¹ Gbédika, Yésu yi énuduho lé Farizitɔwo ho amégan dé ho ahomé lé Sabat ho n'kékéji, yi Farizitɔwo tsɔ woaho n'kuviwo dé iji vévédé n'tɔ. ² Tétéa, n'tsudé lé lédɔ vɔn dé jété lé yiho n'kɔ. ³ Tétéa Yésu lé bia Farizitɔwo kudo Esényalawo kéwo jété lé yigbɔa bé: "Elé éséanu bé wɔada égbé lé amé n'ti lé Sabat ho n'kéké jia alo n'lé nɛnɛ o?" ⁴ Tétéa wɔakpata obɔnu. Tétéa Yésu lé édɔnɔa ho alɔ yi yɔ édɔ nɛ, yi tso yi ijia égblɔɛnɛ bé néjo yi. ⁵ Yésu gbétrɔ lé bia améawo bé: "mɛkayi lé miamé yi né iji bé évia n'tsu alo yiho alɛngbɔ ké jé évidomé lé Sabat ho n'kéké ji éla gbé dédé yi?" ⁶ Tétéa améawo kpata owun té do yinti o. ⁷ Ké Yésu nya bé amékéwo kpata okpé va bé oné dunua lé ji bé wɔanɔ ékplɔ n'tia, édo élo kia nɔwo bé: ⁸ "Né inyi bé okpé mi tso va ésrɔndédé tohoa, min'gbé va nɔ ékplɔ n'ti o, dobé amé gan dé la té va va guwun, ⁹ yi né inyi bé éjɔ nɛnɛa, améké kpé mi va ésrɔn déhoa la té va gblɔ ni mi bé: "tso lé toho kia yi amékéa né nanyi," énukia awɔ n'kpé nawo n'tɔ yi ava nanyi lé n'gbodomé. ¹⁰ Enuké ényɔwua yi nyi bé, né okpé woa yi yina va nanyi lé n'gbodoméa, yi né inyi bé améké kpéwo va kpɔwo lé guwuan la gblɔnawo bé: "Ehlɔn nyé tso yi nayi n'kɔgbé." Nɛnɛ yi éla do bubu n'tiwo lé améké okpévawo ho n'kumé. ¹¹ Dobé amédékpékpé ké jina bé yéado yidoké dé éjia ola didi dé gɔmé, yi amédékpékpé ké bɔbɔ yido kéa ola kɔkɔɛ dé éji." ¹² Yésu gblɔna n'tsu ké kpéva énuduhoa bé: "né inyi bé oda énu dudua, n'gbé yɔ nɔviwowo, jilawowo, alo éhlɔnwo égatɔwo dobé wɔawo tsan ola va wɔ nuwo nɛnɛ ké né inyi bé wɔawo tsan ova da énududu. ¹³ Vɔa né inyi bé odɛa, yɔ wɔaménɔwo, bafawo, matakliwo kudo n'kuvi gbangbantɔwo oné va du énududua, ¹⁴ yi éji lajɔwo dobé owun ja té do yi toho nɔwo. Yi lé amékɔkoéwo ho tsitrétsitsi ho n'kékéa jia Mawu la do yi toho nawo." ¹⁵ Ké amékéwo lé ékplɔa n'ti kudo Yésua sé énya kiawoa kpata, olé tona Yésu bé: "jijɔtɔ yi nyi améké dunu lé Mawu fiaduhoa méa!" ¹⁶ Vɔa Yésu do yinti nawo bé: "n'tsua dé da énududu yi yɔ amésugbɔ bé oné va yi wɔadu. ¹⁷ Yi ké énududua sɔgbéa édɔ yiho énusrɔnlawo bé oné va gblɔna amé kpékpéawo bé énududua sɔgbé, "fifia onété va yi wɔadunua." ¹⁸ Tétéa wɔakpata olé dé kuku na subɔviawo lé nɔnɔmé dika mé. Amé tsutsugban tɔa gblɔɛ bé: "n'plé ébo déa n'do la yi vakpɔɛ yinti yémuja té vao. ¹⁹ Ebu tsan gbé gblɔ bé: "n'dékuku, n'plé ényidébo améwo yi n'lé ja kplɔwo yi tsagbé wɔawɔ édɔ lé ébo mé num yita n'ja té va o. ²⁰ Amébu tsa gbé gblɔ bé: "n'dé ésrɔn a yinti n'nya té vao." ²¹ Tétéa subɔlawo va yi gblɔ énya kiawo na wɔaho apétɔ. Tétéa apétoa bi ji yi gblɔna subɔlawo bé miyi émɔwo mé kaba n'tɔ yi miakplɔ wɔaménɔwo, bafawo, n'kuvi gbagabatɔwo kudo matakliwo va." ²² Ké subɔviawo wɔ dé iji vɔa, toho gbé kpɔtɔ. ²³ Apétɔa gbé gblɔna subɔviawo bé: "miyi émɔ ganwo ji yi miazi améwo ji tsagbé onétéwun va gakumua méa ahoa ladɔ kudo amégbétɔwo. ²⁴ Dobéna amékéwo kpata n'kpéva tsutsugban oma gbé du énuké n'da o." ²⁵ Amésugbɔ ti Yésu do lé n'gbodomé, yi étrɔ lé tonawo bé: ²⁶ "né inyi bé amédé bé yéa tim do yi n'tsri yiho jilawo, nɔvia n'tsuwo kudo nyɔnuwo alo n'tsri yi n'tɔ ho agbéoa, n'kadé iji ni mibé amékumua maté nyi Subɔla nyé o. ²⁷ Améké n'tsɔ yiho atitsoga yi tim do lé n'gboméwoa maté nyi subɔla nyé o. ²⁸ Dobé mɛka yi lé midomé yi né inyi bé éjatɔ ékpa do yiho aho mananyi yi wɔ akɔnta kungbɔho? ²⁹ Vɔ né inyi bé éwɔ églituhɔa n'té tu éhɔ woa, amékéwo kpata lé kpɔɛ ola lé koé ³⁰ yi wɔalé gblɔ bé: "n'tsu kia tɔ éhɔ tutu ji vɔa n'té wu yinu o." ³¹ Alo né inyi bé éfia dé do avawɔwɔ kudo éfia bua dé mabia topodo kpɔ bé amé kotoku alafa dika laté wɔ ava kudo amé ala amévé oa? ³² Yi né inyi bé ékpɔɛ bé yiho Sɔjawo matéwun duji woa éla dɔ amé dudwo bé yi wɔawɔ n'tifafa kén'gbɔ wɔava do wogbɔ. ³³ Nɛnɛ yi amédé n'ja té nyi nusrɔnla nyé o né inyi bé égbénu lé yiho késinɔnuwo kpata gbɔ hado étanyé gbɔho! ³⁴ Ejé nyɔ, vɔ nényi bé ébu yiho vivia dé, élagbétéwun vé énua? ³⁵ N'gbé lé ébodékpékpénu o dobé n'gbé nyɔwo. Améké do étoa né sénu."