji yiji. ² Enukia gbé na bé Farizitɔwo kudo agbalɛn fialawo gbé lé gblɔ lé wodékéo mé bé: "N'tsu kia hɔ énuvon wɔtɔwo yi lé dunu kudo wo." ³ Yésu gbé do élo kia nawo bé: ⁴ "Mɛka yi lé miamé ké alɛngbɔ alafa dika léna yi évanyi bé dika bu lé imé, yi matati blasidikavɔasiéké dé égbé ji yi nava ji dika kpɔtɔɛwo kaka na gakémé éla kpɔɛwo? ⁵ Yi né inyi bé ékpɔɛ éla kɔkɔɛ dé yiho abɔji kudo jijɔ tso yi ahomé. ⁶ Yi né inyi bé éva do ahoméa, éla yɔ yiho éhlɔnwo kudo amékéwo ho aho ta dé yintia yi éla tonawo bé: "mikpɔ jijɔ kudom, dobé n'kpɔ alɛn gbɔ nyé ké bua." ⁷ Yinti yi n'lé gblɔɛ ni mi bé jijɔ gandé lé jipo na énuvɔn wɔtɔ dé ké trɔ éjimé lé amé blasidikavɔasidika kéo gbé bé yéwo matrɔ lé wɔaho éjiwo mé. ⁸ Alo nyɔnu dé do ékpé ho éga aményi yi né inyi bé dika bu dé masi ézo yi jia kaka ila va kpɔɛa? ⁹ Yi né inyi bé ékpɔɛ éla bɔ éhlɔnwo kudo yiho ahomé tɔwo yi la gblɔnawo bé: "mikpɔ jijɔ kudom dobé n'kpɔ éga nyé ké bua. ¹⁰ Yinti yi n'lé gblɔɛ ni mi bé, jijɔ nɔna Mawudɔlawo mé lé jipo né inyi bé énuvɔn wɔtɔ dé trɔ lé yiho éjimé." ¹¹ Tétéa Yésu gbé gblɔ bé: "N'tsu dé ji n'tsuvi amévé, ¹² yi amétsintsia tona tata bé "tata, tsɔ késinɔnu nyé nam." Yi tata ma yiho késinɔnua do toho amévé yi tsɔ yitɔ tso nɛ. ¹³ Yi n'kékédéwo ho n'gbodoméa, n'tsua bɔ yiho énuawo yi tso jo yi édu didi dé mé. Yi lé guwuan, ézan yiho éga plé énuké n'hian bé népléo, yi zan éga lé nɔnɔmé bada ji. ¹⁴ Tétéa ké ézan éga vɔa, féféléamé gandé va do éduamé yi lé gakumuaméa éva lé hianhian mé. ¹⁵ Yi éyi va lé wɔ édɔ na édu kumuamé ho n'tsu dé ké nyina éhan, yi n'tsua kplɔɛ tso yiho ébomé tsagbé néva lé na éhanwo énududu. ¹⁶ Tétéa élé ji bé éla du éhanwo ho n'dudu dobé amédékpékpé n'lé nɛ énududu bé du o. ¹⁷ Yi ké n'tsuvia trɔva yido ké méa, égblɔ bé: "Subɔviwo sugbɔ lé tatanyé si gankéa wɔakpata oduna énu yi ésunawo nyɔɛdé yi ényéa n'lé gɛké yi mava ku féféléamé ho ku! ¹⁸ Matso lé gɛké yi matrɔ yi tatanyé gbɔ yi magblɔnɛ bé: "tata n'wɔ énuvɔn dé jipo kudo n'tiwo. ¹⁹ N'gbéjé bé nayɔm bé éviwo; vɔa n'dékuku hɔm matrɔ zu subɔlawowo ho dométɔ dika." ²⁰ Nɛnɛ yi n'tsu via trɔ yi tata gbɔ. Yi ké tata kpɔɛ lé didi hoa yiho nu wɔ nublanui nɛ yi ésudu yi va kplasi ékɔnɛ. ²¹ Dévia lé glɔna tata bé: "tata n'wɔ énuvɔn lé jipo kudo n'tiwo, yi ta nyému gbé jé bé nayɔ bé éviwo." ²² Tata gblɔna yiho subɔviwo bé: "misudu yi miatsɔ awu lɔbɔ hɔtsihɔtsi va yi miadonɛ, mido alɔ ho égavi dé yiho alɔ yi miji afukpa dé yiho afɔgɔmé. ²³ Yi miatsɔ agbo gan va yi miawui yi miadui yi miakpɔ jijɔ lé miadékéwo mé. ²⁴ Dobé évinyé ku yi égbé kpɔ agbé, ébu yi n'kpɔɛ." Yi wɔakpata otɔ azan dudu. ²⁵ Lé gakumuamé dévia ho fofo lé ébomé yi lé wɔ édɔ. Yi ké étso éboamé gbana aho méa, élé sé éha kudo éwédudu lé ahoamé. ²⁶ Eyɔ subɔvi dika yi lé biɔ énuké lé joa. ²⁷ Yi subɔvia do yinti nɛ bé: "Nɔviwo trɔva aho mé yi tatawo wu ényi gan dé dobé étrɔ gbɔ va ahomé lé lamésén mé." ²⁸ Evi amégan hohoa biji n'tɔ yi n'gbé ji bé yéado aho mé o, vɔa tata do yi dé kuku nɛ. ²⁹ Vɔa évia glɔnɛ bé: "n'wɔ édɔ nawo épé sugbɔ yi ké vɔa owun wu égbɔvi dika tété nam kpɔ bé ényé kudo éhɔnlon nyéwo miadu yi kpɔ jijɔwo, ³⁰ vɔa éviwo ké gblén késinɔnuwo vadoa owu ényi ké do ami nɛ." ³¹ Tata do yinti nɛ bé: "évinyé owo ya olé kudom gasiagamé yi énuké nyi tɔnyéa tɔwo yi ényi. ³² Gankéa ényɔ bé miakpɔ jijɔ dobéna nɔviwo yi inyi dobé éku yi égbé kpɔ agbé ébu yi migbé kpɔɛ."