¹ Yésu lé tona yiho énusrɔnlawo bé: "N'tsu éhotɔ dé do éga ho akɔnta wɔla dé. Yi tétéa ova gblɔ nɛ bé, n'tsua lé gblén yiho égawo bada bada. ² Tétéa ého n'tsua yɔɛ yi lé tonɛ bé: "n'kayi yi nyi énya kiawo ké n'lé sé lé n'tiwoa o? Va wɔ akɔta num, dobé owu ja gbé té nyi éga ji kpɔla num ké o." ³ Egajikpɔla lé gblɔ lé yido ké mé bé: "lémɔyi éla nɔ num né inyi bé Apétɔ nyé hɔ édɔ kia lé asinyé fifi kia o? N'sé tsa n'lé asinyé bé mawɔ édɔ sésé o yi nyé n'ja té bia énu améwo tsan bé oné nam o dobé éla wɔ n'kpé num. ⁴ N'nya énuké mawɔ yi né inyi bé onyam lé dɔméa, améwo néhɔm nyɔɛdé." ⁵ Nɛnɛ yi éyɔ yiho amékéwo du éfɛn lé apétoa si dika dika yi biawo bé: "éfɛn nɛnɛ yi odu lé apétɔwo si yi? ⁶ édo yinti nɛ bé: "olivia ho ami alafa dika." Yi étonɛ bé: "Tsɔ énuŋlɔntiwoa yi nananyi yi nanlɔ blatɔn kaba." ⁷ Egajikpɔla gbé yɔ amébu yi lé biɔ itsa bé: "Nɛnɛ yi odu éfɛn do Apétɔwo, édo yinti nɛ bé: "énuku alafa dika" yi égblɔ nɛ bé: tsɔ homa woa yi naŋlɔ mlanyi kaba." ⁸ Apétɔa kafu n'tsu égajikpɔla kia lé yiho énunyanya n'ti. Dobé éhihé kia mé ho éviwo jana ayé lé énumanyɔmanyɔ mé tso wu amékéwo vɔna Mawua. ⁹ N'lé gblɔɛ ni mi bé mitsɔ anyigbanu majɔmajɔwo tso wɔ miawo éhlɔnwo ni miadokéwo, yi né inyi bé wɔanu vayi vɔa éla hɔ midé yiho aho mavoa mé. ¹⁰ Améké nyi énutoho wɔla lé énu vitukui méa la nyi lé énu gan tsa mé, yi améké nyi énutoho mawɔla lé énu vitukui méa lanyi lé énugan tsa mé. ¹¹ Né inyi bé améwo n'kana dé éjiwo lé gadékpékpémé lé késinɔnuwo zanzan bada mé oa, mɛkayi latsɔ jipo ho énu n'tɔtɔwo tso dé asi nawo yi? ¹² Nɛnɛ ké yi owun nyi nyatépé gblɔla lé améo ho énuké otso do alɔmé nɔwoa dé, lémɔ yi wɔaté tsɔ éga ké nyi owo n'tɔ toa tso do alɔmé nawo yi? ¹³ Amédékpékpé maté subɔ Apétɔ amévé dé éduwo, ké éla nyi bé éla tsri dika yi éla lɔ dika alo éla lé dé dika n'ti yi éla gbé énu lé évégoan gbɔ. Mimatéwun subɔ Mawu kudo éga dé édu o. ¹⁴ Tétéa Farizitɔwo kéo lɔna éga sé énya kia wɔakpata olé koé. ¹⁵ Yésu tonawo bé: "miwɔna miadékéwo lé améwo ho n'kɔ sigbé amékɔkoéwo vɔa Mawu ya nya miaho éjiwo mé. Miaho ajédada ho énuwɔnawo yi na bé améwo tsɔna bubu ni mi, vɔa lé Mawu ho n'kuméa, ényi énu bada. ¹⁶ Eséa kudo ényagblɔdilawo lé dodonu kén'gbɔ Yohanɛs-Batista néva. Yi tso kaka gakumua mé olé dégbéfan Mawu ho éfiaduhoa yi amésiamé janagbagba bé yéado imé. ¹⁷ Ekia n'fia bé éséa ho n'sé dé kpɔtɔ lé émɔ dékpékpé jio. N'sé gbé lé isi yi éléké sésédé sibé jipo kudo anyigba nɛnɛ. ¹⁸ N'tsu ké la gbé ésrɔan nyɔnu yi va yi dé ébua wɔa ahasi, yi n'tsu ké tsan ladé nyɔnu ké ésrɔan n'tsu gbéa tsan wɔ ahasi. ¹⁹ Yésu gbé do élo kia nawo ké bé: "N'tsu éhotɔ dé lé, amékia do awu hɔtsihɔtsi yi énɔna jijɔkpɔkpɔmé gasiagamé. ²⁰ N'tsu dahé dé ké yiho n'kɔ yi nyi Lazaro mlɔanyi dé yiho éhɔmɔnu yi abiwo lé yinti kpatakpata ²¹ yi éjina bé yéalé du énuké géna lé ékplɔ n'ti na étsitɔa né inyi bé élé dunua. Avuwo vanɔna yiho abiamé dudɔdudɔ lé yiho agboji. ²² Eva va imé bé amédahéa va ku yi Mawudɔlawo ova kplɔɛ yi abraham ho kɔkoé toho. Etsitoa tsan va ku yi yi ézo mavɔ mé. ²³ Yi lé amékukuwo déa, étsitɔa lé kpéfu yi ké étsɔ yiho n'ku yi éjigbéa ékpɔ Abraham kudo Lazaro lé kékéli mé. ²⁴ Yi édaha lé gblɔ bé: "tatanyé Abraham kpɔ inzizi na yi nadɔ Lazaro tsagbé nétsɔ yiho alɔvi dé étsi mé yi nétso gédé étanyé ji tsagbé makpɔ fafa vidé dobé n'lé ézo wɔadan mé." ²⁵ Vɔa Abraham gblɔ bé: "Evinyé olé do n'ku gakémé olé agbé yi énuwo lé jé iji nawo nyɔɛdé yi Lazaro ya lé éfukpékpé méa? Fifia iya kpɔ akɔ fafa yi oya olé vévésésé mé. ²⁶ Tso yi éjia édo gandé ma miadomé yi amékéwo lé gɛké oma té va miagbɔ, yi miawo tsan minja té va o. N'sé n'lé amédékpékpé si bé néto guwun va gɛké o." ²⁷ Etsi tɔa gblɔ bé: "n'dékuku nawo, tata Abraham, dɔɛ duda tatanyé gbɔ lé ahomé ²⁸ dobé n'do nɔvi n'tsu amatɔn lé guwun tsagbé onétrɔ lé wɔaho éjiwo mé yi owun gbé vava toho kia ké vévésésé lé o." ²⁹ Vɔa Abraham gblɔ bé:" Mosé kudo ényagblɔdilawo lé wogbɔ ola doto wɔawo. ³⁰ Etsitɔa gblɔ bé: "Gbédé, fofo abraham, né inyi bé amé tso amékukuwo domé yi yi wɔagbɔa olahɔɛsé yi trɔ lé wɔaho éjiwo mé." ³¹ Vɔa abraham gbé gblɔnɛ bé: "né inyi bé owun doto Mosé kudo ényagblɔdilawoa, nɛnɛ ké yi né inyi bé amédé tso amékukuwo domé tsa la omahɔ iji sé o."